SHAHAARAA KESISSIYOOGAA

Asi ba koyidoogaadan dooriyoobeeyye, woy qassi loꞌꞌobee woy iitabee?

ASAY WOYGII?

SHahaaraa kesissiya maccaasay deꞌoy metiyoogaa, aqo laggiyaara ooyettiyoogaa, laꞌa gididi harabaa tamaaranawu woy oottanawu koyiyoogaa, woy naꞌa barkka dichanawu koyennaagaa gujjin, dumma dumma gaasuwan hegaadan oottees. SHin harati shahaaraa kesissiyoogaa iitabadan, shahaarida maccaara bawu imettida hadaraa naagennaagaa bessiyaabadan xeelloosona.

GEESHSHA MAXAAFAY WOYGII?

Xoossaa sinttan deꞌoy, ubba qassi asa deꞌoy geeshshaba. (Doomettaabaa 9:6; Mazamure 36:9) Naꞌi qohiyaabaappe naagettidi diccanaadan Xoossay giigissido yelo keettan dicciya naꞌassikka he maaray hanees. Geeshsha Maxaafaa xaafidaagee, “Ta aayee uluwan tana neeni tiladasa” yaagiis. I gujjidi hagaadan giis: “Yelettibeenna ta bollaa ne aifee be7iis. . . . Taayyo neeni bazzido gallassati ubbati ne mazggafan xaafettidosona.”—Mazamure 139:13, 16.

Xoossay yelettibeenna naꞌa deꞌuwaa waati xeelliyaakko i Israaꞌeela deriyawu immido Higgiyaaninne i nuussi immido kahankka qoncciis. Issi uri shahaara maccaasiyo qohidi yelettibeenna naꞌi hayqqanaadan oottikko, akka woranaadan Xoossaa Higgee yootees. (Kessaabaa 21:22-25) Daannati i ay halchidi hegaadan oottidaakko, qassi hegaara gayttida hanotaa qoppana koshshees.—Qoodaabaa 35:22-24, 31.

Asawu kahaykka imettiis. Issi maccaasiyaa biron yelettibeenna ba naꞌaa deꞌuwaa bonchiyoogan ba kahay yootiyoobaa oottiyo wode, i kahay iyyo anjjuwaa demissees.a A ba kahay yootiyoobaa siyennan ixxikko, o zilꞌꞌana woy pirddana danddayees. (Roome 2:14, 15) SHahaaraa kesissiya maccaasay keehi hirggiyoogaanne wozanan unꞌꞌettiyoogaakka xinaatee bessees.

Qoppennan shahaaray attin, naꞌa dichanawu keehi metiyaaba milatikko shin? Xoossay ayyo ammanettidi i kessido maaraa naagiyaageetussi qaalaa gelido kaallidi deꞌiyaabaa akeeka: “Ammanettiyaageetuyyo neeni ammanettiyaagaa; suuretuyyo neenikka suure.” (Mazamure 18:25) Hegaa bollikka Geeshsha Maxaafay, “GODAI xillobaa dosees. Xoossaa asata i yeggenna” yaagees.​—Mazamure 37:28.

‘Issi issitoo eta zoriya wozanay etawu markkattees, qassi issi issitoo eta qofay eta mootees, woykko qassi etaara gaaddetees.’—Roome 2:15.

Neeni shahaaraa kesissidaba gidikko shin?

ASAY WOYGII?

Barkka naꞌa dichiya Ruta hagaadan gaasu: “Taayyo heezzu guutta naati deꞌiyo gishshawu, oyddu naatussi koshshiyaabaa kunttana danddayennabadan qoppaas. SHin shahaaraa kesissa simmin, keehi iitabaa oottidabadan tawu siyettiis.”b Gidoppe attin, a Xoossay atto geenna nagaraa oottadee?

GEESHSHA MAXAAFAY WOYGII?

Yesuus Kiristtoosi, “Taani nagaranchchati bantta nagaraappe simmanaadan, eta xeesanau yiidoogaappe attin, xillota xeesanau yabeikke” yaagidoogee Xoossaa qofaa qonccissees. (Luqaasa 5:32) Ee, nuuni oottido mooruwan wozanappe zilꞌꞌettidi nu nagaraappe simmidi Xoossay atto gaanaadan oychikko, i gita nagaraakka atto gees. (Isiyaasa 1:18) Mazamure 51:17y, “Abeet Xoossau, ‘Nagara oottennan aggarkkinaashsha’ giya, meqqida wozanaa neeni karakka” yaagees.

Zilꞌꞌettida uri ba huuphiyaa kawushshidi woossiyo wode, Xoossay a kahay qumꞌꞌennaadaaninne a wozanay woppu gaanaadan oottees. Piliphphisiyuusa 4:6, 7y hagaadan gees: “Xoossaa intte woossiyo woosa ubban a keehi galatiiddi, inttena koshshiyaabaa ubbau [woossite]. . . . Qassi asa eratettaa ubbaappe aadhdhiya Xoossaa sarotettai intte wozanaanne intte qofaa . . . Naagana.”c Ruta Geeshsha Maxaafaa xannaꞌadanne ba wozanaabaa Xoossawu yootada woppu gaasu. A Xoossay ‘atto giyoogaa’ eraasu.—Mazamure 130:4.

“[Xoossay] nuna nu nagaraadan oottenna; nu iitatettaadan nuuyyo zaarenna.”—Mazamure 103:10.