Xoossay Daawita Dooriis

HANIDABAY aybakko beꞌay? Naꞌay ha guutta dorssa mariyoo beere giyo doꞌaappe wotti ekkiis. Beeree dorssa mariyoo oyqqidi ekki efiis. SHin naꞌay a geeduwaa woxxi biidi, maana haniya beeriyaa doonaappe dorssa mariyoo wotti ekkiis. Beere pude denddi eqqin, naꞌay a oyqqidi shocciyoorin beere hayqqi bayiis! Hara wode issi dorssaa gaammuwaappe ashshiis. Hegee xala naꞌa gidenee? I oonakko eray?

Hegee yelaga naꞌaa Daawita. I Beetaliheeme kataman deꞌees. A aawaa aaway Urutinne Booꞌeeza naꞌaa Yoobeeda. Ne eta hassayay? Daawita aaway qassi Isseya. Daawiti ba aawaa dorssaa heemmees. Daawiti yelettidoy Saaꞌooli kawo gidanaadan Yihooway doori simmin, 10⁠u layttappe guyyiyaana.

Yihooway Sameelayyo: ‘Dumma zaytiyaappe amaridaagaa ekkada Isseye so Beeteliheema ba. A naatuppe issuwaa kawo gidanaadan dooraas’ yaagiyo wodee gakkiis. Sameeli Isseya bayra naꞌaa Eliꞌaaba beꞌidi ba wozanan: ‘Tumuppe Yihooway dooridoy hagaa’ yaagidi qoppiis. SHin Yihooway ayyo: ‘A geesaa adussatettaanne a meraa loꞌꞌotettaa xeelloppa. I kawo gidanaadan taani a doorabeykke’ yaagiis.

Yaatin Isseyi ba naꞌaa Abinadaaba xeesidi Sameelakko ehiis. SHin Sameeli: ‘CHii, Yihooway hagaakka dooribeenna’ yaagiis. Kaallidi Isseyi ba naꞌaa SHaama ehiis. Sameeli: ‘Yihooway hagaakka dooribeenna’ yaagiis. Isseyi ba naatuppe laappunaa ehiis shin, Yihooway etappe oonanne dooribeenna. Sameeli: ‘Ne naati hageetu xalleeyye?’ yaagidi oychchiis.

Isseyi: ‘Ubbaappe kaalo naꞌay deꞌees; shin i dorssaa heemmiiddi deꞌees’ yaagiis. Daawiti yin, Sameeli i mera loꞌꞌiya naꞌa gidiyoogaa beꞌiis. Yihooway: ‘Hagee a; zaytiyaa a bolli tiga’ yaagiis. Sameeli oottidoykka hegaadaana. Daawiti Israaꞌeele kawo gidiyo wodee yaana.