Saꞌaa Bolli Yaana Ooratta Gannatiyaa

HE ADUSSA mittata, loꞌꞌiya ciishshatanne xoqqa dereta xeella. Ha sohoy loꞌꞌennee? Cofoshoy guutta naꞌaa kushiyaappe waati miyaakko beꞌa. Qassi dembban deꞌiya gaammotanne eqqida parata xeella. Hagaa mala sohuwan deꞌiya keettan deꞌanau koyikkii?

Xoossay neeni saꞌaa bolli gannatiyan merinau deꞌanaadan koyees. Ha wodiyan asaa tuggayiya ayba sahoynne waayee nena gakkanaadan i koyenna. Ooratta gannatiyan deꞌanaageetuyyo Geeshsha Maxaafay gelido qaalay: ‘Xoossay etaara deꞌana. Hagaappe sinttanau hayqoy woy waasoy woy sahoy deꞌenna. Ceegabay xayiis’ yaagiyaagaa.

Yesuusi ha garamissiya laamee yaanaadan oottana. Hegee audekko eray? Ee, i saꞌaa bollappe iitatettaanne iita asa ubbaa xayssi simmiina. Yesuusi saꞌan deꞌiyo wode, asaa ubba qommo harggiyaappe pattoogaanne hayquwaappekka denttoogaa hassaya. Yesuusi hegaa oottidoy, i Xoossaa kawotettaayyo Kawo gidiyo wode saꞌa ubban oottanabaa bessanaassa.

Saꞌan ooratta gannatiyan deꞌoy ayba loꞌꞌanaakko ane qoppa! Yesuusi, ba doorido amaridaageetuura saluwan uttidi haarana. He haariyaageeti saꞌaa bollan deꞌiyaageetussi huuphiyan huuphiyan koshshiyaaba kunttidi, eti ufayttanaadan oottana. Xoossay nuussi ba ooratta gannatiyan merinaa deꞌuwaa immanaagaa ammanettanau, nuuni ay oottana koshshiyaakko ane beꞌoos.