Xomoosiya 12U Asata

HA ASATI tookkido teera ayfiyaa xeella. Woyne teeraa wurccoy ay keena gitakko xeella. Hegaa kasuwan aattidi tookkanau naaꞌꞌu asa koshshiis. Balasiyaanne roomaaniyaa geetettiyaa hara mitta ayfetakka xeella. Ha loꞌꞌo teera ayfee auppe yiidee? Kanaane biittaappe yiis. Kanaanee issi wode Abrahaamee, Yisaaqinne Yaaqoobi deꞌidosaa gidiyoogaa hassaya. SHin he sohuwan koshay denddido gishshau, Yaaqoobi ba soo asaara Gibxxen deꞌanau biis. Haꞌꞌi 216 gidiya layttay aadhdhi simmin, Muusee Israaꞌeeleta zaaridi Kanaane biitti kaaletti efiiddi deꞌees. Eti Bazzon Qaadeesa geetettiya sohuwaa gakkidosona.

Kanaane biittan iita asati deꞌoosona. Yaatiyo gishshau, Muusee 12⁠u xomoosiyaa asata kiittiiddi etassi: ‘He biittan deꞌiya asay ay keena corakkonne qassi etu minotaykka ay keenakko xomoosite. Biittaykka katta loytti mokkiyakkonne xomoosite. Qassi yan mokkida teera ayfiyaappe amaridaagaa ehennan aggoppite’ yaagidi yootiis.

Xomoosiya asati Qaadeesa simmi yiidi Muusessi: ‘Biittay tumuppe loꞌꞌo’ yaagidi yootidosona. Hegaa qonccisanau, eti Muusa yaappe ehiido teeraappe amaridaagaa bessidosona. SHin xomoosiyaageetuppe 10⁠ti: ‘Yan deꞌiya asay adussanne mino. Eta biittaa ekkanau nuuni malikko, eti nuna worana’ yaagidosona.

Israaꞌeeleti hegaa siyidi yayyidosona. Eti: ‘Nuuni Gibxxe biittan woykko ha bazzuwan haiqqidabaa gidiyaakko loꞌꞌo shin’ yaagidosona. ‘Nuuni olan hayqqana; nu maccaasatinne nu naatikka oomooddettana. Muuse sohuwan kaalettiya ura dooridi, Gibxxe guyye simmoos!’ yaagidosona.

SHin xomoosiyaageetuppe naaꞌꞌati Yihoowan ammanettidi, asay yayyennadaan oottanau baaxetidosona. Eta sunttay Yaasanne Kaaleeba. Eti: ‘Yayyoppite. Yihooway nunaara deꞌees. He biittaa nu ekkanaagee metenna’ yaagidosona. SHin asay siyibeenna. Eti ubba Yaasanne Kaaleeba worana koyidosona.

Yihooway hegan daro yiillotidi Muusessi hagaadan yaagiis: ‘Layttay 20 woy appe bolla gidido asaappe issoynne Kanaane biitti gelenna. Taani Gibxxe biittaaninne bazzuwan oottido maalaalissiyaabaa beꞌidosonashin, yaatidikka tanan ammanettibookona. Hegaa gishshau, etappe issoynne attennan hayqqana gakkanaashin, eti 40⁠u layttaayyo bazzuwan toylattana. Yaasunne Kaaleeba xallay Kanaane biitti gelana’ yaagiis.