Issoti Issoti Ammaniyoobay Aybee?

Hinddu haymaanootiyaa kaalliyaageeti

issi uri haꞌꞌi woy kase oottido nagaray kaalettidobaa gaasuwan tuggay gakkees giidi qoppoosona. Issi uri zaari zaari yelettidi haymaanootiyaa kaallana danddayenna xekkaa gakkiyo wode zaarettidi yelettiyoogee polettin mokisha giyooba gidees.

Isilaamati

tuggay gakkiyoy nuuni nagaranchcha gidiyo gishshawunne nu ammanuwaa paaccanawu qaxxayettiyoobaa giidi qoppoosona. Azzanttiyaabay gakkiyoogee “nuuni demmido anjjo ubbawu Xoossaa ubbatoo galatanaadaaninne maadoy koshshiyoogeeta maaddana bessiyoogaa akeekanaadan” hassayissiyoogaa giidi Isilaamiki Soosayti Of Norz Amerika pirezddantte gidida Dottoree Sayiidi Sayidi yootiis.

Ayhuda haymaanootiyaa kaalliyaageeti

issi uri oottido mooruwaa gishshawu tuggay gakkees goosona. Aynne oottennan tuggatidaageetuyyo suure pirdday pirddetti simmin, hayqqidaageeti denddana giidi issi issi Ayhudati ammanoosona. Kabalistik (mistikal) giyo Ayhudatu timirttee tamaarissiyoogaadan, hayqqidaagee zaaretti yelettiyoogee he uri kase oottido mooruwaappe simmiyo injjiyaa demmanaadan oottees.

Budistteti

issi uri zaaretti yelettiyoogee iita oosuwaa, iita qofaanne iita amuwaa aggana gakkanaashin deꞌido laytta ubban tuggay gakkiyaaba giidi ammanoosona. Issi uri aadhdhida eratettan, loꞌꞌo oosuwaaninne loꞌꞌo seeran tuggay xayiyo, hegeekka Nirvana giyo hanotaa gakkees.

Konfiyushese haymaanootiyaa kaalliyaageeti

E Dikishineeri Of Komppaarativ Rilijin giyo maxaafay tuggaappe dariya baggay “asaa balaaninne mooruwan” gakkiyoogaa yootees. Suure ogiyan deꞌiyo wode tuggay darennan aggana danddayees; shin tuggay gakkanaadan oottiyay “asa wolqqaappe dariya ayyaanaa meretata. Hegaa mala hanotatun, issi uri he ayyaanaa meretati kuuyidobaa aynne palamettennan maayana bessees” giidi konfiyushese haymaanooteti tamaarissoosona.

Qommuwaa haymaanootiyaa kaalliyaageeti

asay tuggatanaadan oottiyay iita ayyaanata giidi ammanoosona. He ammanuwaa maaraadan, shareechoy loꞌꞌobay woy daafabay gakkanaadan, qassi dumma dumma meeziyaa baggaara tuggay darennaadan oottana danddayees giidi ammanoosona. Hegaa gishshawu, issi uri harggiyo wode, he meezetinne xoossaaway immiyo xalee harggee agganaadan oottana danddayees giidi ammanees.

Kiristtaaneti

Geeshsha Maxaafan deꞌiya Doomettaabaa maxaafay yootiyoogaadan, tuggay gakkanaadan oottiday koyro naaꞌꞌu asatu nagara gidiyoogaa ammanoosona. SHin he timirttiyaa bolli bantta qofaa gujjiya daro haymaanooteti deꞌoosona. Leemisuwawu, Kaatolike haymaanootiyaa kaalliyaageeti nena gakkiya tuggay woosaa keettaa maaddanaadan xoossaa oychchanawu ‘Xoossawu imota immanaadan’ woy issi uri atotettaa demmanawu tuggatanaadan oottees giidi ammanoosona.