Saluwaa Meretatuppe Ay Tamaarana Danddayiyoo?

Saluwaa meretati maara darajjayettidosona. Asttironoomii giyo maxeetiyan kiyida issi huuphe yohoy hagaadan gees: “Gaalakiseti coo laalettidi gidennan, maaraa mankkaa naagidi yuuyoosona.” Hegee waani hanana danddayii? Hegee hananaadan oottiday asawu beettenna xuura gidida wolqqaa giidi saynttistteti ammanoosona. Xuura gidida he wolqqay, “gaalakiseti, kilasttere geetettiya citan deꞌiya gaalakisetinne superkilastter geetettiya citan deꞌiya gaalakiseti bantta ziiriyaa naagidi yuuyanaadan oottiya ayfiyan beettenna gayye malaba.”

Saloy hegaadan waani darajjayettidee? Medhdhidaagee baynnan coo hegaadan darajjayettidee? Alan Sandij giyo eranchchay yootidobaa akeeka. I “aadhdhida xeetu layttawu saluwaa meretatubaa loytti xannaꞌida asatuppe issuwaa.” Qassi I Xoossan ammaniis.

I hagaadan giis: “Maaran mankkan darajjayettidabay coo haniis giyoogee tawu ammananawu metiyaaba. Hegaa darajjayidabay deꞌana bessees.”

Saluwaa meretati saꞌan deꞌoy giiga gidanaadan oottoosona. Awaa ayfee ubbatoo issi mala hanotan michchiyoogaabaa ane qoppa. Away issi mala hanotan michchanaadan oottiya wolqqay keehi guuxxikko, awaa ayfee mule merettenna; qassi he wolqqay keehi darikko awaa ayfee xuugetti xayana.

Deꞌon deꞌiyaabati saꞌan paxa deꞌanaadan maaddiya daro meretaa higgeti saluwan deꞌoosona. Saynisiyaa eranchchay Anel Anantaswame yootidoogaadan, he higgetuppe issoy dummatiyaakko “xoolintteti, pilaaneetetinne gaalakiseti merettokkona. Qassi deꞌon deꞌiyaabati mule deꞌana danddayokkona.”

Saꞌay asay deꞌanawu injje soho. Saꞌaassi giiga carkkoy, gidiyaagaa keena haattaynne I ba sohuwaappe deshennaadan maaddiya giiga yesoy deꞌiyo aginay deꞌees. Naashinal Joograpik giyo maxeetee hagaadan gees: “Saꞌaa qottaa, mehiyaa doꞌaa, mokkiyaabata, heeraa qassi deꞌon deꞌiyaabata xannaꞌiya saynttistteti, asay deꞌanawu injje sohoy [saꞌaa] xalla gidiyoogaa akeekidosona.”a

Issi eranchchay giidoogaadan awa ayfeenne A yuushuwan yuuyiyaabati gaalakisiya giddon deꞌiya hara xoolinttetuppe keehi haakkoosona. SHin hegaadan eti issoy issuwaappe haakkidoogee saꞌan deꞌoy deꞌanaadan oottiis. Nuuni galaakisiyawu giddo ginan woy gaxan hara xoolinttetukko shiiqidi deꞌiyaakko, mishuwaa woraajjoy (radiation) keehi darana. SHin saꞌay gaalakisiya giddon giiga sohuwan deꞌiyo gishshawu, deꞌuwawu injjetiya soho.

Pol Deviisa giyo eranchchay bawu deꞌiya saluwaanne saꞌaa higgiyaa eraappe denddidi hagaadan giis: “Ha keehi aaho gidida maalaaliya saꞌan nuuni deꞌana danddayidoy coo qaadadaana, woy wodiyaa daruwan bawu hanidabaana gaada ammananawu tawu deexxees. . . . Nuuni hagan deꞌanawu merettida.” Deviisi saluwaanne saꞌaa qassi asaa medhdhiday Xoossaa giidi tamaarissenna. SHin ne qofay aybee? Saꞌay deꞌon deꞌiyaabati an deꞌanaadan injjetidi merettiis. Saꞌay hegaadan merettidoy Medhdhidaagee deꞌiyo gishshataassee?