Yaasu Kaalettiyaagaa Gidiis

MUUSEE Israaꞌeeletuura Kanaane gelanau koyiis. Hegaa gishshau i: ‘Yihoowau, taani Yorddaanoosa SHaafaa pinnada loꞌꞌo biittiyo beꞌanaadan oottarkkii’ yaagidi oychchiis. SHin Yihooway: ‘Simi gidana! Naaꞌꞌantto hegaa denttoppa!’ yaagiis. Yihooway hegaa ayssi giidaakko eray?

Muusee zaallaa shocido wode hanidabaana. Inne Aarooni Yihoowa bonchchibeennaagaa hassaya. Zaallaappe haattaa kessidaagee, Yihoowa gidiyoogaa asaassi yootibookkona. Hegaa gaasuwan, i eta kaalettidi Kanaane gelissennaagaa Yihooway yootiis.

Yaatiyo gishshau, Aarooni hayqqin guutta wodiyaappe guyyiyan, Yihooway Muuseyyo: ‘Yaasa ekkada, qeesiyaa Elꞌꞌaazara sinttaaninne asaa sinttan essa. Hegan eta ubbaa sinttan, ne sohuwan kaalettiyaagee Yaasa gidiyoogaa ubbaayyo yoota’ yaagiis. Neeni misiliyan beꞌana danddayiyoogaadan, Muusee Yihooway giidoogaadan oottiis.

Hegaappe Yihooway Yaasa: ‘Minna; yayyoppa. Neeni Israaꞌeeleta taani qaalaa gelido Kanaane biitti kaalettada gelissana; qassi taani nenaara gidana’ yaagiis.

Guyyeppe Yihooway Muusee Mooꞌaaba biittan deꞌiya Nabo Deriyaa huuphiyaa kiyanaadan yootiis. Muusee he sohuwan eqqidi Yorddaanoosa SHaafaanne loꞌꞌiya Kanaane biittaa beꞌana danddayees. Yihooway: ‘Taani Abrahaama, Yisaaqanne Yaaqooba naatussi immanau qaalaa gelido biittay hagaa. Neeni beꞌanaadan oottaas; shin neeni yaa gelanaadan oottikke’ yaagiis.

Muusee yan Nabo Deriyaa huuphiyan hayqqiis. I he wode 120⁠u laytta asa. He wodekka i minonne ayyo ayfeekka galjjibeenna. Muusee hayqqido gishshau, asay keehippe azzanidi yeekkiis. SHin a sohuwan banttana kaalettiya Yaasa demmido gishshau ufayttidosona.