SHahaaraa Kesissiyoogaa Xeelliyaagan Geeshsha Maxaafay Woygii?

Geeshsha Maxaafay yootiyoobaa

Geeshsha Maxaafay eriiddi shahaaraa kesissiyoogaa xeelliyaagan yootiyo higgee baawa. Gidoppe attin, yelettibeenna naꞌaa gujjin, asaa deꞌuwaa Xoossay waati xeelliyaakko yootiya daro xiqiseti Geeshsha Maxaafan deꞌoosona.

Deꞌoy Xoossaa imota. (Doomettaabaa 9:6; Mazamure 36:9) Aayee uluwan deꞌiya shahaaraa gujjin, deꞌoy A sinttan keehi alꞌꞌo. Yaatiyo gishshawu, shahaaraa eriiddi kesissiyoogee shemppuwaa woriyoogaara issi mala.

Xoossay Israaꞌeelatussi immido Higgee hagaadan gees: “Naa77u asati issoi issuwaara warettiiddi abbe ixeta maccaasiyo dechchikkonne a boshettikko, hegaappe hara iita deshetti xayikko, he maccaasee azinai oichchidobaanne daannati pirddidobaa aibanne qanxxo. SHin iyyo deshettai darikko, shemppoi haiqqikko shemppo.”—Kessaabaa 21:22, 23.a

• Asaa deꞌoy doommiyoy awudee?

• Xoossay shahaaraa kessida urawu atto gaanee?

• Aayyiyaa woy naꞌay qohettikko shahaaraa kessiyoogee balee?

Asaa deꞌoy doommiyoy awudee?

SHahaaray aayee uluwan attido wodiyaappe doommidi Xoossay A deꞌuwan deꞌiya uradan xeellees. Xoossay yelettibeenna naꞌa aayee bollaa shaahodan gidennan, issi asadan xeelliyoogaa Geeshsha Maxaafay darosan yootees. Xoossay aayee uluwan deꞌiya naꞌaa deꞌuwaa yelettida naꞌaa deꞌuwaappe dummayidi xeellennaagaa qonccissiya amarida leemisota beꞌa.

• Ayyaanay denttettin Kawuwaa Daawiti Xoossaa hagaadan giis: “Yelettibeenna ta bollaa ne aifee be7iis.” (Mazamure 139:16) Xoossay Daawiti yelettanaappe kasekka, deꞌuwan deꞌiya asadan A xeelliis.

• Hegaa bollikka, hananabaa yootiya Ermmaasi yelettanaappe kase Xoossay A dummabawu halchchi wottiis. Xoossay awu hagaadan giis: “Taani nena ne aayee uluwan tilanaappe kase eraas. Neeni uluwaappe yelettanaappe kase taani nena geeshshada dummaya wottaas. Qassi kawotettatuyyo hananabaa yootiyaagaa oottada nena sunttaas.”—Ermmaasa 1:5.

• Geeshsha Maxaafaa xaafidanne aakime gidida Luqaasi, biron yelettibeenna naꞌaanne yelettida naꞌaa qonccissanawu issi mala Giriiketto qaalaa goꞌettiis.—Luqaasa 1:41; 2:12, 16.

Xoossay shahaaraa kessida urawu atto gaanee?

Kase shahaaraa kesissidaageetuyyo Xoossay atto gaana. Eti deꞌuwaa Xoossay xeelliyoogaadan xeelliyaaba gidikko, kase oottido mooruwan keehi zilꞌꞌettana koshshenna. “GODAI [Yihooway, NW] qarettiyaagaanne maariyaagaa; . . . Awai mokkiyoosaappe awai wulliyoosai haakkiyoogaadan, hegaadankka GODAI [Yihooway, NW] nu mooruwaa nuuppe haassees.”b (Mazamure 103:8-12) SHahaaraa woriyoogaa gujjin, oottido nagaraappe wozanappe simmiyaageeta ubbaa Yihooway atto gaana.—Mazamure 86:5.

Aayyiyaa woy naꞌay qohettikko shahaaraa kessiyoogee balee?

Yelettibeenna naꞌaa deꞌuwaa xeelliyaagan Geeshsha Maxaafay yootiyoogaadaana gidikko, aayee woy naꞌaa bolli wolqqaama qohuwaa gattees giidi shahaaraa kessiyoogee bala.

Issi issitoo yeluwaa wodiyan gakkiya daafaabaa gaasuwan aayyiyaa woy naꞌay hayqqanaadan oottiyaabay merettikko shin? Hegaa mala wodiyan, O shemppuwaa ashshana bessiyaakko aqo laggeti kuuyana koshshees.