Yesuusi Mehee Aqiyoosan Yelettiis

HA GUUTTA naꞌay oonakko eray? Ee, i Yesuusa. I mehee aqiyosan biron yeletti simmees. Mehee aqiyoosay mehe xalaalaassi giigida sohuwaa. Mayraama haretussinne hara mehetussi miyoobaa wottiyo qoriyaa giddon Yesuusa zinꞌꞌissaasu. SHin Mayraamanne Yooseefi mehee aqiyo ha sohuwaa ayssi yiidonaa? Hagee naꞌa yeliyoosa gedenna; gidiiyye?

CHii, gidenna. Eti hagau yaana danddayidoy, Roome biittaa haariya, Augisxxoos Qeesaari, asa ubbay ba yelettido katamaa biidi mazggafan xaafettana mala azazido gishshataassa. Yooseefi hagan Beetaliheemen yelettiis. SHin inne Mayraama yaa gakkiyo wode, etau shemppanau issi kifileenne beettibeenna. Hegaa gishshau, eti mehee aqiyo ha sohuwaa yaana koshshiis. He gallassi Mayraama Yesuusa yelaasu! SHin neeni beꞌiyoogaadan, i payya deꞌees.

Yesuusa beꞌanau yiiddi deꞌiya dorssa henttanchchata beꞌay? Eti qamman bantta dorssaa naagiiddi dembban de⁠ꞌishin, wolqqaama pooꞌoy eta yuusho ubban poo⁠ꞌiis. Pooꞌissidaagee issi kiitanchchaa! Dorssaa heemmiyaageeti keehippe yayyidosona. SHin kiitanchchay: ‘Yayyoppite! Taani inttessi mishiraachchuwaa yootanau yaas. Hachchi Beetaliheemen, Godaa Kiristtoosi yelettiis. I asaa ashshana! Maayuwan a xaaxidi mehee kattaa miyo qoriyan ziniꞌꞌissidoogaa intte demmana’ yaagiis. Qoppennan daro kiitanchchati yiidi, Xoossaa galatiyoogaa doommidosona. Hegaa gishshau, dorssaa heemmiya ha asati sohuwaara Yesuusa beꞌanau eesoti biidosona; yaatidi haꞌꞌi a demmidosona.

Yesuusi keehi dumma asa gididoy aybissakko eray? I tumuppe oonakko eray? Ha maxaafan deꞌiya koyro taarikiyan Xoossaayyo bayra Naꞌaabaa tamaaridoogaa hassaya. He Naꞌay Yihooway salota, saꞌaanne hara ubbabaa medhdhiyo wode, aara issippe oottiis. Yesuusi hegaa!

Ee, Yihooway ba Naꞌaa deꞌuwaa saluwaappe ehiidi, Mayraami ulo giddon wottiis. Hara naati bantta aayee uluwan dicciyoogaadan, sohuwaara i uluwankka naꞌi dicciyoogaa doommiis. SHin he naꞌay Xoossaa Naꞌa. Wurssettan Yesuusi Beetaliheemen, mehee aqiyo ha sohuwan yelettiis. Kiitanchchati Yesuusi yelettidoogaa asau yootana danddayidoogan hegaa keena ayssi ufayttidaakko haꞌꞌi akeekadii?