Pheexiroosi Qornneliyoosaara Gayttanau Biis

HA EQQIDAAGEE kiitettida PHeexiroosa; a guyyen eqqidaageeti qassi a laggetuppe amaridaageeta. SHin ha bitanee PHeexiroosassi ayssi goynnii? I hegaadan oottana bessii? I oonakko eray?

Bitanee Qornneliyoosa. I Roome wotaaddaratu halaqaa. Qornneliyoosi PHeexiroosa erenna shin, ba soo a shoobbanaadan assi odettiis. Hegee waanidi hanidaakko ane beꞌoos.

Yesuusa kaalliyaageetuppe koyroogeeti Ayhudata shin, Qornneliyoosi Ayhuda gidenna. Gidikkonne, i Xoossaa siiqees, akko woosseesinne i asaassikka daro loꞌꞌobaa oottees. Issi gallassi saateppe guyyiyan issi kiitanchchay akko yiidi: ‘Xoossay nenan ufayttiido gishshau, ne woosaa zaarana hanees. PHeexiroosa giyo issi bitaniyaa ehaanaadan amarida asata kiittaa. I Yoophphen abbaa doonan deꞌiya Simoona son deꞌees’ yaagiis.

Yaagin Qornneliyoosi sohuwaarakka amarida asata PHeexiroosa koyanaadan kiittiis. Wonttetta gallassi, asati Yoophphe katamaa matishin, PHeexiroosi Simoona keettaa bolli dembbayidi oottidosan deꞌees. He sohuwan Xoossay PHeexiroosi saluwaappe wodhdhiya gita afalaa beꞌiyabadan qoppana mala oottiis. Afalaa bolli ubba qommo mehetinne doꞌati deꞌoosona. Xoossaa higgee bessiyoogaadan, he mehetinne doꞌati maanau bessenna tuna shin issi qaalay: ‘PHeexiroosaa dendda. SHukkada ma’ yaagiis.

PHeexiroosi: ‘CHii! Taani tunabaa mulekka ma erikke’ yaagidi zaariis. SHin he qaalay PHeexiroosassi: ‘Xoossay haꞌꞌi geeshsha giyoobaa neeni tuna gooppa!’ yaagiis. Heezzutoo hegaatto haniis. PHeexiroosi hegaa birshshetaabaa qoppishin, Qornneliyoosi kiittido asati soo gakkidi, PHeexiroosi deꞌiyakkonne oychchidosona.

PHeexiroosi duge wodhdhidi: ‘Intte koyiyo bitanee tana. Intte yiidoy aybissee?’ yaagiis. Asati issi kiitanchchay Qornneliyoosi PHeexiroosa ba son shoobbana mala yootidoogaa odin, PHeexiroosi etaara baanau eeno giis. Wonttetta gallassi PHeexiroosinne a laggeti Qornneliyoosaara gayttanau Qiisaariyaa biidosona.

Qornneliyoosi ba dabbotanne ba mata laggeta issippe shiishshiis. PHeexiroosi yin, Qornneliyoosi aara gayttiis. Neeni hagan beꞌiyoogaadan, i PHeexiroosa tohuwan kunddidi goynniis. SHin PHeexiroosi: ‘Dendda; taanikka ta huuphen asa’ yaagiis. Ee, Geeshsha Maaxaafay asassi goynniyoogee likke gidennaagaa bessees. Nuuni goynnana bessiyoy Yihoowa xalaalaassa.

He wode PHeexiroosi shiiqida asaassi sabbakiis. PHeexiroosi: ‘Baassi oottana koyiya asata Xoossay nashshiyoogaa taani haꞌꞌi akeekaas’ yaagiis. I yootiiddi deꞌishin, Xoossay geeshsha ayyaanaa yeddin, asati dumma dumma qaalan haasayiyoogaa doommidosona. PHeexiroosaara yiida Ayhuda gidida erissiyo ashkkarati hegan garamettidosona; ayssi giikko, eti Xoossay nashshiyoy Ayhudatu xalla giidi kase qoppoosona. Yaatiyo gishshau, Xoossay issi zariyaa hara zariyaappe aadhdhiyaabadaaninne baassi keehippe koshshiya zaredan xeellennaagaa hegee eta tamaarissiis. Hegee nuuni ubbay hassayana bessiyo loꞌꞌoba gidenee?