Iita Kawoy Gibxxe Biittaa Haariis

HA NE beꞌiyo asati asaa wolqqan ootissiiddi deꞌoosona. Oosanchchatuppe issuwaa lissuwan shociya bitaniyaa xeella! Oosanchchati Israaꞌeeleta geetettiya Yaaqooba so asata. Eta wolqqan ootissiyaageeti qassi Gibxxeta. Israaꞌeeleti Gibxxetussi aylle gididosona. Hegee waani hanidee?

Corattida Yaaqooba soo asay daro layttaassi Gibxxen saruwan deꞌiis. Gibxxe biittan kawuwaa Paaroonappe kaallidi xoqqa sohoy deꞌiyo Yooseefi, eta loytti oyqqiis. SHin hegaappe Yooseefi hayqqiis. Qassi Israaꞌeeleta dosenna hara Paarooni Gibxxen kawotiis.

Yaatiyo gishshau, ha iita Paarooni Israaꞌeeleta aylle oottiis. Qassi, eta bolli qareti baynna iita asata halaqa oottiis. He asati wolqqan Israaꞌeeleta daro deexo ooso ootissidi, Paaroonayyo katamata keexissidosona. SHin Israaꞌeeletu qooday gujjiiddi biyoogaa aggibeenna. Guuttaa takkishin Gibxxeti, ‘Israaꞌeeleti keehippe daroosonanne minnoosona’ giidi hirggiyoogaa doommidosona.

Hegaa gishshau, Paarooni waatidaakko eray? I Israaꞌeela maccaasay yeliyo wode maaretissiya maccaasata: ‘Yelettiya naꞌay attumaagaa gidikko worite’ yaagiis. SHin he maccaasati loꞌꞌo asa gidiyo gishshau naata woribookkona.

Yaatiyo gishshau, Paarooni ba asaa ubbaa: ‘Israaꞌeeletu gacino naata, attumaageeta woridi maccaageetu xallaa ashshite’ yaagidi azaziis. Hegee keehi yashshiya azazo gidennee? He gacino attuma naatuppe issoy waanidi attidaakko ane beꞌoos.