Yihoowi Yaasa Dooriis

Muusee daro layttawu Israaꞌeelata kaaletti simmin, i hayqqiyo wodee matiis. Yihoowi ayyo hagaadan giis: ‘Israaꞌeelata Hidootaa Biittaa gelissanay nena gidakka. SHin neeni he biittaa beꞌanaadan taani oottana.’ Yaagin Yihoowi asaa kaalettiya hara uraa dooranaadan Muusee a oychiis. Yihoowi a, ‘Yaasukko ba; baada asaa kaalettanay a gidiyoogaa yoota’ yaagiis.

Muusee Israaꞌeelatussi i mata wode hayqqanaagaa yootiis; qassi eta kaalettidi Hidootaa Biittaa gelissanaadan Yihoowi Yaasa dooridoogaakka yootiis. Hegaappe simmin Muusee Yaasuyyo, ‘Yayyoppa. Yihoowi nena maaddana’ yaagiis. Hegaappe guyyiyan gamꞌꞌennan, Muusee Nabo deriyaa huuphiyaa kiyiis; hegee Yihoowi Abrahaamayyo, Yisaaqayyoonne Yaaqoobayyo immanawu qaalaa gelido biittaa a bessido soho. Muusee hayqqiyo wode ayyo layttay 120.

Yihoowi Yaasa hagaadan giis: ‘Yorddaanoosa SHaafaa pinnada Kanaane gela. Taani Muusa maaddidoogaadan nenakka maaddana. Ta Higgiyaa ubba galla nabbaba. Yayyoppa. Xala. Neeni oottanaadan taani azazidobaa baada ootta.’

Yarkko katamaa xomoosanaadan xomoosiya naaꞌꞌu asata Yaasu kiittiis. Kaalliya taarikiyan, yan aybi hanidaakko nuuni loytti tamaarana. Eti simmido wode, Kanaane baanawu he wodee loꞌꞌo gidiyoogaa yootidosona. Wonttetta gallassi, dunkkaaniyaa kolidi qachanaadan Yaasu asawu yootiis. He wode i maachaa taabootaa tokkida qeeseti Yorddaanoosa SHaafaakko sinttatidi baanaadan kiittiis. SHaafay kumidi goggees. SHin qeesetu tohoy haattaa bochin sohuwaara, shaafay goggiyoogaa aggiis; qassi haattay meliis! Israaꞌeela asay ubbay hefintti pinnidi wurana gakkanaassi qeeseti Yorddaanoosa SHaafaa giddo biidi mela biittan eqqidosona. Ha maalaalissiyaabay Yihoowi Zoꞌo Abban oottidobaa eti hassayanaadan oottiis gaada qoppay?

Wurssettan, daro layttaappe guyyiyan, Israaꞌeelati Hidootaa Biittaa gelidosona. Eti keettatanne katamata keexxana danddayoosona. Eti gadiyaa oottidi woyniyaanne ayfiyaa ayfiya mittata tokkana danddayoosona. He biittay maattaynne eessay goggiyo biitta.