‘Wurssettaa Gallassaa,’ Woy ‘Wodiyaa Wurssettaa’ Malaatay Aybee?

Geeshsha Maxaafay yootiyoobaa

Nuuni ha alamee xayanawu matido ‘wurssettaa wodiyan’ woy “wurssetta gallassi” deꞌiyoogaa bessiya, alamiyan haniyaabaanne asaa eeshshaabaa Geeshsha Maxaafay yootees. (Maatiyoosa 24:3) Geeshsha Maxaafay ha wodiyaa, ‘wurssettaa gallassaa,’ ‘wurssettaa wodiyaa’ woy ‘wodiyaa wurssettaa’ giidi yootees.—2 Ximootiyoosa 3:1; Daaneela 8:19

‘Wurssettaa gallassaa’ xeelliyaagan Geeshsha Maxaafay yootiyo amarida hiraagati awugeetee?

Darobati bolli bollan hananaagaanne hegeeti wurssettaa gallassaa shaakki erissiya ‘malaata’ gidanaagaa Geeshsha Maxaafay kasetidi yootiis. (Luqaasa 21:7) Amarida leemisota beꞌa:

Kumetta saꞌan olay deꞌana. Yesuusi hagaadan giis: “Issi biittaa asai hara biittaa asaara olettana.” (Maatiyoosa 24:7) Hegaadankka, Ajjuutaa 6:4y olaa bessiya paraa toggidaagee ‘saꞌan olaa denttanaagaa’ yootees.

Koshay denddana. Yesuusi hagaadan giis: ‘Koshay ubbasan deꞌana.’ (Maatiyoosa 24:7) Ajjuutaa maxaafay saꞌa ubban koshay deꞌanaadan oottiya hara paraa toggidaagaabaa yootees.—Ajjuutaa 6:5, 6

Wolqqaama biittaa qaattay deꞌana. Yesuusi “biittaa qaattai ubbasan” deꞌanaagaa yootiis. (Maatiyoosa 24:7; Luqaasa 21:11) Wolqqaama biittaa qaattay awudeegaappenne aaruwan daro asay waayettanaadaaninne hayqqanaadan oottiis.

Harggee ubbasan deꞌana. Yesuusi yootidoogaadan, asaappe asaa oyqqiya harggee, woy ubbasaa gakkiya harggee deꞌana.—Luqaasa 21:11.

Danobay darana. Danobay daro xeetu layttaappe doommidi deꞌiyaaba gidikkonne, wurssettaa gallassan ‘makkalay daranaagaa’ Yesuusi yootiis.—Maatiyoosa 24:12.

Saꞌay moorettana. Asay saꞌaa mooranaagaa Ajjuutaa 11:18y yootees. Eti makkalabaa oottiyoogaa xallan gidennan, saꞌaa mooriyaabaa oottiyoogankka hegaadan oottoosona.

Asaa eeshshay iita gidana. Geeshsha Maxaafay 2 Ximootiyoosa 3:1-4n yootiyoogaadan, daro asati “galatennaageeta, geeshshatetti bainnaageeta, . . . sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta” gidana. Asaa eeshshay keehi iita gidido gishshawu, ha wodee genccanawu ‘waayissiya wodiyaa’ geetettiis.

So asay issoy issuwaara darin siiqettenna. Geeshsha Maxaafay 2 Ximootiyoosa 3:1-4n, daroti bantta so asaa ‘siiqennaageetanne’ naati “banttana yelidaageetuyyo azazettennaageeta” gidanaagaa yootees.

Asay Xoossaa darin siiqenna. Yesuusi hagaadan giis: “Daro asaa siiqoi irxxana.” (Maatiyoosa 24:12) Daro asay Xoossaa siiqiyo siiqoy irxxanaagaa Yesuusi yootiis. Hegaadankka, 2 Ximootiyoosa 3:4y wurssettaa gallassi hegaa mala asati “Xoossaappe aattidi, ufaittiyoobaa dosiyaageeta” gidanaagaa yootees.

Haymaanootiyaa kaalliyaageeti cimmiyaageeta gidana. Geeshsha Maxaafay 2 Ximootiyoosa 3:5n, asay Xoossawu goynniyaaba milatikkonne, I kessido maaraadan deꞌennaagaa yootees.

Geeshsha Maxaafan odettida hiraagata asay kaseegaappe aaruwan akeekana. ‘Wurssettaa wodiyan,’ Geeshsha Maxaafaa hiraagata akeekiyoogaa gujjin, Geeshsha Maxaafaa eray daranaagaa Daaneela maxaafay yootees.—Daaneela 12:4.

Kumetta saꞌan sabbakiyo oosoy oosettana. Yesuusi hagaadan giis: “Kawotettaa wonggeliyaa mishiraachchoi sa7a ubban odettana.”—Maatiyoosa 24:14.

Asay kaseegaappe aaruwan siyanawu koyennaagaanne qilliicciyaagaa gidana. Ha alamiyaa wurssettay matidoogaa bessiya naqaashaa daro asay ammanennan ixxanaagaa Yesuusi yootiis. (Maatiyoosa 24:37-39) Hegaappe aaruwan, amaridaageeti hegaa qilliiccanaagaanne siyennan ixxanaagaa 2 PHeexiroosa 3:3, 4y yootees.

Hiraagati ubbaykka polettana. Yesuusi yootidoogaadan, wurssettaa gallassaabaa yootiya hiraagatuppe amaridaagee woy dariya bagga xallay gidennan, ubbay issi kutti polettana.—Maatiyoosa 24:33.

Nuuni ‘wurssettaa gallassan’ deꞌiyoo?

Ee. Alamiyan haniyaabatinne Geeshsha Maxaafaa wodiyaa qooday bessiyoogaadan, Koyro Alamiyaa Olay doommido 1914n wurssettaa gallassay doommiis. Ha alamiyan haniyaabati nuuni wurssettaa gallassan deꞌiyoogaa waati qonccissiyaakko kaalliya biiduwaappe akeeka:

Xoossaa Kawotettay 1914n saluwan haariyoogaa doommiis; qassi he kawotettay oottidobaappe koyroy Seexaanaa Dabloosanne daydanttata saꞌawu oliyoogaa. Yaatiyo gishshawu, eti qohana danddayiyoy saꞌaa xalla. (Ajjuutaa 12:7-12) Seexaanay asaa eeshshaynne eti haniyoobay iita gidanaadan oottiis; hegee wurssetta gallassay genccanawu ‘waayissiyaagaa’ gidanaadan oottiis.—2 Ximootiyoosa 3:1.

Ha waayissiya wodiyan hanettiyaaban daroti unꞌꞌettoosona. Eti asay issippetettan waani deꞌanaakko mule erennabadan qoppoosona. Ubba amaridaageeti, asay issoy issuwaa muleera xayssana giidi hirggoosona.

Gidikkonne, ha alamiyan haniyaabatun unꞌꞌettiya harati sinttappe ufayssiyaabay yaana giidi hidootoosona. Mata wode Xoossaa Kawotettay saꞌan deꞌiya meto ubbaa xayssanaagaa eti ammanettoosona. (Daaneela 2:44; Ajjuutaa 21:3, 4) Xoossay ba gelido qaalaa polana wodiyaa eti danddayan naagoosona; qassi “wurssettaa gakkanaashin gencciya urai attana” giidi Yesuusi yootidoban minettoosona.—Maatiyoosa 24:13; Mikiyaasa 7:7.