Qornneliyoosi Geeshsha Ayyaanaa Ekkees

Qiisaariyan, Qornneliyoosa giyo Rooma olanchatu mato halaqay deꞌees. I Ayhuda gidana xayikkonne, Ayhudati a bonchoosona. I metootida hiyyeesata kehatettan maaddiis. I Yihoowa ammaniyaanne ubbatoo a woossiya asa. Issi galla, kiitanchay yiidi Qornneliyoosawu hagaadan giis: ‘Xoossay ne woosaa siyiis. PHeexiroosi deꞌiyo Yoophe katamaa asa kiittada, i neekko yaanaadan oycha.’ Tohossa baggan 50 kilo meetire gidiyaasan deꞌiya Yoophe, Qornneliyoosi heezzu asata eesuwan kiittiis.

He wode, PHeexiroosi Yoophen ajjuutaa beꞌiis. I Ayhudati maana bessenna mehenne doꞌa beꞌidi, maanaadan bawu odettishin siyiis. PHeexiroosi, ‘Ta deꞌido wodiyan tuna mehenne doꞌa mule ma erikke’ yaagidi, ixxis giis. Yaatin, ‘Ha mehiyaanne doꞌaa tuna gooppa. Xoossay eta geeshshiis’ giishin siyiis. PHeexiroosi, ‘Heezzu asati ne penggen deꞌoosona. Etaara ba’ giishinkka siyiis. PHeexiroosi pengge biidi asata ehiidabaa eta oychiis. Eti hagaadan giidosona: ‘Rooma olanchatu mato halaqay Qornneliyoosi nuna kiittiis. Neeni Qiisaariyan deꞌiya a soo baana bessees.’ PHeexiroosi asati yan aqanaadan shoobbiis. Wonttetta galla, i Yoopheppe amarida ishantta ekkidi etaara Qiisaariyaa biis.

Wurssettan Qornneliyoosi PHeexiroosa beꞌido wode, gulbbatiis. SHin PHeexiroosi hagaadan giis: ‘Dendda! Taani ne mala asa. Ayhudati Ayhuda gidenna asa soo gelana xayikkonne, Xoossay taani ne soo yaanaadan yootiis. Neeni tana ayssi xeesissidaakko hayyanaa ane yoota.’

Qornneliyoosi PHeexiroosawu hagaadan giis: ‘Taani oyddu gallassappe kase Xoossaa woossishin, nena xeesissanaadan kiitanchay tawu yootiis. Hayyanaa Yihoowa qaalaa nuna tamaarissa.’ PHeexiroosi hagaadan giis: ‘Xoossay somꞌꞌo xeellennaagaa taani akeekaas. Awu goynnana koyiya oonaanikka i ufayttees.’ PHeexiroosi eta Yesuusabaa darobaa tamaarissiis. He wode Qornneliyoosaaninne hegan aara deꞌiyaageetun geeshsha ayyaanay wodhin, eti ubbay haattan muukettidosona.