Xoossay Gannatiyaa Ehaanau Qaalaa Geliis

AGEE gannatiyaa misiliyaa; Xoossay hananabaa yootiya Isiyaasassi geella hagaa milatiyaagaa bessennan aggenna. Isiyaasi deꞌidoy Yoonaasi deꞌido wodiyaappe guuttaa takkiina.

Gannatee “ataakiltte sohuwaa” yaagiyoogaa. Hagee nuuni ha maxaafan beꞌidi aadhdhido issibaa neeni hassayanaadan oottidee? Xoossaa Yihooway Addaameyyonne Hewaaniyyo giigissido loꞌꞌo ataakiltte sohuwaa milatees; milatennee? SHin kumetta saꞌay gannate gidana wodee deꞌii?

Xoossaa asaassi sinttappe yaana ooratta gannatiyaabaa xaafanaadan, Yihooway hananabaa yootiya Isiyaasassi yootiis. I hagaadan yaagiis: ‘Wanggireelloy dorssa maraara issippe saruwan deꞌana. Gaammuwaa maraynne miizzaa maray issippe maana; etakka guutta naꞌay heemmana. Xammiya naꞌay woriya shooshshaa matan kaaꞌiyaakkokka qohettenna’ yaagiis.

Daroti: ‘Hagee mule hanana danddayenna. Saꞌan metoy xayi erenna; sinttanaukka xayenna’ yaagana danddayoosona. SHin ane issibaa qoppa: Xoossay Addaameenne Hewaana deꞌanaadan etau ay mala sohuwaa immidee?

Xoossay Addaamanne Hewaano gannatiyan wottiis. Eti bantta deꞌiyo loꞌꞌiya sohuwaa digettidoy, ceeggidoynne hayqqidoy, Xoossaayyo azazettibeenna gishshataassa. Xoossay bana siiqiya asaassi Addaameppenne Hewaanippe halidabata immanau qaalaa geliis.

Sinttappe yaana ooratta gannatiyan qohuwaanne bashshaa kaalettiya aybinne deꞌenna. Yan kumetta sarotettay deꞌana. Ubba asay payyatettaaninne ufayssan deꞌana. He gannatee Xoossay koyro doomettan qoppidoogaa mala gidana. SHin Xoossay hegaa waati polanaakko, deꞌishiiddi tamaarana.