5. Tuggay Xayanee?

Hegaa Erana Koshshiyo Gaasuwaa

Tuggay xayanaagaa ammanikko, he hidootay nuuni deꞌuwaanne ubbaa qassi Xoossaa xeelliyo xeelay laamettanaadan oottana danddayees.

Qoppana Koshshiyaabaa

Daro asay tuggaa xayssanawu koyees; shin eti hegaa giigissanawu etawu deꞌiya wolqqay guutta. Kaallidi deꞌiyaagaa akeeka:

Akkamuwaara gayttidaagan dichchay deꞌikkokka . . .

• Wozanaa harggee daro asay hayqqanaadan gaaso gidiyoogee attibeenna.

• Kansseree layttan layttan miilooniyan qoodettiya asaa worees.

• Frontters in Immiyunolooji giyo gaazeexan, Dottore Devid Bilumi hagaadan giis: “Ha alamiyan asay dumma dumma xaliyaa medhdhikkonne, asaappe asaa oyqqiya harggiyaa qommoy keehi dariis.”

Issi issi biittatuyyo daro miishshay deꞌikkokka . . .

• Layttan layttan miilooniyan qoodettiya naati hayqqoosona; hegee darotoo haniyoy hiyyeesati deꞌiyo biittaana.

• Biilooniyan qoodettiya asay geeshshatettaa naaganawu maaddiyaabaa demmenna.

• Daro miilooniyan qoodettiya asay geeshsha haattaa demmenna.

Ha wodiyan daro asay hara asaa waati oyqqanaakko erikkokka . . .

• Daro biittatun bessenna ogiyan asaa issisaappe harasaa efoosona; hegaadan oottiya asati pirddettokkona. Hegee haniiddi deꞌiyoogaa “kawotettati erenna gishshawu woy he asata pirddanawu naqaashaa shiishshana danddayenna gishshawu” gidana giidi Kawotettatu Issippetettay yootiis.

  GUJJADA ERA

  Xoossaa Kawotettay Aybee? giyo biiduwaa jw.org/wal saytiyaappe beꞌa.

Geeshsha Maxaafay Yootiyoobaa

Xoossay nuussi qoppees.

I nu waayiyaanne nu azzanuwaa shenehoo geenna.

“[Xoossay] naaqettidaageeta karenna; eta gakkida qohuwaa tau ai metoo geenna. Bari som77uwaa etappe genttenna; shin eti maaduwaassi akko waassiyo wodiyan, eta waasuwaa siyees.”—MAZAMURE 22:24.

“I intteyyo qoppiyo gishshau, inttena hirggissiya ubbabaa a bolli olite.”—1 PHEEXIROOSA 5:7.

Tuggay merinawu deꞌenna.

Geeshsha Maxaafay Xoossay nuussi halchchidobay polettanaagaa yootees.

“Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—AJJUUTAA 21:3, 4.

Xoossay asay tuggatanaadan oottiyaabata xayssana.

I hegaa ba Kawotettaa baggaara oottana; hegaa Geeshsha Maxaafay tumu aysuwaa giidi yootees.

“Saluwaa Xoossai mulekka kunddenna, hara asaukka imettenna kawotettaa essana. . . . I merinau eqqidi daana.”—DAANEELA 2:44.