Goynniyo Dunkkaaniyaa

HA KEETTAY aybakko eray? Hegee Yihoowayyo goynniyo dumma dunkkaane. I gayttiyo dunkkaaniyaakka geetetti xeegettees. Asay Gibxxeppe kiyido issi layttappe guyyiyan a keexxi wurssidosona. I keexettanaadan qofaa shiishshiday oonakko eray?

Qofaa shiishshidaagee Yihoowa. Muusee Siina Deriyaa huuphiyan deꞌishin, dunkkaaniyaa waatidi keexxanaakko, Yihooway assi yootiis. I dunkkaanee kolanau metennaagaa gididi oosettanaadan yootiis. Hegaa mala ogiyan koletti shaahettidaageeti hara sohuwaa tooketti bin, dunkkaanee yan wodhdhi eqqidi tolettana danddayees. Hegaa gishshau, Israaꞌeeleti bazzuwan issisaappe harasaa biiddi, dunkkaaniyaa tookki ekkidi yuuyidosona.

Dunkkaaniyaayyo issi bagga gaxan deꞌiya guutta kifiliyaa gidduwaa xeellikko, issi saaxiniyaa beꞌana danddayaasa. Hegee maachchaa taabootaa geetettees. Ayyo naaꞌꞌu bagga gaxaara worqqaappe merettida naaꞌꞌu kiitanchchati woykko kiruubeti deꞌoosona. Muusee koyiroogeeta menttido gishshau, Xoossay Tammu Azazota zaarettidikka masettida shuchchan xaafiis. He naaꞌꞌu shuchchati maachchaa taabootaa giddon yegettidosona. Qassi, mannaa qolido xaaroykka a giddon yegettiis. Mannay aybakko hassayay?

Yihooway qeestu halaqa oottidi dooridoy Muuse ishaa Aaroona. Asay Yihoowassi goynniyoogan i kaalettees. A naatikka qeese.

Dunkkaaniyau aakkiya kifiliyaa ane haꞌꞌi xeella. I he guutta kifiliyaappe naaꞌꞌu kushe darees. Appe cuway kiyiiddi deꞌiyo issi guutta saaxiniyaa beꞌay? Hegee qeeseti a bolli sawiya ixaanaa cuwayiyo saaxiniyaa. Laappun xomppeta wottiyo ballaykka deꞌees. He kifiliyan deꞌiya heezzanttobay qassi xaraphpheezaa. A bollan 12⁠u baso oyttati uttoosona.

Gayttiyo dunkkaaniyaa dirssa giddon, haattay kumi uttido aaho keree deꞌees. Qeeseti a meecettanau goꞌettoosona. Hegan yarshshuwaa yarshshiyoosaykka deꞌees. SHukkido mehee yan xuuggiyo yarshsho gididi Yihoowayyo shiiqees. Gayttiyo dunkkaanee asay dunkkaanidosaassi gidduwan deꞌees; Israaꞌeeleti ubbay qassi a yuushshuwan bantta dunkkaaniyan dunkkaaniyan deꞌoosona.