Xoossaa Asay Baabilooneppe Kiyiis

BAABILOONEE Meedoonatuuninne Parssetun oyqettoosappe naaꞌꞌu laytta gidiyaagee aadhdhiis. Haꞌꞌi aybi hanettiiddi deꞌiyaakko beꞌa! Ee; Israaꞌeeleti Baabilooneppe kiyidi biiddi deꞌoosona. Eti waanidi laꞌa kiyidonaa? Eti baanadan oottiday oonee?

Hegaa oottiday, Parsse kawuwaa, Qiiroosa. Qiiroosi yelettanaappe daro wodiyaa kasetidi, Yihooway hananabaa yootiya Isiyaasi: ‘Neeni oottanaadan ta koyiyoobaa ne oottana. Katamaa oyqqanaadan a penggee neessi dooyetti uttana’ yaagidi Qiiroosabaa xaafanaadan oottiis. Baabiloone katamaa oyqqiyoogan Qiiroosi sintta xeera gidiis. Meedoonatinne Parsseti qamman, dooya deꞌiya penggetuura katamaa gelidosona.

SHin Yihooway kiittin hananabaa yootiya Isiyaasi, Qiiroosi Yerusalaameenne beeta maqidasee zaarettidi keexettanaadan azazanaagaakka yootiis. Qiiroosi hegaadan azazidee? Ee, azaziis. Qiiroosi Israaꞌeeletuyyo giidoy hagaadana: ‘Haꞌꞌi Yerusalaame biite; biidi intte Xoossaa, Yihoowa beeta maqidasiyaa keexxite.’ Ha Israaꞌeeletikka biiddi de⁠ꞌiyoy hegaa oottanaassa.

SHin Baabiloonen deꞌiya Israa⁠ꞌeeletuppe guyye Yerusalaame adussa ogiyaa baanau danddayiyaageeti ubbata gidokkona. Hegee 800u kilo mitire gidiya keehippe adussa oge; qassi daroti keehi cimido woy keehi harggiyo gishshau, hegaa hemettanau danddayokkona. Amarida asati bibeenna hara gaasotikka deꞌoosona. SHin beennaageetuyyo Qiiroosi: ‘Yerusalaamenne a beeta maqidasiyaa keexxanau simmi biyageetuyyo biraa, worqqaanne hara imotaakka immite’ yaagiis.

Yaatiyo gishshau, simmidi Yerusalaame biiddi deꞌiya ha Israaꞌeeletussi, daro imotay imettiis. Qiiroosi, Kawuwaa Naabukadanaxoori Yerusalaame xayssiyo wode, Yihoowa beeta maqidasiyaappe ehiido saynetanne wanccatakka etassi immiis. Asay simmidi biiddi, tookkidi efiyo darobay deꞌees.

Israaꞌeeleti oyddu agina gidiyaagaa hemettoogaappe guyyiyan, Yerusalaame gakkana bessiya wodiyan gakkidosona. Katamay xayoosappe likke 70u laytta; hegaa gishshau, biittay ayba asinne baynna bayssa gididi ­deꞌiis. SHin Israaꞌeeleti haꞌꞌi bantta biitti simmidaba gidikkonne, kaallidi tamaaranaagaadan eta metiyaabay gakkana dees.