Raꞌaaba Xomoosiya Asata Qottaasu

HA ASATI metuwan geli uttidosona. Eti baqatana koshshees; hegee xayikko, hayqqoosona. Eti xomoosuwau biida Israaꞌeeleta, qassi eta maaddaydda deꞌiya maccaasiyaa Raꞌaabo. Raꞌaaba Yarkko katamaa dirssaa gimbbiyaara oyqqetti keexettida ha keettan deꞌausu. Ha asati metuwan waani gelidaakko ane beꞌoos.

Israaꞌeeleti Kanaane biitti gelanau, Yorddaanoosa SHaafaa pinnanau giigi uttidosona. Eti pinnanaappe kase, Yaasu xomoosiya naaꞌꞌu asata kiittiis. I, etayyo: ‘Biidi biittaanne Yarkko Katamaa xomoosite’ yaagiis.

Xomoosiyaageeti Yarkko gakkidi, Raꞌaabi soo biidosona. SHin issi asi Yarkko kawuwaassi: ‘Naaꞌꞌu Israaꞌeele asati hachchi qammi biittaa xomoosanau yiidosona’ yaagidi yootiis. Kawoy hegaa siyidi Raꞌaabi soo asaa kiittin, eti o: ‘Ne soo yiidi gelida asata kessada imma!’ yaagidi azazidosona. SHin Raꞌaaba xomoosiyaageeta shakkuwan qottaasu. Yaatada a: ‘Amarida asati ta soo yiidosona; shin eti auppe yiidaakko taani erikke. Eti saꞌay lankki lankkiyaagan katamaa penggee gorddettennan deꞌishin kiyidi biidosona. Ellelliyaabaa gidikko, intte eta gakkana!’ yaagaasu. Yaatiyo gishshau, asati eta kaallidi biidosona.

Eti bi simmin, Raꞌaaba eesuwaara shakkuwaa pude kiyaasu. A xomoosiyaageetussi hagaadan yaagaasu: ‘Yihooway ha biittaa inttessi immanaagaa taani erayis. Intte Gibxxeppe kiyiyo wode, i Zoꞌo Abbaa waati melissidaakko nuuni siyida; qassi intte Sihoonanne Ooga geetettiya kawota waati woridaakko siyida. Taani inttessi kehido gishshau, inttekka taassi kehanau hayyanintta qaalaa gelite. Ta aawaa, ta aayyiyo, ta ishanttanne ta michchota ashshite’ yaagaasu.

Xomoosiyaageeti eeno giidosona; shin Raꞌaaba issibaa oottana bessees. Xomoosiyaageeti haagaadan yaagidosona: ‘Ha zoꞌo wodoruwaa ekkada maskkootiyan qachcha; qassi ne dabbota ubbaa nenaara ne son wotta. Yarkko katamaa oyqqanau yiyo wode, ha zoꞌo wodoruwaa ne maskkootiyan beꞌidi, ne son deꞌiya asa worokko’ yaagidosona. Xomoosiyaageeti Yaasukko simmi biidi, hanettidabaa ubbaa assi yootidosona.