Asaa Coo Ixxiyoogaa He Harggee Nena Oyqqi Erii?
Asaa coo ixxiyoogee hargge mala. Hegee qohees; qassi sahettiiddi deꞌiyaakkonne asay erennan aggana danddayees.
Asay hara zare, qommo, woy hara qaalaa haasayiyaageeta xalla gidennan, haymaanootiyan, mattuman woy deretettan deꞌiya hanotan dummatiya asakka coo ixxana danddayees. Issoti issoti layttaa, timirtte hanotaa, bollan deꞌiya pacaa woy qottaa xeellidi bala ogiyan pirddoosona. Gidikkonne, eti asaa coo ixxiiddi deꞌiyoobaa etawu milatenna.
He harggee nena oyqqana danddayii? Nuuppe daroti asay asaa coo ixxiyoogaa eroos. SHin hegee nuna gakkiyo wode keehi metiyaaba gidana danddayees. Nuuni ubbay amarida hanotan asaa coo ixxiyoogee tuma. Asay issi citaa xeelliyaagan balabaa qoppiyo wode, qassi yaatidi he citaappe issi uraara gayttiyo wode deꞌiya hanotaa xeelliyaagan Devid Wiiliyaams giyo eranchchay, “Eti he uraa bala ogiyan xeellana; qassi eti hegaadan xeellidoogaakka akeekokkona” yaagiis.
Leemisuwawu, Joviki deꞌiyo Balkan giyo biittan, daro asay ixxiyo issi zaree deꞌees. I hagaadan giis: “He citan ooninne loꞌꞌo asi deꞌana danddayenna gaada qoppaas. SHin taani eta xeelliyaagan tumubaa erays gaada qoppido gishshawu, eta coo ixxaydda deꞌiyoogaa erabeykke.”
Daro kawotettati asay asaa zariyan shaakkennaadaaninne hara ogiyan asaa coo ixxennaadan digganawu higgiyaa kessidosona. Gidikkonne, asaa coo ixxiyoogee xayibeenna. Aybissi? He Higgeti issi uri oottiyoobaa xalla teqqiyo gishshataassa. Higgeti issi uri qoppiyoobaanne awu siyettiyaabaa teqqana danddayokkona. Qassi ixoy issi ura qofaaninne wozanan doommees. Nuuni coo ixxiyoogaa xoonana danddayiyoo?
Daro asay bantta qofaaninne wozanan harata coo ixxiyoogaa agganawu maaddida ichchashu maarata kaalliya huuphe yohotun beꞌana.