Pooqiyan Deꞌiya Kifiliyan

NAAꞌꞌU gallassay aadhdhi simmin, haꞌꞌi saꞌay Hamuusa qamma. Yesuusinne 12u i kiittidoogeeti Paasikaa kahuwaa maanau pooqiyaa bollan deꞌiya he aaho kifiliyaa yiidosona. Kiyidi biya ha ne beꞌiyo bitanee Asqqorootu Yihudaa. I qeeseti Yesuusa waati oyqqanau danddayiyaakko, yootanau bees.

Issi gallassappe kase, Yihuday etakko biidi: ‘Intte Yesuusa oyqqanaadan taani maaddikko, tau ay immuuteetii?’ yaagidi oychchiis. Eti: ‘Hasttamu biraa immana’ yaagidosona. Hegaa gishshau, Yihuday eta kaalettidi Yesuusakko ehaanau, he asatukko biiddi deꞌees. Hegee keehi iita ooso gidennee?

Paasikay bonchcheti polettiis. SHin haꞌꞌi Yesuusi hara dumma kahuwaa miziyoogaa doommiis. I ba kiittidoogeetussi oyttaa immidi: ‘Hagaa miite; ayssi giikko, hagee taani inttessi immana ta ashuwaa’ yaagiis. Hegaappe burccukkuwan woyne eessaa immidi: ‘Hagaa uyite; ayssi giikko, hagee inttessi gukkanau deꞌiya ta suuttaa’ yaagiis. Geeshsha Maxaafan hegee ‘Godaa kahuwaa’ geetetti xeegetees.

Israaꞌeeleti Paasikaa miyoy, eti Gibxxen deꞌiyo wode, Xoossaa kiitanchchay eta keettaa ‘aggi aadhdhidi’ Gibxxetu son deꞌiya bayra ubbaa woridoogaa hassayanaassa. SHin haꞌꞌi Yesuusi bana kaalliyaageeti anne a hayquwaabaa hassayanaadan koyiis. Layttan layttan he dumma baalaa eti bonchchanaadan i yootidoy hegaassa.

Godaa Kahuwaa moogaappe guyyiyan, Yesuusi ba kiittidoogeetussi ammanuwan minnanaadaaninne xala gidanaadan yootiis. Wurssettan, eti Xoossaa mazamuriyan sabbi simmidi biidosona. He wode, saꞌay qamma bilahe heera gidennan aggenna. Eti awa biidaakko ane beꞌoos.