SHaahuwaa 10
Xoossay Ehiyo Maalaalissiyaa Ooratta Alamiyaa
1, 2. Ubbabaa geeshshiya Armmageedoona olaappe simmidi aybi hananee?
XOOSSAY ubbabaa geeshshiyo Armmageedoona olaappe simmidi aybi hananee? Hegaappe guyyiyan daro ufayssiya ooratta wodee doommees. Armmageedoonappe attiyaageeti, Xoossaa haaruwau ammanettidaageeta gidiyoogee erettido gishshau, ooratta alamiyaa geloosona. Asaa naatussi Xoossaappe garamissiya anjjoy goggiyo gishshau, he ooratta wodee taarikiyan ayba ufayssiyaaba gidaneeshsha!
2 Bashshaappe attidaageeti, Xoossaa Kawotettay immiyo kaaletuwaa kaallidi gannatiya aassiyoogaa doommoosona. Eta wolqqay bantta xalla siiqiyoobau gidennan, he wode deꞌiyaageeta ubbaa goꞌꞌiyaaba xalaalau peꞌana. Saꞌay asa naꞌi deꞌanau loꞌꞌiyaasa, sarotettaynne ufayssay deꞌiyoosa gidana.
Iitatettay Xillotettan Laamettana
3. Armmageedooniyaappe simmidi sohwaara ayba woppay beettanee?
3 Seexaanaa alamee xayiyo wode, hagee ubbay hananau deꞌees. Hegaappe simmin, shaahuwaa medhdhiya worddo hayimaanoteti, maabara siraatati woykko ayssoti deꞌokkona. Hegaappe simmin, Seexaanay asaa cimmiyo worddo woree deꞌenna; Seexaanaa exa gididi hegaa malabaa woreeriya ubbay a siraataara issippe xayoosona. Ane qoppa: deꞌuwaa marzzeyiya Seexaanaa alamee muleera xayana! Hegee ay keena woppissiyaaba gidanee!
4. Timirttee imettiyo ogiyan oosettiya laamiya qonccissa.
4 Hegaappe guyyiyan, asa haaroy ehiido bashshaa ehiya qofati Xoossaappe yiya minttettiya timirttiyan laamettana. “Ne attuma naata ubbaa GODAI tamarissana.” (Isiyaasa 54:13) Ha suure timirttee layttappe layttan imettiyoogaappe denddidaagan, “abbai haattan kumiyoogaadan, sa7ai GODAA eriyoogan kumana.” (Isiyaasa 11:9) Asay iita gididaabaa zaaretti tamaarenna; hegaappe, “sa7an de7iya asai xillotettaa tamaarees.” (Isiyaasa 26:9) Minttettiya qofaynne oosoy he wodee erettiyooba gidana.—Ooso 17:31; Piliphphisiyuusa 4:8.
5. Iitatetta ubbaynne iita asa ubbay waanan deꞌiyoonaa?
5 Yaatiyo gishshau, asa woriyoogee, makkalay, wolqqan asho gaytotettaa poliyoogee, bogee, woykko hara ay danoykka gidin deꞌenna yaagiyoogaa. Haraati oottiyo kobaban tuggattiya asi deꞌenna. Leemiso 10:30y: “Xilloti mulekka xoqolettokkona; shin iitati biittaa bolli de7okkona” yaagees.
Polo Payyatettay Simmana
6, 7. (a) Xoossaa Kawotettay haꞌꞌi deꞌiya aybata xayssanee? (b) Hagaa Yesuusi saꞌan deꞌiyo wode waatidi ootti bessidee?
6 Ooratta alamiyan, koyro oosettida makkala oosoy ehiido iitabay ubbay xayana. Leemisuwau, Xoossaa Kawotettaa haaroy, harggiyaanne ceegatettaa xayssana. Ha wodiyan, loꞌꞌo payyatettay deꞌiyo gishshau ufayttiyaaba gidikkokka, deꞌo layttan cimiiddi biyo wode wurssettan hayqqana gakkanaashin, ayfee galjjiyoogee, achchay wooqqiyoogee, hayttay wayssiyoogee, gogay shulliyoogee woykko bolla giddon deꞌiya asatettaa qommoti bantta oosuwaa aggiyoogee attennaba.
7 Gidikkokka, nu koyro aawaappenne aayeeppe laattido azzanttiyaabati, mata wode xayiyaabata. Payyatettaa xeelliyaagan Yesuusi saꞌan deꞌiyo wode ay ootti bessidaakko hassayay? Geeshsha Maxaafay: “Daro asai wobbeta, qooqeta, quunatanne duudeta, qassi hara darota ekkidi, akko ehiis; ehiidi a matan wottiis. Yesuusi eta pattiis. Hegaa gishshau, asai duudeti haasayishin, quunati sitti giishin, wobbeti hemettishin, qooqeti xeellishin be7idi garamettidi, Israa7eela asaa Xoossaa galatiis” yaagidi odees.—Maatiyoosa 15:30, 31.
8, 9. Ooratta alamiyan polo payyatettay simmiyo wode demmiyo ufayssaa qonccissa.
8 Ooratta alamiyan nuna sakkiya hargge ubbay xayiyo gishshau, ay keena daro ufayssay deꞌanee! Payyatettaa pacaappe denddidaagan gakkiya tuggay naaꞌꞌantto mule waayissenna. “Xiyoonen de7iya ooninne, ‘Taani harggais’ yaagenna.” “He wode, qooqetu aifee dooyettana; tulletu haittaikka siyana. Wobbeti genessadan guppana; duudettikka ufaissan yexxana.”—Isiyaasa 33:24; 35:5, 6.
9 Ubbatoo wonttaara xiskkuwaappe denddiyo wode neessi loꞌꞌo payyatettay deꞌiyoogaa eriyoogee keehi ufayssennee? Cimati yelagatettau simmidoogaanne koyro Addaameenne Hewaana polo gididi deꞌidoogaadan, etikka deꞌanaagaa eriyoogee keehippe ufayssennee? Geeshsha Maxaafay: “A bollai yelagana; a yelagatettaa wolqqaikka ayyo simmana” yaagidi qaalaa geliis. (Iyyooba 33:25) Manaaxxiriyaa, hayttay waayssiyoogeeti siyanau goꞌettiyoobata, guufeta, wobbeti uuttiyo gaaretanne xaleta olanaagee ayba ufayssiyaabee! Hegaappe guyyiyan hosppitaaleti, dottoretinne achchaa haakimeti mule koshshokkona.
10. Hayqoy waanana deꞌii?
10 Hegaa mala loꞌꞌo payyatettaara deꞌiyaageeti hayqqanau amottokkona. Asaa naati laattido polotetta paca deꞌuwaaninne hayquwan boshettenna gishshau, hayquwaa amottana koshshenna. “Xoossai a morkketa ubbaa a tohuwaappe garssaara wottana gakkanaassi, Kiristtoosi haaranau bessees. Ubbaappe wurssettan xayana morkkee haiquwaa.” “Xoossai . . . immiyo imoi merinaa de7uwaa.”—1 Qoronttoosa 15:25, 26; Roome 6:23; Isiyaasa 25:8kka xeella.
11. Ajjuutaa maxaafay ooratta alamiyaa anjjuwaa woygidi qanttan qonccissii?
11 Qoppiya Xoossay asaa naatussi Gannatiyan, ehiyo goꞌꞌaa Geeshsha Maxaafaa wurssetta maxaafay qanttan qonccissiiddi: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis” yaagees.—Ajjuutaa 21:3, 4.
Hayqqidaageeti Denddana
12. Yesuusi Xoossay assi immido hayquwaappe denttiyo wolqqaa waati bessidee?
12 Yesuusi harggidaageetanne wobbeta pattiyoogaappe aarobaa oottiis. I duufuwan deꞌiyaageetakka denttiis. Yaatiyoogan, Xoossay assi immido hayquwaappe denttiyo maalaalissiyaa wolqqaa bessiis. Yesuusi naꞌiya hayqqido issi bitaniya soo biido wode hanidabaa hassayay? Yesuusi hayqqida naꞌiyo: “Guutta na7ee, taani nena dendda gais” yaagiis. Wurssettan aybi hanidee? “Na7iyaa sohuwaarakka dendda eqqada hemetettaasu.” He sohuwan deꞌiya asay hegaa beꞌidi, “keehi daro garamettiis.” Eta ufayssau zawi xayiis!—Marqqoosa 5:41, 42; Luqaasa 7:11-16nne Yohaannisa 11:1-45kka xeella.
13. Hayquwaappe denddiyaageeti ay mala asatee?
13 Ooratta alamiyan, “Asai ubbai, worddoikka xilloikka haiquwaappe denddana.” (Oosuwaa 24:15) Yesuusi “Taani denddonne de7o; tana ammaniya urai harai atto, haiqqikkokka paxa de7ana” yaagido gishshau, Xoossay assi immido wolqqaa goꞌettidi hayqqidaageeta he wode denttana. (Yohaannisa 11:25) Qassikka, i hagaadan giis: “Duufuwan de7iyaageeti [Xoossay hassayiyoogeeti] a [Yesuusa] cenggurssaa siyiyo wodee yees. Siyidi eti duufuwaappe gaxi kiyana.”—Yohaannisa 5:28, 29.
14. Hayqoy baynna gishshau, sinttanu xayiyaabati aybee?
14 Hayqqidaageeti deꞌuwau simmidi bantta siiqotuura gayttanau citan citan yiyoogee, saꞌa yuushuwan daro ufayssiyaaba! He wodiyan deꞌuwan deꞌiyaageeta azzananaadan oottiya kiiti deꞌenna. Hegaappe dummabay deꞌana; hegeekka, eta siiqiyaageetussi ufayssaa ehiya hayquwaappe mati denddidaageeti oonakko odiyo mishraachchuwaa. Hegaa gishshau, hayqqida asa moogiyoogee, ahaa xuuggiyoogee, ahaa xuuggiyo sohoy woykko makkaanay deꞌenna!
Tumu Sarotettay Kumido Alamiyaa
15. Mikiyaasa hiraagay waanidi kumetta poluwaa demmanee?
15 Tumu sarotettay deꞌo ubban demmiyooba gidana. Olay, olaa aassiyaageetinne ola miishshaa medhdhiyoogee aadhdhida wodeba gidana. Ayssii? Asaa ba goꞌꞌaassi zariyan, yaraaninne qommuwan shaakkiyoogee xayiyo gishshataassa. He wode, kumetta hanotan, “kawotettai kawotettaa bolli bisuwaa denttenna. Hegaappe guyyiyan, eti muleera olaa timirttiya tamaarokkona.”—Mikiyaasa 4:3.
16. Xoossay waatidi olay deꞌennaadan oottii?
16 Hagee woppay baynna olan, suutta saamettida asaa taarikiyaara gatti xeelliyo wode, maalaalissiyaaba malatana danddayees. SHin hegee hanana danddayidoy, asaa naati asaaninne dayidanttatun haaretto gishshataassa. Xoossaa Kawotettay haariyo ooratta alamiyan, hagaappe kaallidi deꞌiyaabay hanana: “Haa yiite; GODAA oosuwaa xeellite . . . I sa7aa gaxa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.”—Mazamure 46:8, 9.
17, 18. Ooratta alamiyan asaa, mehiyaanne doꞌaa giddon ay mala gayttotettay deꞌanee?
17 Asaynne doꞌaykka Edenen deꞌidoogaadan saruwan deꞌana. (Doomettaabaa 1:28; 2:19) Xoossay hagaadan gees: “He gallassi taani ta asaa gishshau sa7aa do7atuura, saluwaa kafotuuranne biittaara gooshettiya meretatuura maachchaa maacettana . . . yaatobare eti woppu giidi, saro de7ana.”—Hoose7a 2:18.
18 Hegaa mala saroy ay keena aakkidi deꞌanee? “Wanggireelloi dorssa maraara issippe de7ana; maaheekka deeshsha maraara issippe zin77ana; miizaa maraara, gaammuwaa maraaranne daddaruwaara issippe heemettana; guutta na7ai eta heemmana.” Hegaappe guyyiyan, doꞌati asassi woy hara mehessikka gidin mule yashshiyaageeta gidokkona. Haray atto “gaammoi booraadan utulaa maana”!—Isiyaasa 11:6-9; 65:25.
Biittay Gannatiyau Laametees
19. Biittay aybaayyo laamettanee?
19 Biittay ubbay gannatiyau laamettidi asaa naati deꞌiyo soho gidana. Yesuusi banan ammanida bitaniyau “Neeni tanaara gannatiyan de7ana” yaagidi qaalaa gelidoy hegaassa. Geeshsha Maxaafay: “Bazzoinne mela biittai ufaittana; bazzoi ufaissaa poocu giiddi, ciishshaa ciyyana . . . bazzon haattai melosan pulttoi xuuqqana” yaagees.—Luqaasa 23:43; Isiyaasa 35:1, 6.
20. Namisay asaa naata naaꞌꞌantto mule qohennay aybissee?
20 Xoossaa Kawotettay haariyo wode, namisay miilooniyan qoodettiya asaa naaꞌꞌantto qohenna. “Biittan daro kattai mokko; dereti kattan kamettona.” “Gaden de7iya mittati aifana; biittaikka kattaa mokkana. Asai ubbai he biittan saro de7ana.”—Mazamure 72:16; Hizqqeela 34:27.
21. Keetti baynna asi, humppa keettaynne iita shooroti waanana deꞌiyoonaa?
21 He sohuwan hiyyesatettay, keetti baynna asinne, humppa keetti woykko danobay kumido heeri deꞌenna. “Asati keettata keexxidi, etan de7ana; woiniyaa turatakka tokkidi, eta aifiyaa maana. Eti keexxin, harai de7enna; harai maanau tokkiyoobaa tokkokkona.” “Asai ubbai ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna.”—Isiyaasa 65:21, 22; Mikiyaasa 4:4.
22. Geeshsha Maxaafay Xoossay haariyo wode yaana anjjuwaa woygidi qonccissii?
22 Asay Gannatiyan, ha ubbabatuninne hara daroban anjjettana. Mazamure 145:16y, hagaadan gees: “Neeni [Xoossay] ne kushshiyaappe yeggada, paxa de7iyaageeta ubba amuwaa alaasa.” Geeshsha Maxaafaa hiraagay: “Ashkketi biittaa laattana; eti sarotettaaninne duretettaani ufaittidi daana. . . . Xilloti biittaa laattananne yan merinau de7ana” yaagiyoogee garamissiyaaba gidenna.—Mazamure 37:11, 29.
Aadhdhidabaa Giigissiyoogaa
23. Xoossaa Kawotettay nuna gakkida tuggaa ubbaa waati giigissanee?
23 Xoossaa Kawotettaa haaroy aadhdhida usuppun shaꞌu laytta giddon, asaa naatu bolli gakkida qohuwaa ubbaa giigissana. He wode demmiyo ufayssay keehippe daro gidiyo gishshau, asaa gakkida tugga ubbaa dogissiyaaba gidana. Kase gakkida tuggaa hassayi ekkidi deꞌuwan metootiyoobi baawa. Ubba wode asa deꞌuwan attennaba gidiya, minttettiya qofaynne oosoy, guuttaa guuttakka gidin hassayiyo waayissiyaabata quccidi xayssana.
24, 25. (a) Isiyaasi aybi hanana giidi hiraagaa yootidee? (b) Aadhdhida wode gakkida tuggay hassayanau metanaagaa ammanettana danddayiyoy aybissee?
24 Asaa naatussi qoppiya Xoossay: “Be7ite, taani ooratta salotanne [asaa haariya saluwaa ayssuwaa] ooratta sa7aa [xillo gidida asaa maabaraa] medhdhais; kasebai ubbai hassayettennanne qofettenna. SHin taani medhdhiyooban merinau ufaittitenne hashshu giite” yaagidi erissiis. “Biitta ubbai etappe shemppidi, woppan de7ees; asaikka yettaa yexxees.”—Isiyaasa 14:7; 65:17, 18.
25 Yaaniyo gishshau, Xoossay ba Kawotettan goꞌettidi, hagaa keena wodiyau gamꞌꞌida iita hanotaa muleera xayssidi appe dummabaa oottana. Xoossay kase nuna gakkida qohuwaa giigissiyoogaappekka dariya anjjuwaa gogissiyoogan, nuussi qoppiyoogaa meri merinau bessana. Aadhdhida wode nu bolli gakkida meto ubbay, nuuni hassayana koyiyaaba gidikkokka, dogettidi hassayanau wayissiyaaba gidana.
26. Xoossay nuuni aattido tugga ubbaa gishshaa loꞌꞌobaa zaariyoy aybissee?
26 Ha alamiyan nuuni aattido tuggaa gishshaa Xoossay hagaadan loꞌꞌoban laammana. Nuuni polo gidennaageeta gididi yelettidoy, nu balan gidennan, nu koyro aawaappenne aayeeppe laattidoban gidiyoogaa i erees. Nuuni Seexaanaa alamiyan yelettidoy nu balan gidena; ubba Addaameenne Hewaana ammanettidaageeta gidiyaakko, gannatiyan yelettiyoogaa shin. Hegaa gishshau, Xoossay keehippe qarettidi, nu bolli gakkida metuwaa giigissiyoogaappekka aadhdhidi darobaa oottana.
27. Ooratta alamiyan maalaalissiya poluwaa demmiya hiraagati awugeetee?
27 Oortta alamiyan, asaa naati Roome 8:21, 22n odettida laꞌatettaa demmana: “Mereta ubbai ba huuphen bashshaa ailletettaappe issi gallassi kiyana; qassi he meretati Xoossaa naati ailletettaappe kiyido bonchcho kessaa shaakkana. Aissi giikko, mereta ubbai issippe hanno gakkanaassi, maccaasa leessoi oiqqin ooliyoogaadan, sahuwan ooliyoogaa nuuni eroos.” Asay he wode: “Ne kawotettai yo; ne shenee saluwan hanidoogaadan, sa7ankka hano” yaagiya woosaa kumetta poluwaa beꞌana. (Maatiyoosa 6:10) Gannate biittan deꞌiya maalaalissiya hanotati, saluwan deꞌiya hanotaa bessoosona.
[Sinttaa 23n deꞌiya misiliyaa]
Ooratta alamiyan, ceegidaageeti yelagatetta wolqqau simmana
[Sinttaa 23n deꞌiya misiliyaa]
Ooratta alamiyan, ubba harggeenne bolla qommoppe paci deꞌiyo uri deꞌenna
[Sinttaa 25n deꞌiya misiliyaa]
Ooratta alamiyan, hayqqidaageeti deꞌuwau denddana
[Sinttaa 26n deꞌiya misiliyaa]
‘Hagaappe guyyiyan olaa timirttiyaa tamaarokkona’
[Sinttaa 27n deꞌiya misiliyaa]
Asaynne doꞌay Gannatiyan kumetta saruwan issippe daana
[Sinttaa 27n deꞌiya misiliyaa]
‘Xoossay ba kushshiyaa miccidi paxa deꞌiyaageetu ubbaa amuwaa alana’
[Sinttaa 28n deꞌiya misiliyaa]
Xoossaa Kawotettay nuuni beꞌidi aattido metuwaa ubbaa giigissiyoogaappekka darobaa oottana