Kiitanchati Yesuusi Yelettidoogaa Odidosona

Roome Biittaa Kawoy Awugisxxoos Qeesaari Ayhuda asa ubbay bantta yelettido katamaa biidi xaafettana mala azaziis. Hegaa gishshawu, Yooseefinne Mayraama Yooseefantta soo asay yiido Beetaliheeme giyo katamaa biidosona. He wode Mayraama naꞌa yeliyo wodee matiis.

Eti Beetaliheeme gakkiyo wode, aqana danddayiyo sohoy mehee aqiyoosaa xalla. Mayraama ba naꞌaa Yesuusa yelidoy hegaana. A shugo maayuwan naꞌaa xaaxada qoriyan loddan zinꞌꞌissaasu.

Beetaliheeme matan, amarida henttanchati he wode bantta dorssaa wudiyaa heemmiiddi qammi karen aqoosona. Eti akeekennan, issi kiitanchay eta sinttan eqqin, eta yuushuwan Yihoowa bonchuwaa pooꞌoy pooꞌiis. Henttanchati yayyido gishshawu kiitanchay hagaadan giis: ‘Yayyoppite. Taani ufayssiyaabaa odanawu yaas. Hachi Beetaliheemen Masee yelettiis.’ He wode sohuwaara, saluwan daro kiitanchchati beettidi, ‘Saluwan deꞌiya Xoossaassi bonchoy gido. Saꞌan sarotettay gido’ yaagidosona. Hegaappe guyyiyan, kiitanchati biidosona. Henttanchati waatidonaa?

Heemmiyaageeti issoy issuwawu, ‘Ane haꞌꞌi sohuwaara Beetaliheeme boos’ yaagidosona. Eti eesuwan biidi, Mayraamanne Yooseefi bantta gacino naꞌaara mehee aqiyoosan deꞌiyaageetuura gayttidosona.

Kiitanchay henttanchatussi odidobaa siyida ubbay maalaalettiis. Mayraama kiitanchati yootidobaa loytta qoppido gishshawu, hegaa mule dogabeykku. Henttanchati beꞌidonne siyido ubbabawu Yihoowa galatiiddi, bantta wudiyaakko guyye biidosona.