Yesuusi Golggottan Hayqqees

Qeese halaqati Yesuusa deriyaa haariyaagaa kawo keetti efiidosona. PHilaaxoosi eta, ‘Ha bitaniyaa intte mootiyoy aybee?’ yaagidi oychiis. Eti, ‘I bana kawo gees!’ yaagidosona. PHilaaxoosi Yesuusa, “Neeni Aihudatu kawoo?” yaagidi oychiis. Yesuusi, “Ta kawotettai ha sa7aana gidenna” yaagidi zaariis.

Hegaappe guyyiyan, PHilaaxoosi Yesuusa mootiyoobi deꞌanaakkonne giidi Galiila haariya, Heeroodisakko a yeddiis. Heeroodisi Yesuusa bolli aynne balabaa demmibeenna gishshawu, a PHilaaxoosakko zaaridi yeddiis. He wode PHilaaxoosi asaayyo hagaadan giis: ‘Heeroodisikka taanikka ha bitaniyaa bolli aynne balabaa demmibookko. Taani a birshshana.’ Asay ba qaalaa xoqqu oottidi, ‘A wora! A wora!’ yaagiis. Wotaaddarati Yesuusa lissuwan garafidosona, a bolli cuchidosona, qassi a shocidosona. Eti agunttaa akiliiliyaa a huuphiyan wottidosona; yaatidi, ‘Ayhudatu Kawuwawu saro peꞌa’ yaagidi qilliiccidosona. PHilaaxoosi haranttuwaa asaayyo, ‘Taani ha bitaniyaa bolli aynne balabaa demmabeykke’ yaagiis. SHin eti qaalaa xoqqu oottidi, ‘Mittaa bolli misimaariyan xishettidi i kaqetto’ yaagidosona. Yaatiyo gishshawu, a woranaadan PHilaaxoosi aatti immiis.

Eti Yesuusa Golggottaa giyo sohuwaa efiidi, mittaa bolli misimaariyan xishidi, he mittaa sitti oottidi essidosona. Yesuusi, ‘Ta Aawawu, eti bantta oottiyoogaa erenna gishshawu, eta nagaraa atto ga’ giidi woossiis. Asay ‘Neeni Xoossaa Naꞌa gidikko, ane mittaa bollappe wodha. Nena ashsha’ yaagidi, Yesuusa bolli qilliicciis.

Iitabaa oottidi a matan kaqettida asatuppe issoy, “Neeni ne kawotettaa wolqqan yiyo wode, tana dogoppa” yaagiis. Yesuusi ayyo, “Neeni tanaara gannatiyan de7ana” yaagidi qaalaa geliis. Saateppe guyyiyan, biitta ubbay heezzu saatiyawu xumiis. Yesuusa aayyiyo Mayraamo gujjin, erissiyo ashkkaratuppe amaridaageeti Yesuusi kaqettido mittaa matan eqqidosona. Yohaannisi Mayraamo bawu aayodan xeellidi heemmanaadan Yesuusi yootiis.

Wurssettan, Yesuusi, “Polettiis!” yaagiis. I ba huuphiyaa ziqqi oottidi, hayqqiis. He wode sohuwaara, biittay keehi qaaxxiis. Xoossaa garuwan, Geeshsha Sohuwaa Ubbaappe Aadhida Geeshsha Sohuwaappe shaakkiya magalashoy naaꞌꞌu kiyidi pooshettiis. Issi mato halaqay, “Tumu hagee Xoossaa Na7aa” yaagiis.