Muusee Zaallaa Shociis

LAYTTAAPPE layttay giishin, 10⁠u layttay, 20⁠u layttay, 30⁠u layttay, 39n layttay aadhdhiis! Israaꞌeeleti haꞌꞌikka bazzuwan deꞌoosona. SHin he ubba wodetun Yihooway ba asaa naagiis. I eta mannaa miziis. I eta gallassi shaaraa tuussan, qammi qassi tamaa tuussan kaalettiis. He layttatu ubban, eta maayoy wuribeennanne eta gedeekka kixxibeenna.

Haꞌꞌi Gibxxeppe kiyoosappe 40ntta layttau koyro agina. Israaꞌeeleti zaarettidikka Qaadeesan dunkkaanidosona. Xomoosanau kiitettida 12⁠u asati Kanaane biido wode 40 gidiya layttappe kase Israaꞌeeleti shemppidoy ha sohuwaana. Muuse michchiyaa Miiriyaama Qaadeesan hayqqaasu. Kaseegaadankka ha sohuwan metoy merettiis.

Asay ayba haattanne demmana danddayibeenna. Yaatiyo gishshau, eti Muuse bolli: ‘Nuuni hayqqidabaa gidiyaakko loꞌꞌo shin. Nuna Gibxxeppe kessada aybinne mokkenna ha metoy kummido sohuwaa ayssi ehaadii? Ayba kattinne baawa; ayba balaseenne baawa; ayba roomaaneenne baawa. Haatta addinikka uyanau baawa’ yaagidi zuuzummidosona.

Muuseenne Aarooni dunkkaane giddo woossanau bin, Yihooway Muuseyyo: ‘Asaa issippe shiishsha. Hegaappe eti ubbay beꞌishin he hinin deꞌiya zaallaassi yoota. Zaallaappe asaunne eta mehiyau ubbau gidiya haattay goggana’ yaagiis.

Yaatiyo gishshau, Muusee asaa shiishshidi: ‘Xoossan ammanettenna asatoo, siyite! Aarooninne taani ha zaallaappe intteyyo haattaa tumu kessanee?’ yaagiis. Hegaappe Muusee zaallaa naaꞌꞌutoo gatiman shocin, haattay zaallaappe xuuqqidi kiyiis. Asaynne mehee ubbay uyanau gidiya haattay kiyiis.

SHin Yihooway Muusenne Aaroona bolli yiillotiis. Aybissakko eray? Muuseenne Aarooni zaallaappe haattaa eti kessana haniyaabadan haasayido gishshataassa. SHin hegaa oottiday tumuppe Yihoowa. Muuseenne Aarooni hegaabaa tumaa haasayibeenna gishshau, Yihooway eta qaxxayana haniyoogaa yootiis. I eta: ‘Ta asaa kaalettidi Kanaane gelissekketa’ yaagiis.

Israaꞌeeleti gamꞌꞌennan Qaadeesappe denddidosona. Guutta wodiyappe guyyiyan Hoora Deriyaa gakkidosona. He deriyaa huuphiyan Aarooni hayqqiis. I hayqqiyo wode ayyo layttay 123. Israaꞌeeleti keehippe azzanido gishshau, asay ubbay Aaroonassi 30⁠u gallassaa yeekkiis. A naꞌay Elꞌꞌaazari a sohuwan Israaꞌeele asaassi qeese halaqa gidiis.