Xoossaa Maaduwan Ammanettiyoogaa

BAABILOONEPPE Yerusalaame adussa ogiyaa yiida asay daro shaꞌan qoodettiyaagaa. SHin eti yaa gakkiyo wode, Yerusalaamee keehippe bayi uttiis. Yan ayba asinne deꞌenna. Israaꞌeeleti ubbabaakka wotti yeggidi oottana bessees.

Eti kaseti oottidobaappe issoy yarshshiyoosaa. Ha sohoy eti mehiyaa yarshshuwaa woykko imotaa Yihoowassi shiishshiyoosaa. Guutta aginappe guyyiyan Israaꞌeeleti beeta maqidasiyaa keexxiyoogaa doommidosona. SHin mata biittan deꞌiya morkketi, Israaꞌeeleti beeta maqidasiyaa keexxiyoogaa koyibookkona. Yaatiyo gishshau, eta yashissidi, esissanau malidosona. Wurssettan, he morkketi Parsse ooratta Kawoy, keexxiyo oosuwaa diggiya higgiyaa kessanaadan oottidosona.

Daro layttay aadhdhiis. Israaꞌeeleti Baabilooneppe simmoosappe haꞌꞌi 17n laytta gidiis. Yihooway, asay zaarettidi keexxiyoogaa doommanaadan yootana mala hananabaa yootiya Hagganne Zakkaariyaasa kiittiis. Asay Xoossaa maaduwan ammanettidi, hananabaa yootiyaageetussi azazettidosona. Eti keexxennaadan diggiya higgee kiyidabaa gidikkonne, zaarettidi keexxiyoogaa doommidosona.

Yaatiyo gishshau, Parsse biittaa sunttatuppe Tattanaaya geetettiyaagee yiidi, beeta maqidasiyaa keexxanau etau ayba maati deꞌiyaakko Israaꞌeeleta oychchiis. Israaꞌeeleti Baabiloonen deꞌiyo wode, Kawuwaa Qiiroosi etassi: ‘Yerusalaame biite; biidi, intte Xoossaa Yihoowa beeta maqidasiyaa keexxite’ giidoogaa ayyo yootidosona.

Tattanaayi, he wode paxa deꞌenna Qiiroosi, hegaadan tumukka giidaakkonne eranau dabddaabbiyaa Baabiloone biitti kiittiis. Takkennan Parsse ooratta kawuwaappe xaafettida dabddaabbee yiis. Qiiroosi tumukka hegaadan giidoogaa he dabddaabbee yootees. Yaatiyo gishshau kawoy: ‘Israaꞌeeleti bantta Xoossaa beeta maqidasiyaa keexxona. Neenikka eta maaddanaadan taani azazayis’ yaagidi xaafiis. Oyddu laytta gidiyaagaappe guyiyan beeta maqidasee keexetti wurin, Israaꞌeeleti keehippe ufayttidosona.

Keehi daro layttay aadhdhiis. Beeta maqidasee keexetti wuroosappe haꞌꞌi 48n laytta gidana. Yerusalaamen deꞌiya asay hiyyeesa; qassi katamaynne Xoossaa beeta maqidaseekka keehippe loꞌꞌenna. Baabiloonen deꞌiya Israaꞌeele biittaa asa gidida Iziri, Xoossaa beeta maqidasiyaa giigissana koshshiyoogaa eriis. Hegaa gishshau, i ay oottidaakko eray?

Iziri Parsse kawuwaa Arxxekssiisakko bin, he loꞌꞌo kawoy Yerusalaame i ekkidi efiyo daro imotaa Izirassi immiis. Iziri Baabiloonen deꞌiya Israaꞌeeleta, he imotata Yerusalaamee tookkidi efiyoogan bana maaddana mala oychchiis. Baanau eeno giida asati 6,000 gidiyaageeta. Eti tookki efaana daro biraynne worqqay qassi hara daro alꞌꞌo miishshati deꞌoosona.

Eti biyo ogiyan iita asati deꞌiyo gishshau, Iziri hirggiis. He asati geella eta worqqaanne biraa ekkidi etakka worana danddayoosona. Hegaa gishshau, neeni ha misiliyan beꞌiyoogaadan, Iziri asaa issippe shiishshiis. Hegaappe eti simmidi Yerusalaame he adussa ogiyaa biishin, eta naaganaadan Yihoowakko woossidosona.

Yihoowaykka eta naagiis. Yaatin oyddu aginaa hemettidoogaappe guyyiyan, eti saruwan Yerusalaame gakkidosona. Yihooway maaduwaa demmanau banan ammanettiyaageeta naagana danddyiyoogaa hagee bessenee?