Seexaanaayyo Gidennan, Yihoowaayyo Haggaaza
Nu ubbaayyo issi dooroy deꞌees. Yihoowaayyo haggaazzetees woy ixxikko Seexaanaayyonne daydanttatuyyo haggaazzetees. Naaꞌꞌau oottana danddayokko. Yihoowaayyo haggaazziyoogee ay keena eratetee!
Yihooway Keha Xoossaa
Nu beꞌidoogaadan, daydanttati asaa qohiyoogaaninne balettiyoogan ufayttoosona. Yihooway hegaa mala gidenna. I ba naata siiqiya aawadan asaa naata siiqees. I ‘Loꞌꞌo imo ubbaanne kumetta woito ubbaa’ Immiyaagaa. (Yaaqooba 1:17) A daro waagaa qanxxissiyaaba gidikkokka, asaa naata loꞌꞌoba diggenna.—Efisoona 2:4-7.
Xoossaa naꞌaa Yesuusi, harggidaageeta pattiyoogan etawu deꞌiya siiquwaa bessiis
Saꞌaa bollan, Xoossaa naꞌaa Yesuusan oosettidabata qoppite. Duudeti haasayanaadaaninne qooqidaageeti xeellanaadan oottiis. Inchchirichchay oyqqidoogeetanne wobbiya asaa pattiis. Daydanttata kessiisinne ubba qommo harggiyaa pattiis. Yesuusi Xoossaa wolqqaan, haray atto hayqqidaageetakka denttiis.—Maatiyoosa 9:32-35; 15:30, 31; Luqaasa 7:11-15.
Wordduwa yootiyoogan nuna baleettiyoogaappe, Xoossay ubbato tumaa yootees. I oonanne mule cimmenna.—Qoodaabaa 23:19.
Tuna Gidida Oosuwaappe Haakka
Shararootiya keettay udunxxiya qirphphi ootti oyqqiyoogaadan, miilooniyan qoodettiya asaakka malan ammaniyoogeenne worddoy qachchi oyqqiis. Hayqqida asaa yayoosona. Iita ayyaanata yayoosona. Qanggettaa, malaa, kitaabaanne iita ayyaana wolqqay deꞌees giyoobata yayyoosona. Seexaanaa wordduwan baasettida ammanotuninne meezetun direti uttidosona. Xoossaayyo haggaazziyaageeti hagaa mala ayba oosuwankka oyqetibookkona.
Yihoowassi Seexaanaagaappe keehi daro wolqqay deꞌees. Neeni Yihoowaayyo haggaazziyaaba gidikko, i nena iita ayyaanaappe naagana. (Yaaqooba 4:7) Bitay ne bolli gakkenna. Leemisuwassi, Naayjeeriyan, heezu wolqqaama shareechchoti katamaappe beennan ixxida issi Yihoowa Markka woranau bitaa bitidosona. Bitay a bolli gakkennan ixxini, shareechchotuppe issoy yayyidi, he Markkaakko yiidi i oottidobaa atto gaana mala woossiis.
Efisoona biittaa asay bantta kaayiyo maxaafaa xuuggidosona
Dayddanttati nena wayssikko, Yihoowa suntta xeesana danddayaasa; ikka neena naagana. (Leemiso 18:10) SHin Xoossay nena naaganaadan koyiyaaba gidikko, iita ayyaanatuura gayttiyoogaanne dayddanttatuyyo goynniyoogaara oyqettidabaa muleera agganau koshshees. Beni Efisoonan deꞌiya Xoossau goynniyaageeti hegaato oottidosona. Bantta kayiyo maxaafaa ubbaa shiishshidi xuuggidosona. (Oosuwaa 19:19, 20) Ha wodiyankka Xoossaayyo haggaazziyaageeti hegaato oottana bessees. Kitaabaappe, yeleelluwaappe, iitabaappe “naagoosona” giyoobatuppe, kayiyo maxaafaappenne iita ayyaana oosuwaara oyqettidabaappe nena kessa.
Tumu Goynuwau Bessiyaaba Ootta
Xoossaa ufayssanau koyikko, worddo goynuwaappe haakkiyoogeenne iita oosuwaa aggiyoogaa xalaalay gidenna. Tumu goynuwau bessiyaaba aggennan oottanau bessees. Geeshsha Maxaafay hegau aybi koshshiyaakko yootees:
Kiristtaane shiiquwan beetta.—Ibraawe 10:24, 25
Geeshsha Maxaafaa xannaꞌa.—Yohaannisa 17:3
Haraatussi mishiraachchuwaa yoota.—Maatiyoosa 24:14
Yihoowa woossa.—Piliphphisiyuusa 4:6, 7
Xammaqetta.—Oosuwaa 2:41
Yihoowa Markkatuura Issippetetta Medhdha
Seexaanaasinne daydanttatussi saꞌaa bollan iitabaa tamaarissiyanne oottiyaa asati deꞌoosona. Gidoppe attin Yihoowassikka oottiya asati deꞌoosona. Eti Yihoowa Markkata. (Isiyaasa 43:10) Usuppun miilooniyaappe dariya Markkati saꞌa yuushuwan deꞌoosona. Eti ubbay loꞌꞌobaa oottanau baaxettoosonanne asaa tumaa tamaarisoosona. Daro biittan Kawotettaa Adaraashshan etaara gayttana danddayaasa, eti ufayssan nena mokkana.
Eta oosoy haraati Xoossaayyo haggaazzana mala maaddiyooga. Neeni tumu ogiyan Yihoowassi waatada goynnanaakko erana mala nena eti ne son Geeshsha Maxaafaa xannaꞌissanau koyoosona. Hegaassi miishsha qanxxakka. Markkati asaanne Xoossaa Yihoowa siiqiyo gishshatau ufayttidi tumaa tamaarisoosona.
Xoossaayyo haggaazana mala Yihoowa Markkati nena maaddana