Yesuusawu Wurssetta Kahuwaa

Niisaana giyo aginan 14tta gallassan Ayhudati layttan layttan Paasikaa Baalaa bonchoosona. Hagee Yihoowi eta Gibxxe aylletettaappe kessidi Hidootaa Biittaa waati gelissidaakko hassayissiis. Yesuusinne i kiittidoogeeti 33 M.Ln, Paasikaa Baalaa Yerusalaamen deꞌiya issi pooqiyan bonchidosona. Kahuwaa miidoogaappe guyye baggan, Yesuusi, ‘Intteppe issoy tana aattidi immana’ yaagiis. Kiitettidaageeti dagammidi Yesuusa, ‘I oonee?’ yaagidi oychidosona. Yesuusi, ‘Taani oyttaa immiyo bitanee a’ yaagiis. Hegaappe simmin i Yihudaa Asqqorootuyyo oyttaa immiis. Yihuday denddidi sohuwaara kare kiyiis.

Hegaappe simmin Yesuusi woossidi oyttaa menttiis; menttidi i kiittido haratuyyo immiis. I, ‘Ha oyttaa miite. Hagee taani intteyyo immana ta ashuwaa leemiso’ yaagiis. Kaallidi i woyniyawu woossiis; yaatidi hegaa kiitettidaageetuyyo immiis. I hagaadan giis, ‘Ha woyniyaa uyite. Hagee nagaray atto geetettanaadan taani immana ta suuttaa leemiso. Intte tanaara saluwan kawo gidana mala taani inttessi qaalaa gelays. Hegan tana layttan layttan hassayite.’ Yesuusa kaalliyaageeti hanno gakkanaassi layttan layttan he galla omarssi issippe shiiqoosona. He shiiqoy haꞌꞌi Godaa Kahuwaa geetettees.

Kahuwaappe simmin, kiitettidaageeti issoy issuwaappe ooni aadhiyaakko palamettidosona. SHin Yesuusi etayyo hagaadan giis: ‘Intte ubbaappe guuxxiyaabadan bana xeelliya uri intteppe gitatiyaagaa gidana.

‘Intte ta laggeta. Ta Aaway intteyyo odanaadan koyiyo ubbabaa taani intteyyo yootaas. Taani saluwan deꞌiya ta Aawaakko mata wode baana. Intte hagan takkana; qassi intte issoy issuwaa siiqiyoogan ta erissiyo ashkkarata gidiyoogaa asay erana. Taani inttena siiqidoogaadan, intte issoy issuwaa siiqana bessees.’

Wurssettan, Yesuusi ba erissiyo ashkkarata ubbaa Yihoowi naaganaadan woossiis. Eti sarotettan issippe oottanaadan Yihoowi maaddana mala i oychiis. Yihoowa sunttay geeyanaadan i woossiis. Hegaappe guyyiyan Yesuusinne i kiittidoogeeti mazamuriyan Yihoowa sabbidi kare kiyidosona. Yesuusi oyqettiyo wodee matattiis.