Daawitanne Gooliyaada

Yihoowi Sameela, ‘Isseya soo ba. A naatuppe issoy Israaꞌeelan kawo gidana’ yaagiis. Yaatiyo gishshawu Sameeli Isseya soo biis. I bayratiya attuma naꞌaa beꞌido wode, ‘Ha yelagay a gidana bessees’ yaagidi qoppiis. SHin Yihoowi hegee a gidennaagaa Sameelawu yootiis. Yihoowi, ‘Taani issi urawu wozanan deꞌiyaabaa xeellaysippe attin, meraa xeellikke’ yaagiis.

Isseyi hara usuppun attuma naata Sameelakko ehiis. SHin Sameeli, ‘Yihoowi etappe oonanne dooribeenna. Neeyyo hara attuma naati deꞌiyoonaa?’ yaagiis. Isseyi, ‘Daawita giyo, ubbaappe kaalo naꞌay tawu deꞌees. I ta dorssata heemmees’ yaagiis. Daawiti soo yin, Yihoowi Sameela, ‘Hagee a!’ yaagiis. Sameeli Daawita huuphiyan zaytiyaa tigidi, i sinttappe Israaꞌeela kawo gidanaadan tiyiis.

Guutta wodiyaappe guyyiyan, Israaꞌeelati Pilisxxeematuura olettidosona, he wode wolqqaama olanchay Gooliyaadi Pilisxxeematuyyo olettees. Galla galla Gooliyaadi Israaꞌeelata baceessees. I hagaadan giis: ‘Tanaara olettanawu issi uraa taakko kiittite. I xoonikko, nuuni intte ashkkarata gidana. SHin taani xoonikko, intte nu ashkkarata gidana.’

Wotaaddara gidida ba ishanttussi qumaa ekkidi Israaꞌeela olanchati dunkkaanidosaa Daawiti biis. I Gooliyaadi giyoobaa siyidi, ‘Taani aara olettana!’ yaagiis. Kawuwaa Saaꞌooli, ‘Neeni guutta naꞌa’ yaagiis. Daawiti zaaridi, ‘Yihoowi tana maaddana’ yaagiis.

Saaꞌooli ba olaa miishshaa Daawita oyttanawu maliis; shin Daawiti, ‘Taani ha olaa miishshan olettana danddayikke’ yaagiis. Daawiti ba yambbarshshaa oyqqidi shaafaa biis. I ichashu muyla shuchaa ekkidi qarcciitan yeggiis. Yaatidi Daawiti Gooliyaadakko woxxiiddi biis. Gooliyaadi, ‘Guutta naꞌawu, haaya. Saluwaa kafotinne doꞌati nena maanaadan taani oottana’ yaagiis. Daawiti yayyibeenna. I zaaridi hagaadan giis: ‘Neeni bisuwaanne tooraa oyqqada yaasa; shin taani Yihoowa sunttan yays. Neeni olaa olettiyoy nunaara gidenna; neeni Xoossaara olettaasa. Hagan deꞌiya ubbay Yihoowi bisuwaappe woy tooraappe keehi wolqqaama gidiyoogaa beꞌana. I inttena ubbaa nu kushiyan aatti immana.’

Daawiti ba qarcciitaa giddoppe shuchaa yambbarshshan wottidi bawu deꞌiya wolqqa ubban yambbariis. Yihoowi maaddin, yeddido shuchay Gooliyaada somꞌꞌo giddo geliis. Ha wolqqaamay biittan kunddidi hayqqiis. Yaatin Pilisxxeema asati bantta shemppuwawu baqatidosona. Daawitaagaadan, neeni Yihoowan ammanettay?