Solomoni Beeta Maqidasiyaa Keexxiis

AAWITI hayqqanaappe kase, Yihoowa beeta maqidasiyaa keexxiyo maaraa, Xoossay ayyo bessidoogaadan Solomonassi bessiis. Ba oyddantta haaro layttan, Solomoni beeta maqidasiyaa keexxiyoogaa doommiis; a keexxi polanau laappun layttanne baggaa ekkiis. Daro tammu shaꞌan qoodettiyaa asay beeta maqidasiyaa keexxiis; keettaykka keehippe daro miishshaa wurssiis. Hegaadan hanidoy, he oosuwaayyo keehippe daro worqqaanne biraa goꞌettido gishshataassa.

Gayttiyo dunkkaaniyan deꞌiyaagaadan, Beeta Maqidesiyau naaꞌꞌu waanna kifileti deꞌoosona. SHin ha kifileti gayttiyo dunkkaaniyau deꞌiya kifiletuppe naaꞌꞌu kushe aakkoosona. Solomoni maachchaa taabootaa beeta maqidasiyan deꞌiya giddo kifiliyan asay wottanaadan oottiis; qassi gayttiyo dunkkaaniyan deꞌiya harabata hinkko kifiliyan wottanaadan oottiis.

Beeta maqidasee keexetti wurido wode, wolqqaama baalay giigiis. Misiliyan neeni beꞌana danddayiyoogaadan, Solomoni beeta maqidasiyaa sinttan gulbbatidi woossiis. Solomoni Yihoowassi: ‘Salo ubbay neeyyo gidana danddayenna. Yaatin ha beeta maqidasee neessi ay keena guuxxanddeeshsha! SHin, Abeet ta Xoossau, ne asay ha sohuwakko simmidi woossiyo woosaa hayyanaa siya’ yaagiis.

Solomoni woosaa wurssido wode, tamay saluwaappe wodhdhiis. SHiiqida mehiyaa yarshshuwaa he tamay xuuggi bayiis. Yihoowa pooꞌoy beeta maqidasiyaa kumi bayiis. Hegee Yihooway beeta maqidasiyaaninne Solomona woosan ufayttidoogaa bessees. Gayttiyo dunkkaanee attin, haꞌꞌi beeta maqidasee asay goynnanau yiyo soho gidiis.

Solomoni adussa wodiyau aadhdhida eratettan haariis; asaykka ufayttiis. SHin Solomoni Yihoowayyo goynnenna daro maccaasaa hara biittappe ekkiis. Etappe issinniyaa eeqau yarshshiyaaro beꞌay? Wurssettan Solomonakka a machchoti hara xoossatuyyo goynnanaadan oottidosona. Solomoni hegaadan oottin aybi hanidaakko eray? I asaa kehatettan oyqqiyoogaa aggi bayiis. I meqetti baynna asa gidin asaykka ufayssa xayiis.

Hegee, Yihooway Solomona bolli yiillotanaadan oottin, i Solomona: ‘Taani kawotettaa neeppe ekkada hara bitaniyau immana. Taani hegaa ne wodiyan gidennan ne naꞌay haariyo wodiyan oottana. SHin taani kawotettan deꞌiya asaa ne naꞌaappe wurssa ekkikke’ yaagiis. Hegee waanidi hanidaakko ane beꞌoos.