Yesuusi SHaꞌan Qoodettiya Asaa Mizees

Paasikaa Baalaa 32 M.Ln bonchanaappe guuttaa kasetidi, kiitettidaageeti sabbakanawu biidosaappe simmidosona. Eti daafurido gishshawu, shemppanaadan Yesuusi eta Beetasayda giyo katamaa wolwoluwan efiis. SHin wolwoloy haattaa dooni matido wode, Yesuusi shaꞌan qoodettiya asay yan banttana kaalliyoogaa beꞌiis. Yesuusi ba kiittidoogeetu xallaara takkana koyikkokka, i asaa kehatettan mokkiis. I sahettidaageeta pattiis; qassi eta tamaarissiyoogaa doommiis. Gallassa kumettaa, Yesuusi eta Xoossaa Kawotettaabaa tamaarissiis. Saꞌay omariyo wode, Yesuusi kiittidoogeeti akko yiidi, ‘Asay namisettiis. Eti banttawu miyoobaa demmana mala eta yedda’ yaagidosona.

Yesuusi, ‘Eti baana koshshenna. Etawu miyoobaa hagan immite’ yaagiis. Kiitettidaageeti, ‘Nuuni biidi etawu qumaa shammanaadan koyay?’ yaagidi oychidosona. Kiitettidaageetuppe issoy Piliphoosi, ‘Nuuyyo daro miishshay deꞌiyaakkokka, ha daro asawu gidiya oyttaa shammana danddayokko’ yaagiis.

Yesuusi, ‘Nuuyyo ay keena qumay deꞌii?’ yaagidi oychiis. Inddiraasi, ‘Nuuyyo ichashu oyttaynne naaꞌꞌu guutta molee deꞌees. Hagee gidenna’ yaagiis. Yesuusi, ‘He oyttaanne moliyaa tawu haa ekki ehiite’ yaagiis. I ishatamu ishatamu asaynne xeetu xeetu asay citan citan maatan uttanaadan yootiis. Yesuusi oyttaanne moliyaa oyqqidi, saluwaa pude xeellidi woossiis. Yaatidi i kiitettidaageetuyyo qumaa immiis; immin eti hegaa asawu aattidosona. Maccaasaanne naata paydennan, 5,000 attuma asay kallana gakkanaassi miis. Hegaappe simmin, kiitettidaageeti aybinne moorettennaadan asay miishin attida xarzzaa shiishshidosona. Hegee 12 samppaa kumiis! Hagee keehi maalaaliyaaba.

Asay keehi maalaalettidi, Yesuusa bantta kawo oottanawu koyidosona. SHin Yihoowi Yesuusa kawo oottanawu keerido wodee gakkibeennaagaa Yesuusi erees. Hegaa gishshawu, i asaa yeddidi, kiitettidaageeti Galiila Abbaappe hefintti pinnana mala yootiis. Eti bantta wolwoluwan gelidosona; qassi Yesuusi barkka deriyaa kiyiis. Aybissi? I ba Aawaa woossanawu wodiyaa koyido gishshataassa. Yesuusayyo oosoy darikkonne, i woossanawu muletoo wodiyaa bazzees.