Daawitanne Gooliyaada

ILISXXEEMATI zaarettidikka Israaꞌeeletuura olettanau yiidosona. He wodiyan Daawita bayra ishanttuppe heezzati Saaꞌoola olanchchata gididosona. Yaatiyo gishshau, Isseyi issi gallassi Daawita: ‘Tiyaappenne oyttaa komppuwaappe amaridagaa ekkada ne ishanttussi efa. Eti waani deꞌiyaakkonne beꞌa’ yaagiis.

Daawiti olanchchati shiiqidosaa gakkidi, ba ishantta koyanau olaa salppiyaa sohuwaa woxxidi biis. Pilisxxeema biitta wogga adussa bitanee Gooliyaadi Israaꞌeeleta naassanau kiyiis. I maalladonne omarssi, 40u gallassa ubban hegaadan oottiis. I qaalaa xoqqissidi: ‘Tanaara olettiya issi asa intte giddoppe doorite. I tana xoonidi worikko nuuni intte ashkkara gidana shin, taani a xoonada worikko intte nu ashkkara gidana. Intte tanaara olettiya issi ura dooranadan ta inttena naassayis’ yaagiis.

Daawiti wotaaddaratuppe amaridaageeta: ‘Ha Pilisxxeemiyaa woridi, ha yeellaa Israaꞌeelappe qucciya uraassi aybi oosettanee?’ yaagidi oychchiis.

Wotaaddaray: ‘He urau Saaꞌooli daro aquwaa immana; qassi ba naꞌiyokka assi immana’ yaagiis.

SHin Israaꞌeeleti ubbay Gooliyaadi wogga adussa asa gidiyo gishshau, assi yayyidosona. Ayyo geesay 6n wara (heezzu mitire) gidiyaagaa, qassi issi wotaaddaray assi gonddaliyaa tookkees.

Amarida wotaaddarati Kawuwaa Saaꞌoolakko biidi, Daawiti Gooliyaadaara olettana koyiyoogaa yootidosona. SHin Saaꞌooli Daawitassi: ‘Ha Pilisxxeemiyaara neeni olettana danddayakka. Neeni guutta naꞌa; shin i ba deꞌo laytta ubban wotaaddara gididi ­deꞌiis’ yaagiis. Daawiti zaaridi: ‘Taani ta aawaa dorssata oyqqidi efiya gaammuwaanne beere giyo doꞌaa woraas. Ha Pilisxxeemeekka etappe issuwaadan hanana. Yihooway tana maaddana’ yaagiis. Yaatiyo gishshau Saa⁠ꞌooli: ‘Ba Yihooway nenaara gido’ yaagiis.

Daawiti shaafaa wodhdhidi ichchashu muyla shuchchata ekkidi, ba qarcciitan yeggiis. Hegaappe, ba yambbarshshaa ekkidi, he wogga adussa bitaniyaara gayttanau biis. Gooliyaadi a beꞌido wode, keehippe kariis. Daawita woranaagee a aynne metennabadan qoppiis.

Gooliyaadi: ‘Ane haa shiiqa; taani ne ashuwaa saluwaa kafoynne doꞌay maanaadan oottana’ yaagiis. SHin Daawiti: ‘Neeni bisuwaa, tooraanne xinqqaa oyqqada taakko yaasa, shin taani Yihoowa sunttan neekko yayis. Hachchi Yihooway nena ta kushiyan aatti immana; yaatin taani nena worana’ yaagiis.

Hegaappe Daawiti Gooliyaadakko woxxidi biis. Issi shuchchaa qarcciitaappe ekkidi, yambbarshshan wottidi, bau deꞌiya wolqqa ubban oliis. SHuchchay sitti gi biidi Gooliyaada somꞌꞌuwaa caddin, i kunddidi hayqqi bayiis! Pilisxxeemati olan erettida eta bitanee kunddidoogaa beꞌidi, ubbay guyye simmidi woxxidosona. Israaꞌeeleti eta geeduwaa woxxi yedettidi olan xoonidosona.