SHEMPPUWAA 25

Mastterbeeshiniyaa Waata Aggana Danddayiyaanaa?

“Tawu laytta hosppuna gidiyo wode mastterbeeshiniyaa doommaas. Xoossay hegaa waati xeelliyaakko guyyeppe akeekaas. He paaciyan kunddido wode ubban keehi azzanaas. Yaatiyo gishshawu, ‘Ta mala asa Xoossay waati siiqana danddayii?’ gaada qoppaas.”—Luyiza.

PANTTATETTAA layttan mattumaa gayttiyo koshshay keehi wolqqaamiyo gishshawu, issooti issooti mastterbeeshiniyaa doommennan waayi aggana.a Daroti hegaa iitabadan xeellennan aggana danddayoosona. Eti, “Hegan qohettiya asi deꞌenna” goosona. SHin neeni he meeziyaappe haakkana koshshees. Kiitettida PHawuloosi nuuni ‘worana bessiya ha saꞌaa amotuppe issoy shaaramuxanawu koyiyoogaa’ gidiyoogaa yootiis. (Qolasiyaasa 3:5) Mastterbeeshinee shaaramuxiyo amuwaa yaa denttetteesippe attin worenna. Kaallidi deꞌiya qofata akeeka:

● Mastterbeeshinee issi uri ba xallaa siiqanaadan oottees. Leemisuwawu, mastterbeeshiniyaa meezee deꞌiyo uri ba amuwaa aliyoogaa xallaa qoppees.

● Mastterbeeshiniyaa meezee deꞌiyo uri, mattuman baappe dummatiya asa he amuwaa poliyo miishshadan xeellees.

● Mastterbeeshiniyaa meeze deꞌiyo issi uri ba xallaa siiqiyo gishshawu aqo laggiyaara mattumaa gayttiyoogan ufayttenna.

Mattumaa koshshaa alanawu mastterbeeshiniyaa goꞌettiyoogaappe ne huuphiyaa naaganawu baaxeta. (1 Tasalonqqe 4:4, 5) Yaatanawu, mattumaa koshshaa denttettana danddayiyaabaappe neeni haakkana mala Geeshsha Maxaafay zorees. (Leemiso 5:8, 9) Gidoppe attin, mastterbeeshiniyaa meeziyaa agganaagee nena metikko shin? Neeni he meeziyaa agganwu daro baaxetinkka metana danddayees. Neeni laamettana danddayennabadan, qassi Xoossay kessido maaraa naagana danddayennabadan qoppana danddayaasa. Pediro giyo yelagawu hegaadan siyettiis. I hagaadan giis: “Taani he paaciyan zaaretta kunddiyo wode, hidootaa qanxxays. Ta nagaray mule atto geetettennabadan qoppays. Qassi woossanawukka metootays.”

Neessikka hegaadan siyettikko, aynne baawa minna. Nebay giigennaba gidenna. Daro yelagatinne gasttati mastterbeeshiniyaa meeziyaa aggidosona. Neenikka aggana danddayaasa!

Azzanuwaa Aggiyoogaa

Qommoora beꞌidoogaadan, mastterbeeshiniyaa meezee paace gidido asati darotoo keehi azzanoosona. Xoossaa ufayssiya ogiyan ‘azzaniyoogee’ he meeziyaa agganawu wolqqaa immees. (2 Qoronttoosa 7:11) SHin keehi azzaniyoogee ubba yaa iita. Hegee neeni hidootaa qanxxada, he meeziyaappe haakkanawu baaxetiyoogaa agganaadan oottana danddayees.—Leemiso 24:10.

Yaatiyo gishshawu, yohuwaa bessiya ogiyan xeellanawu baaxeta. Mastterbeeshinee tuna meezetuppe issuwaa. Qassi neeni ‘dumma dumma ufayssaassi aylledan haarettanaadaaninne’ iitabaa qoppanaadan oottiyaaba. (Tiitu 3:3) Gidoppe attin, mastterbeeshinee shaaramuxiyoogaa keena wolqqaama nagara gidenna. (Yihudaa 7) Mastterbeeshinee neessi paace gidikko, atto geetettenna nagaraa oottidabadan qoppoppa. Waannabay he paaciyaa eqettiyoogaanne baaxetiyoogaa mule aggennaagaa!

Issi uri paaciyan zaaretti kunddiyo wode azzanana danddayees. Hegaa mala wodiyan, Leemiso 24:16y yootiyoobaa hassayana koshshees; xiqisee hagaadan gees: “Xillo asi laapputoo kunddikkokka denddees; shin iitati metuwan xayana.” Amarida wodiyawu he paaciyan kunddiyoogee neeni iita asa gidiyoogaa bessenna. Hegaa gishshawu, hidootaa qanxxoppa. SHin he meeziyaa denttettiyaabaa akeekada, he hanotaappe haakkanawu mala.

Xoossaa siiquwaabaanne A maarotaabaa wotta denttada qoppa. Daafuranchcha gidiyoogaappe denddidaagan issi issitoo nagaraa oottida, mazamuraawiyaa Daawiti hagaadan giis: “Aawai ba naatuyyo qarettiyoogaadan, hegaadankka GODAI baassi yayyiyaageetuyyo qarettees. Aissi giikko, nuuni aibippe merettidaakkonne i erees; nuuni biitta gidiyoogaa i akeekees.” (Mazamure 103:13, 14) Ee, Yihooway nuuni nagaranchcha gidiyoogaa akeekidi, “atto giyaagaa.” (Mazamure 86:5) Gidikkokka, nuuni laamettanawu baaxetana mala koyees. Yaatiyo gishshawu, neeni he meeziyaa agganawu ay oottana danddayay?

Allaxxiyoobaa akeeka. Mattumaa koshshaa denttettiya pilmiyaa, televizhiine prograamiyaa woy weyb saytiyaa beꞌay? Mazamuraawee Xoossaakko hagaadan giidi eratetta woosaa woossiis: “Pattennabaa xeellenna mala ta aifeta teqqa.”b—Mazamure 119:37.

Harabaa qoppanawu baaxeta. Wiliyama giyo Kiristtaanee hagaadan giidi zoriis: “Xiskkanaappe kase ayyaanaabaa nabbaba. Gallassaa wurssettan ayyaanaabaa qoppiyoogee keehi koshshiyaaba.”—Piliphphisiyuusa 4:8.

Ne metuwaa issi urawu yoota. He allaalliyaa ne ulottiyo urawu yootanawu yeellatana danddayaasa. SHin yootiyoogee he meeziyaa agganawu maaddana danddayees! Devida giyo Kiristtaanee hegaadan oottiis. I hagaadan giis: “Ta aawaayyo hegaabaa xuuraas. I giidobaa mule dogikke. Minttettiya hanotan I moocu giidi, ‘Nenan keehi ufayttaas’ yaagiis. Hegaa awu yootanawu taani ay keena xalidaakko I akeekiis. I giidobay tana keehi minttettiisinne murttanaadan maaddiis.

“Ta aaway taani iita asa gidennaagaa akeekanaadan amarida xiqiseta bessidi, he meezee bala gidiyoogaa bessanawu hara xiqiseta nabbabiis. I hara wodekka hegaabaa denttidi tobbanawu qaalaa geliis. Taani he paaciyan zaarettada kunddikko hidootaa qanxxana bessennaagaa, qassi kunddennan adussa wodiyaa takkanawu baaxetana koshshiyoogaa yootiis.” Davidi woygi kuuyidee? I hagaadan giis: “Ta metuwaa asawu yootada, maaduwaa demmidoogee tana keehi maaddiis.”c

KAALLIYA SHEMPPUWAN Demmido asa ubbaara mattumaa gayttiyoogee balee? He oyshaa zaaruwaa akeeka.

[Tohossa qofata]

WAANA XIQISETA

“Neeni iita wodallatetta amuwaappe baqata. Banttana maaddanau geeshsha wozanaappe Godaa xeesiyaageetuura issippe, xillotettaa, siiqotettaanne sarotettaa minttada kaalla.”—2 Ximootiyoosa 2:22.

ZORIYAA

Mattumaa amoy wolqqaamanaappe kasetada woossa. Qassi, paaciyaa eqettanawu maaddiya ‘ubbaappe aadhdhiya wolqqaa’ immanaadan Xoossaa Yihoowa oychcha.—2 Qoronttoosa 4:7.

HAGAA ERAY?

SHugo asi mattumaa amuwan xoonettana danddayees. SHin mino asi barkka deꞌiyo wodekka, ba huuphiyaa naagees.

OOTTANABAA!

Taani geeshshabaa qoppanawu oottanabay ․․․․․

Mattumaa amuwan xoonettiyoogaappe, oottanabay ․․․․․

Yelidaageeta oychchanabay ․․․․․

NE QOFAY AYBEE?

● Yihooway “atto giyaagaa” gidiyoogaa hassayiyoogee koshshiyoy aybissee?—Mazamure 86:5.

● Mattumaa koshshay deꞌanaadan oottidi Xoossay asaa medhdhiis; qassi I neeni ne huuphiyaa naagana koshshiyoogaa yootiis. Yaatin I neeni ay oottana danddayiyoogaa ammanettii?

[Qonccissuwaa]

He meeziyaa aggoosaappe Yihoowa sinttan tawu geeshsha kahay deꞌees; qassi hegee taani aybiiranne laammennaba!—Saaro

[Misiliyaa]

Woxxiya uri kunddiyo wode wotti yeggi doommenna; mastterbeeshiniyaa paaciyan zaaretti kunddiyoogeekka kase oottido loꞌꞌobaa hada oottenna