Alamiyan Hanettiiddi Deꞌiyaabati Ay Malaatiyoonaa?
YESUUS KIRISTTOOSI olay, koshay, wurssiya harggeenne biittaa qaattay “wodiyaa wurssettaayyo” malaata gidiyoogaa yootiis.—Maatiyoosa 24:1-8; Luqaasa 21:10, 11.
Haymaanootiyaa kaalettiyaageeti polotikan kelttiyaa geliyo gishshau deree deriyaaranne issi sheeshshay hara sheeshshaara olettiyoogan, ha wodiyan qassi ubba heeran shabbirssiyaageeti gattiyo qohuwaappe denddidaagan, 1914ppe doommidi deꞌoy moorettiis.
Saynisee daro dichaa bessidaba gidikkonne, xeetu miilooniyan qoodettiya asay alame yuushuwan wolqqaama koshaa koshatees. Layttan layttan miilooniyan qoodettiya asay koshaa gaasuwan hayqqees.
Asappe asa oyqqiya wurssiya harggeekka Yesuusi yootido malaatatuppe issuwaa. Koyro Alamiyaa Olay wurosaara denddida infiluwanzza giyo harggiyan 21,000,000ppe dariya asay hayqqiis. Kase wodetun erettida wurssiya harggetuppe dumma gidida ogiyan, he harggee alame yuushuwan dere ubbaanne haahuwan deꞌiya haruurota gakkiis. Eedisee alame ubban asaa qohiiddi deꞌees; ajaajjee, uunnoynne hegaa mala hara harggee dicha bolli deꞌiya biittata qohiiddi deꞌees.
Layttan layttan dumma dumma wolqqay deꞌiyo biittaa qaattay denddiyoogee odettees. Issibay gakkanaappe kase eranau maaddiya miishshatinne hiillay deꞌiyaaba gidikkonne, biittaa qaattaappe denddidaagan asay daridi deꞌiyo heeran gakkiya gita bashshay darotoo siyiyoobaa.
Geeshsha Maxaafay kaallidi deꞌiyaagaakka kasetidi yootiis: “Wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana. Eti nu ammanuwaa bolla doonan ekkidabaa milatana; shin a tumu wolqqaa erikke gaana. Hegeetu mala asatukko shiiqoppa.”—2 Ximootiyoosa 3:1-5.
Nuuni ‘waayissiya wodiyan’ deꞌiyoogaa maayikkii?
Asay keehippe bana siiqiyoogaa, miishshaa siiqiyoogaanne ayyiyoogaa akeekadii?
Alamee bana siiqiyaageetun, galatennaageetun, sigettanau koyennaageetuuninne ammanettennaageetun kumidoogaa siriyay oonee?
Issi heera xallan gidennan alame yuusho ubbasan siiqoy xayiyoogaappe denddidaagan bana yelidaageetuyyo azazettenna hanotay daridoogaa akeekadii?
Nuuni deꞌiyo alamiyan ufayttiyoobaa dosiyaageetinne loꞌꞌobaa dosennaageeti kumidoogaa neeni akeekiyoogee sirissenna. Geeshsha Maxaafay “wurssetta gallassi” hegaa mala hanotay deꞌanaagaa yootees.
Nuuni deꞌiyo wodiyaa shaakkidi eranau hara naqaasha koshshii? He wodiyan Xoossaa Kawotettaa mishiraachoy saꞌa ubban odettanaagaakka Yesuusi kasetidi yootiis. (Maatiyoosa 24:14) Hegee odettiiddi deꞌii?
Geeshsha Maxaafan baasettida, Yihoowa Kawotettaa mishiraachuwaa erissiya Wochiyo Keelaa xuufee hara ay maxeeteppekka daro doonan ubbatoo attamettees.
Yihoowa Markkati Xoossaa Kawotettaabaa asau yootiyoogan layttan layttan issi biilooniyaappe dariya saatiyaa aattoosona.
Eti Geeshsha Maxaafaa qofaa qonccissiya xuufeta haaho heeratun deꞌiya asaa qaalaaninne guutta qooday deꞌiyo asay haasayiyo qaalata gijjin, 400 gidiya qaalatun ha wodiyan giigissoosona. Yihoowa Markkati dere ubban mishiraachuwaa yootidosona; eti daro haruurotuuninne polotikaa xeelan keehi guutta gidida heeratunkka yootidosona. Daro biittatun, eti ubbatoo Geeshsha Maxaafaa tamaarissiyo prograamee deꞌees.
Xoossaa Kawotettaa mishiraachoy saꞌa ubban odettiyoy, alamiyaa laammanaassa gidennan markkattanaassa gidiyoogee qoncce. Ubbasan deꞌiya asay saluwaanne saꞌaa medhidaagaa qoppanaadan, a higgiyaa bonchanaadaaninne asaa siiqanaadan mishiraachuwaa baggaara injjee imettiiddi deꞌees.—Luqaasa 10:25-27; Ajjuutaa 4:11.
Xoossaa Kawotettay mata wode saꞌaappe iitatetta ubbaa xayssidi, kumetta saꞌaa gannate oottana.—Luqaasa 23:43.
[Sinttaa 6n deꞌiya saaxiniyaa]
Aybaayyo Wurssetta Gallassee?
Asaa naatussi wurssetta gallassa gidenna. Xoossaa sheniyaa oottiyaageetuyyo merinaa deꞌuwaa hidootay deꞌiyoogaa Geeshsha Maxaafay yootees.—Yohaannisa 3:16, 36; 1 Yohaannisa 2:17.
Saꞌau wurssetta gallassa giyoogaa gidenna. Xoossaa Qaalay saꞌay merinau deꞌanaagaa yootees.—Mazamure 37:29; 104:5; Isiyaasa 45:18.
Hegaappe, danoy daridonne siiqoy baynna siraatau, qassi a ogiyaa baxuuxi oyqqidaageetu wurssetta gallassa.—Leemiso 2:21, 22.
[Sinttaa 7n deꞌiya misiliyaa]
Geeshsha Maxaafay Tumuppe Xoossaa Qaalee?
Geeshsha Maxaafan hananabaa yootiyaageeti, ‘GODAY hagaadan yaagees’ giidi darotoo xaafidosona. (Isiyaasa 43:14; Ermmaasa 2:2) Ubba Xoossaa Naꞌaa, Yesuus Kiristtoosikka, “taani taappe odikke” yaagidi mintti yootiis. (Yohaannisa 14:10) Geeshsha Maxaafay ba huuphe qoncciyan: “Xoossaa maxaafa ubban Xoossaa Ayyaanai de7ees” yaagees.—2 Ximootiyoosa 3:16.
Geeshsha Maxaafaa Maabaray qonccissidoogaadan, 2,400ppe dariya doonan Geeshsha Maxaafay attamettiis; hegaadan daro doonan attamettida hara maxaafi baawa. Ha wodiyan oyddu biilooniyaappe dariya Geeshsha Maxaafay deꞌees; hegaa keena qoodan asaa gakkida hara maxaafi baawa. Xoossaappe yiida kiitay asaa naatu ubbau gakkana bessiyoy hegaadaana gidennee?
Geeshsha Maxaafay Xoossaa ayyaanay kaalettin xaafettidoogau naqaashaa aahuwan erana koyikko, Yihoowa Markkatun attamettida, Geeshsha Maxaafay—Xoossaa Qaaleeyye woy Asa Qaalee? (Wolayttattuwan attamettibeenna) yaagiya maxaafaa xeella.
Neeni Geeshsha Maxaafaa nabbabiyaabanne i tumuppe Xoossaa Qaalaa gidiyoogaa ammanada ekkiyaaba gidikko, keehippe goꞌettaasa.
[Sinttaa 8n deꞌiya misiliyaa]
Xoossaa Kawotettay Aybee?
Saluwaanne saꞌaa Medhida, Tumu Xoossaa, Yihooway haariyo saluwaa ayso. —Ermmaasa 10:10, 12.
He Kawotettaa haariyo maataa Xoossay Yesuus Kiristtoosayyo immidoogaa Geeshsha Maxaafay yootees. (Ajjuutaa 11:15) Yesuusi saꞌan deꞌiyo wodekka, carkkuwaa coꞌꞌu oottiyo, beetaa woppu oottiyo, ubba qommo harggiyaappe asaa pattiyoonne ubba hayqqidaageetakka denttiyo maalaalissiya wolqqay Xoossaappe imettidoogaa bessiis. (Maatiyoosa 9:2-8; Marqqoosa 4:37-41; Yohaannisa 11:11-44) Geeshsha ayyaanay denttettin xaafettida Geeshsha Maxaafaa hiraagay “asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo” Xoossaappe imettidoogaakka yootees. (Daaneela 7:13, 14) He aysoy saluwaa Kawotettaa geetettees; Yesuus Kiristtoosi ha wodiyan he Kawotettaa saluwan haariiddi deꞌees.
[Sinttaa 7n deꞌiya misiliyaa]
Alame yuushuwan odettiya mishiraachuwaa