Neeppe Dummatiya Asaappe Laggeta Koya

Metuwaa

Nuuni iita ayfiyan xeelliyo asatuppe nuna shaakkikko, kaseegaappe aaruwan asaa coo ixxana danddayoos. Qassi nu mala asatuura xalla laggetikko, nu qofaa, nuussi siyettiyaabaanne nu oottiyoobaa xallay likke giidi qoppana danddayoos.

Geeshsha Maxaafay Yootiyo Maaraa

“Intte uluwaa aassi dooyidi bessite.”—2 QORONTTOOSA 6:13.

Ha xiqisiyaappe nuuni ay tamaariyoo? Nu “uluwaa” giya qaalay siiquwaa bessiyaaba gidana danddayees. Nuuni nunaara issi mala gidida asata xalla siiqikko, nu uluwaa dooyibookko. Nuuni he metuwaa xoonanawu, nuuppe dummatiya asatuura laggetanawu eeno gaana koshshees.

Nuuppe Dummatiya Asatuura Laggetiyoogee Waati Maaddii?

Nuuni harata loytti eranawu baaxetiyo wode, eti issibaa dumma ogiyan oottiyoy aybissakko akeekiyoogaa doommoos. Qassi nuuni eta loytti siiqiyoogaa doommiyo wode, eti dumma cita gidiyoogaa dogi aggoos. Nuuni eta xoqqu ootti xeelloosinne etawu qarettoos.

Nazari hanotaa beꞌa. Issi wode A beteta coo ixxawusu. O maaddidabaa hagaadan yootaasu: “Taani etaara wodiyaa aattaasinne oosuwaa etaara oottaas. Eta citaa xeelliyaagan harati yootidobaappe muleera dumma gidida asatuura gayttaas. Wogan dummatiya asaara neeni laggetiyo wode, eti ubbay issi mala gidennaagaa akeekaasa; qassi eta loytta siiqaasanne eta ubbaa xoqqu ootta xeellaasa.”

Neeni Oottanabaa

Neegaappe dummatiya biittaappe, zariyaappe woy qaalaappe yiida asatuura haasayana danddayiyo ogiyaa koya. Kaallidi deꞌiyaabata oottana danddayaasa

Banttabaa amaridabaa neeyyo yootanaadan eta oychcha.
Qumaa issippe maanawu eta shoobba.
Bantta deꞌuwaabaa eti neeyyo yootiyo wode loytta ezgga; qassi eti xoqqu ootti xeelliyoobaa akeekanawu mala.

Eta gakkidabaa neeni akeekanawu baaxetikko, eti hegaadan haniyoy aybissakko akeekana. Hegee neeni etanne eta citan deꞌiya harata dosanaadan maaddana danddayees.

DEꞌUWAN HANIDABAA: Kandesaminne Sukama / KANAADA

“Nuuni Tohossa Afirkkan zariyan lagiyoogee deꞌiyo wodiyan diccida. Issi zaree hara zariyaa coo ixxanaadan denttettiya citati dumma dumma zaaretti shaahettidi deꞌanaadan wolqqanttoosona. Nuuni bootta asa gidokko, qassi bootatuppe issoti issoti nuna guutti xeelliyo gishshawu nuuni eta dosokko. He wode, nu eta coo ixxiiddi deꞌiyoogaa akeekibookko. SHin eti nuna coo ixxiyaabadan nuuyyo siyettees.

“Nuuni nu qofaa laammanawu, nu uluwaa aassidi zariyan dummatiya asaara laggetida. Boottatuura laggetiyoogaa doommido wode, nuuni etaara issi mala gidido darobati deꞌiyoogaa akeekida. Nuna ubbaa issi mala hanotatinne metooti gakkoosona.

“Bootta gidida azinaynne machchiyaa imatuwaa mokkin adussaa wodiyawu nu son takkidosona. Nuuni eta loytti erida. Nuuni issoy issuwaara laggenne issi mala gididoogaa sohuwaara akeekida. Hegaappe denddidaagan, bootta asata ubbaa loꞌꞌo ayfiyan xeelliyoogaa doommida.”