SHaaho 8
Gannate Saꞌan Merinau Deꞌa
1 Xoossay iitatettaanne tuggaa saꞌaappe xayssidi, saluwan deꞌiya a Kawotettay siiquwan haariyo ooratta alamiyaa ehiyo wode, deꞌoy ay mala ufayssiyaagaa gidanee? Xoossay ‘ba kushiyaappe yeggidi, paxa deꞌiyaageetu ubbaa amuwaa alanau’ qaalaa geliis.—Mazamure 145:16.
2 Neeni amottiyoobay aybee? Ufayssiya deꞌuwaa, loꞌꞌo oosuwaa, aquwaa, loꞌꞌiya heeraa, asay ubbay sarotettan deꞌiyoogaa, qassi naaquwaappe harggiyaappe, tuggaappenne hayquwaappe naxa gididi deꞌiyoogaa gidennee? Ayyaanaaban shin ufayssiyaabay deꞌanaadan koyikkii? Ha ubbabay Xoossaa Kawotettaa haaruwan mata wode polettana. He ooratta alamiyan deꞌana maalaalissiya anjjuwaa xeelliyaagan Geeshsha Maxaafaa hiraagati yootiyoobaa akeeka.
Asay Polo Sarotettan Deꞌana
3 “[Xoossay] sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.”—Mazamure 46:9.
4 “Eti bantta bisuwaa marasha, bantta tooraakka baaca kessanau qoxxana. Kawotettai kawotettaa bolli bisuwaa denttenna. Hegaappe guyyiyan eti mulekka olaa timirttiyaa tamaarokkona.”—Isiyaasa 2:4.
5 “Ashkketi biittaa laattana; eti sarotettaaninne duretettaani ufaittidi daana.”—Mazamure 37:11.
6 “Biitta ubbai . . . shemppidi, woppan de7ees; asaikka yettaa yexxees.”—Isiyaasa 14:7.
Asaynne Doꞌay Saruwan Deꞌana
7 “Wanggireelloi dorssa maraara issippe de7ana; maaheekka deeshsha maraara issippe zin77ana; miizzaa maraara, gaammuwaa maraaranne daddaruwaara issippe heemettana; guutta na7i eta heemmana. Miizziyaanne beeriyaa geetettiya do7ai issippe maana; eta maratikka issippe zin77ana; gaammoi booraadan utulaa maana. Xammiya na7i shooshshaa ollan kaa7ana; xanttaa duuxxida na7i woriya shooshshaa ollan ba kushiyaa yeddana. Ta geeshsha deriyan ooninne qohettenna.”—Isiyaasa 11:6-9.
8 “He gallassi taani ta asaa gishshau sa7aa do7atuura, saluwaa kafotuuranne biittaara gooshettiya meretatuura maachchaa maacettana. Taani . . . yaatobare eti woppu giidi, saro de7ana.”—Hoose7a 2:18.
Polo Payyatettaa, Merinaa Deꞌuwaa
9 “He wode, qooqetu aifee dooyettana; tulletu haittaikka siyana. Wobbeti genessadan guppana; duudetikka ufaissan yexxana.”—Isiyaasa 35:5, 6.
10 “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—Ajjuutaa 21:4.
11 “Xiyoonen de7iya ooninne, ‘Taani harggais’ yaagenna.”—Isiyaasa 33:24.
12 “A bollai yelagana; a yelagatettaa wolqqaikka ayyo simmana.”—Iyyooba 33:25.
13 “Nagarai qanxxiyo miishshai haiquwaa. SHin Xoossai nu Godaa Kiristtoos Yesuusa baggaara immiyo imoi merinaa de7uwaa.”—Roome 6:23.
14 “Xoossaa Na7aa ammaniya ubbai merinaa de7uwaa ekkanaappe attin, xayenna.”—Yohaannisa 3:16.
Hayqqidaageeti Denddana
15 “Worddoikka xilloikka haiquwaappe denddana.”—Oosuwaa 24:15.
16 “Duufuwan de7iyaageeti [Xoossay hassayiyoogeeti] a cenggurssaa siyiyo wodee yees. Siyidi eti duufuwaappe gaxi kiyana.”—Yohaannisa 5:28, 29.
17 “Abbai ba giddon de7iya haiqqidaageeta immiis; haiqoinne Si7oolee [duufoy] bantta giddon de7iya haiqqidaageeta immidosona.”—Ajjuutaa 20:13.
Ubbabay Kumi Palahiyo Gannate Saꞌaa
18 “Etau koshshiya iraakka wodiyan immana; he irai etau anjjo gidana. Gaden de7iya mittati aifana; biittaikka kattaa mokkana. Asai ubbai he biittan saro de7ana.”—Hizqqeela 34:26, 27.
19 “Biittai kattaa mokkiis; Xoossai, nu Xoossai nuna anjjiis.”—Mazamure 67:6.
20 “Bazzoinne mela biittai ufaittana; bazzoi ufaissaa poocu giiddi, ciishshaa ciyyana.”—Isiyaasa 35:1.
21 “Deretinne kerati intte sinttan ufaittidi yexxana; dembban de7iya mittati ubbaikka bantta kushiyaa baqqana. Agunttaa gishshaa xiiddai, gom77oriyaa gishshaakka xaittai mokkana.”—Isiyaasa 55:12, 13.
22 “Neeni tanaara gannatiyan de7ana.”—Luqaasa 23:43.
Ubba Asau Loꞌꞌo Keettay Deꞌana
23 “He wodetun asati keettata keexxidi, etan de7ana . . . Eti keexxin, harai de7enna; harai maanau tokkiyoobaa tokkokkona. . . . Taani dooridoogeeti bantta adussa wodiyau bantta kushiyaa oosuwan ufaittana. Eti coo daafurokkona; woikko naata boshau yelokkona.”—Isiyaasa 65:21-23.
24 “Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna.”—Mikiyaasa 4:4.
Gannatiyan Merinau Deꞌana Danddayaasa
25 Keehi maalaalissiya hidootay deꞌees! Xoossay ehiyo ooratta alamiyan haꞌꞌi deꞌiya meto ubbay merinau dogettiyaaba gidiyoogaa qonccissiya mino hidootaa ammaniyoogee, ha wodiyan ufayssiya deꞌuwaa deꞌanaadan maaddees. “Kasebai ubbai hassayettennanne qofettenna.” (Isiyaasa 65:17) Merinaa deꞌuwaa demmanaagaa eriyoogee keehi minttettees; “Haiquwaa [Xoossay] merinau mittana.”—Isiyaasa 25:8.
26 Mata wode yaana ooratta alamiyan Gannatiyan merinau deꞌana koyay? ‘Ha alamiyaa wurssettan Xoossaa ufayssanaunne i ehiyo ooratta alamiyan deꞌanau ay oottana koshshii?’ gaada nena oychana danddayaasa. Yesuusi Xoossaakko woossido wode giidobaa neeni oottana koshshees: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o.”—Yohaannisa 17:3.
27 Yaatiyo gishshau, Geeshsha Maxaafaa demmada neeni ha brooshuriyaappe nabbabidobay tuma gidiyoogaa aggiyoogaa shaakka era. Ha Geeshsha Maxaafaa tumaa xannaꞌissiyaanne tamaarissiya asa koya. Geeshsha Maxaafan baynnabaa tamaarissiyaanne oottiya loꞌꞌo milatiya iita haymaanootetuppe kiya. Xoossaa sheniyaa oottiiddi deꞌiya miilooniyan qoodettiya haratuura, asay gannate saꞌan merinau deꞌanaadan Xoossay halchidoban neeni waanada goꞌettanaakko tamaara. Qassi mata wode hananabaa Xoossaa Qaalay yootiyoobaa wozanan wotta: “Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau de7ana.”—1 Yohaannisa 2:17.
[Oyshata]
1, 2. Xoossaa Kawotettaa haaruwan deꞌoy ay mala gidanee?
3-6. Asay ooratta alamiyan sarotettan deꞌanaagaa nuuni ammanettiyoy aybissee?
7, 8. Asaanne doꞌaa giddon ay mala sarotettay deꞌanee?
9-14. Ooratta alamiyan ay mala payyatettay deꞌanaakko qonccissa.
15-17. Hayqqidaageetuyyo ayba hidootay deꞌii?
18-22. Kumetta saꞌay aybau laamettanee?
23, 24. Ubba asau gidiya loꞌꞌo keettay deꞌanaagaa nuuni ammanettanaadan oottiyaabay aybee?
25. Nuussi maalaalissiya ayba hidootay deꞌii?
26. Xoossay ehiyo ooratta alamiyan deꞌanau keehi koshshiyaabay aybee?
27. Xoossaa halchuwan goꞌettanau neeni ay oottana koshshii?
[Sinttaa 31n deꞌiya misiliyaa qonccissuwaa]
Saꞌay gannate gidanaadan Xoossay halchidobay mata wode polettana