Yesuusa Woridosona

HANIIDDI deꞌiya azzanttiyaabaa beꞌa! Yesuusi hayqqana hanees. Eti a mittan kaqqidosona. A kushiyaanne tohuwaa misimaariyan xishidosona. Oonakka gidin Yesuusa bolli hegaa malabaa oottanau ayssi koyii?

Amaridaageeti Yesuusa ixxiyo gishshataassa. Eti oonakko eray? Etappe issoy iita kiitanchchaa, Seexaanaa Dablloosa. I Addaameenne Hewaana Yihoowa azazettennaadan oottidaagaa. Yesuusa morkketi hagaa mala iita oosuwaa a bolli gattanaadan oottidaageekka Seexaanaa.

Yesuusi mittaa bolli misimaariyan xishettanaappe kasekka, a morkketi a bolli keehi iitabaa oottidosona. Eti waanidi Geetasamaane ataakiltte sohuwaa biidi, a yaappe ehiidaakko hassayay? He morkketi oonee? Ee, eti haymaanootiyaa kaalettiyaageeta. Hegaappe kaallidi aybi hanidaakko ane beꞌoos.

Haymaanootiyaa kaalettiyaageeti Yesuusa oyqqidi efiyo wode, i kiittidoogeeti baqatidosona. Eti yayyido gishshau, Yesuusa a morkketuura yeggidi bi aggidosona. SHin Yesuusi kiittido Yohaannisinne PHeexiroosi, daro haakkidi bibookkona. Eti Yesuusa bolli aybi gakkiyaakko beꞌanau kaallidosona.

Qeeseti Yesuusa kase qeese halaqa gidida, cima bitaniyaa Haannakko efiidosona. Asay he sohuwan daro gamꞌꞌibeenna. Hegaappe simmin, eti Yesuusa he wode qeese ubbatu halaqa gidida Qayaafa soo efiidosona. A son haymaanootiyaa kaalettiya daro asati shiiqidosona.

Hagan Qayaafason eti Yesuusa shilootaa sintti shiishshidosona. Yesuusa bolli wordduwan markkattiyaageeta ehiidosona. Haymaanootiyaa kaalettiyaageeti ubbay: ‘Yesuusi hayqqana bessees’ yaagidosona. Yaatidi a somꞌꞌuwan cuchchidosonanne a bubbuxidosona.

He ubbabay hanettiyo wode, PHeexiroosi karen dirssa giddon deꞌees. Qammay keehippe meeggiyo gishshau, asay tamaa eettiis. Eti tamaa matan uttidi hoꞌꞌishin, issi ashkkariyaa PHeexiroosa xeellada: ‘Ha bitaneekka Yesuusaara deꞌiyaagaa’ yaagaasu.

PHeexiroosi: ‘CHii! taani gidikke!’ yaagiis.

Asati PHeexiroosassi, i Yesuusaara deꞌiyaageetuppe issuwaa gidiyoogaa heezzutoo yootidosona. SHin he ubbankka, PHeexiroosi hegee tuma gidennaagaa yootiis. PHeexiroosi hezzanttuwaa hegaadan giyo wode, Yesuusi guyye simmidi a xeelliis. PHeexiroosi worddotido gishshau, keehippe azzanidi, kare kiyidi yeekkiis.

Arbba gallassi guuran away kiyiyoogaa doommin, qeeseti Yesuusa bantta shiiqiyo aaho Sanihediriine adaraashshaa ekkidi biidosona. A bolli ay oottanaakko he sohuwan zorettidosona. Hegaappe a Yihuda auraajjaa haariya, PHenxxeniyaa PHilaaxoosakko efiidosona.

Qeeseti PHilaaxoosassi: ‘Hagee iita asa. I hayqqana bessees’ yaagidosona. PHilaaxoosi Yesuusa oyshata oychchoogaappe guyyiyan: ‘Taani aani ay balanne demmabeykke’ yaagiis. Hegaappe PHilaaxoosi Yesuusa Anttiphaasa Heeroodisakko yeddiis. Heeroodisi Galiila biittaa haarees, shin he wode Yerusalaamen deꞌees. Heeroodisikka Yesuusi oottido bali aybbakko demmibeenna gishshau, zaaridi PHilaaxoosakko yeddiis.

PHilaaxoosi Yesuusa birshshi yeddanau koyiis. SHin Yesuusa morkketi appe hara qashuwan deꞌiya bitanee birshshettanaadan koyidosona. He bitanee bonqqiya Barbbaana. PHilaaxoosi Yesuusa kare kessiyo wode saꞌay gallassaappe 6n saate heera. I asaassi: ‘Hagaa beꞌite! Intte kawuwaa!’ yaagiis. SHin qeesetu halaqati bantta qaalaa xoqqu oottidi: ‘A digga! A wora! A wora!’ yaagidosona. Yaatiyo gishshau, PHilaaxoosi Barbbaana birshshi yeddin, eti Yesuusa woranau ekki efiidosona.

Arbba gallassi saateppe guyyiyan Yesuusi mittaa bolli misimaariyan xishettiis. Ha misiliyan beettokkonappe attin, iitabaa oottida naaꞌꞌu asatikka hayqqanaadan Yesuusayyo naaꞌꞌu miyyessan mittan kaqettidosona. Yesuusi hayqqanaappe guuttaa kasetidi, kaqettidaageetuppe issoy a: ‘Ne kawotettan neeni yiyo wode tana hassaya’ yaagiis. Yesuusikka: ‘Neeni tanaara Gannatiyan deꞌanaagau qaalaa gelayis’ yaagiis.

Hegee ufayssiya hidoota gidennee? Yesuusi yootiyo gannatee augaakko eray? Xoossay koyro gannatiyaa giigissidoy awaanee? Ee, saꞌaana. Yesuusi saluwan kawo gididi haariyo wode, he bitaniyaa hayquwaappe denttidi, saꞌan deꞌiya ooratta Gannatiyan deꞌuwan ufayttanaadan oottana. Hegee nuuna ufayssennee?