Issi Ooratta Qommo Qumaa

ASAY saꞌaappe maxiiddi deꞌiyoy aybakko eray? Hegee suuppa shachcha milatees. Hegee bootta, leeꞌenne shuqo keena. SHin hegee miyobappe attin shachcha gidenna.

Israaꞌeeleti Gibxxeppe kiyoosappe mexi issi agina gidiyaagee aadhdhiis. Eti haꞌꞌi bazzon deꞌoosona. Hegan mokkiya kattay keehi laafa gidiyo gishshau, asay zuuzummiiddi: ‘Yihooway nuuni Gibxxen deꞌishin nuna woridaakko loꞌꞌo shin. Yan nuuni koyido qumaa ubbaa miida’ yaagidosona.

Yaatin Yihooway: ‘Taani qumaa saluwaappe duge bukissana’ yaagiis. Yihooway oottidoykka hegaadaana. Wonttetta gallassi maallado Israaꞌeeleti saluwaappe wodhdhida he boottabaa beꞌidi, issoy issuwaa, ‘Hagee aybee?’ yaagidi oychchidosona.

Muusee: ‘Hagee intte maanaadan Yihooway immido qumaa’ yaagiis. Asay he qumaa ‘MANNAA’ yaagidi xeesiis. I eessaara uukkido leeꞌe oyttadan malꞌꞌees.

Musee asaayyo: ‘Intte huuphiyan huuphiyan issi uri miyoogaa keenaa xallaa maxite’ yaagiis. Yatiyo gishshau, asay ubba gallassi maallado oottidoy hegaadaana. Hegaappe, away michchiyo wode, saꞌan attida mannay seeri aggees.

Muusee gujjidikka ‘Ooninne wonttossi mannaappe ashshoppo’ yaagiis. SHin asaappe issoti issoti azazettennan ixxidosona. Yaatin aybi hanidaakko eray? Wonttetta gallassi maallado eti ashshido mannay guxunidi, xinqqiyoogaa doommiis.

Gidikkokka, saaminttan hara gallassaagaappe naaꞌꞌu kushe dariya mannaa shiishshanaadan, Yihooway yootido issi gallassay deꞌees. Hegee usuppuntta gallassaa. Yihooway laappuntta gallassan ayba manninne wodhdhanaadan oottenna gishshau, usuppuntta gallassi maxidoogaappe kaalliya gallassaayyo ashshanaadan etassi yootiis. Eti laappuntta gallassau mannaappe ashshin, guxunibeennanne xinqqibeenna! Hegee hara maalaalissiyaaba!

Israaꞌeeleti bazzon deꞌido wode ubban, Yihooway eta mannaa miziis.