Asho Gaytotettaa Xeelliyaagan Denddiya Tammu Oyshatu Zaaruwaa

1 Addaameenne Hewaana Edene gannatiyan oottido koyro nagaray asho gaytotettaa poliyoogee?

▪ Zaaruwaa: Daro asay Edene gannatiyan Xoossay mooppite giido mittaa ayfee asho gaytotettaa malaatees giidi qoppees. Gidikkokka, Geeshsha Maxaafay tamaarissiyoy hegaadaana gidenna.

Ane hagaa qoppa: Xoossay Addaamee “lo77uwaanne iitaa erissiya mittaa teeraappe” meennaadan azazidoy ubba Hewaano medhanaappe kase. (Doo. 2:15-18) He wode Addaamee barkka deꞌiyo gishshau, he azazoy asho gaytotettaara gayttidaba gidenna. Hegaa bollikka, Xoossay Addaamanne Hewaano, “Yelettite; corattite; ha sa7aa [kumite]” yaagidi, qoncce azazuwaa azaziis. (Doo. 1:28) Siiqiya Xoossay koyro azinaynne machiyaa ‘saꞌaa kumaanaadan,’ giishin asho gaytotettaa gujjiya azazuwaa azazidi, eti a azazuwaa naagido gishshau hayqqanaadan pirddanee?—1 Yoh. 4:8.

Hegaa bollikka, meennaadan Xoossay yootido “mittaa teeraappe ekkada” Hewaana miyo wode, i azinay iira deꞌenna. Hegaappe simmin, “banaara de7iya ba azinaayyookka hegaappe immin, ikka miis.”—Doo. 3:6.

Wurssettan, Addaameenne Hewaana asho gaytotettaa polidi naata yelido wode, Yihooway eta moorancha gibeenna. (Doo. 4:1, 2) Addaameenne Hewaana miido mittaa teeray eti asho gaytotettaa polidoogaa bessiyaaba gidennan, mitta ayfe gidiyoogee qoncce.

2 Geeshsha Maxaafay asho gaytotettaa poliyoogan ufayttennaadan diggii?

▪ Zaaruwaa: Asaa “attumaasanne maccaasa” oottidi medhiday Xoossaa gidiyoogaa Geeshsha Maxaafan koyro maxaafay qonccissees. Xoossay i medhidobay “daro lo77o gididoogaa” yootiis. (Doo. 1:27, 31) Guyyeppe, Geeshsha Maxaafaa xaafidaageetuppe issoy azinata, “Yelagatettan neeni ekkido ne maccaaseera ufaitta. . . . I xanttai ubba wodekka nena alo” yaagidi zoranaadan Xoossay ba ayyaanan denttettiis. (Lee. 5:18, 19) Ha qofay asho gaytotettaa poliyoogan ufayttennaadan Geeshsha Maxaafay diggiyoogaa bessii?

Xoossay saalaa bollata medhidoy naata yelana xallaassa gidennan, azinaynne machiyaa naaꞌꞌaakka ufayssiya ogiyan issoy issuwau bantta siiquwaa qonccissanaadaana gidiyoogaa naqaashay bessees. Hegaa mala gaytotettay, issoy issuwaara siiqettiya azinaynne machiyaa asatettaaninne qofan banttau koshshiyaabaa kunttanaadan oottana danddayees.

3 Issi attumaageenne maccaara higgiyaa maaraadan aqo oyqqennan issippe deꞌiyoogaa Geeshsha Maxaafay kaafii?

▪ Zaaruwaa: Geeshsha Maxaafay “Xoossai . . . shaaramuxiyaageeta” pirddanaagaa qonccissidi yootees. (Ibr. 13:4) SHaaramuxiyoogaa geetettida, porniya giya Giriiketto qaalay, azinanne macho gidennaageeti saalaa bollata bessenna ogiyan goꞌettiyoogaa malaatees.a Yaatiyo gishshau, eti sinttappe azinanne macho gidanau qoppiyaaba gidikkokka, issi attumaageenne maccaara issippe deꞌiyoogee Xoossaa xeelan bala.

Issi attumaageenne maccaara issoy issuwaara keehippe siiqettiyaaba gidikkokka, eti asho gaytotettaa polanaappe kase higgiyaa maaraadan azinanne macho gidanaadan Xoossay koyees. Nuuni siiqanaadan oottidi medhidaagee Xoossaa. Xoossaa waanna eeshshay siiquwaa. Yaatiyo gishshau, kaalliya huuphe yohoy qonccissiyoogaadan, higgiyaa maaran aqo oyqqidaageetu xallay asho gaytotettaa polanaadan Xoossay azaziyo loꞌꞌo gaasoy deꞌees.

4 Dawutaa ekkiyoogee likkee?

▪ Zaaruwaa: Xoossay beni wode issi uri dawuttaa ekkanaadan amarida wodiyau paqqadiis. (Doo. 4:19; 16:1-4; 29:18–30:24) SHin dawuttaa ekkiyoogaa doomissiday Xoossaa gidenna. I Addaameyyo issi macho xallaa immiis.

Xoossay koyro kessido, issi macho xallaa ekkiyo maaraa zaarettidi essanaadan Yesuusau maataa immiis. (Yoh. 8:28) Aqo deꞌuwaa xeelliyaagan asay oychido wode Yesuusi, “Xoossai koiro eta medhdhiiddi, attumaasanne maccaasa oottiis. Hegaa gishshau, ‘Issi asi ba aawaanne ba aayyiyo aggi bayidi, ba machcheera issippe de7ees; eti naa77ai issi asa gidoosona’” yaagiis.—Maa. 19:4, 5.

Yesuusi erissiyo ashkkaratuppe issoy Xoossaa ayyaanay denttettin guyyeppe, “Attumaasaassi huuphiyan huuphiyan machchiyaa de7u. Qassi maccaasaassi huuphiyan huuphiyan azinai de7o” yaagidi xaafiis. (1 Qor. 7:2) Gubaaꞌiyan aawatetta maati imettiyo, ekkida uri ooninne, “issi machchee xalaalai de7iyoogaa” gidana bessiyoogaakka Geeshsha Maxaafay yootees.—1 Xim. 3:2, 12.

5 Azinaynne machiyaa yeluwaa teqqiyaabaa goꞌettiyoogee balee?

▪ Zaaruwaa: Yesuusi bana kaalliyaageeti naꞌa yelanaadan azazibeenna. Qassi Yesuusi erissiyo ashkkaratuppe ooninne hegaa mala azazo azazibeenna. Geeshsha Maxaafay yelo teqqiyaabaa goꞌettiyoogaa diggiyaabaa aybanne yootenna.

Yaatiyo gishshau, aqo oyqqidaageeti naꞌa yelanau woy agganau kuuyana danddayoosona. Eti aappun naata yelana bessiyaakko, qassi awude yelana bessiyaakkokka kuuyana danddayoosona. Yeluwaa teqqiya, shahaarikko boshettanaadan oottennabaa goꞌettanau azinaynne machiyaa doorikko, hegee eti buzo kuuyiyoobanne oyshettiyooba.b Eti hegaa mala yeluwaa teqqiyaabaa goꞌettikko, ooninne eta mooranchadan xeellana koshshenna.—Roo. 14:4, 10-13.

6 SHahaara kesissiyoogee balee?

▪ Zaaruwaa: Deꞌoy Xoossaa xeelan geeshsha; qassi biron aayee uluwan tilettidaagaakka i deꞌon deꞌiyaabadan xeellees. (Maz. 139:16) Issi maccaasee uluwan deꞌiya shahaaray qohettanaadan oottida uri qaxxayettanaadan Xoossay yootiis. Yaatiyo gishshau, uluwan deꞌiya yeluwaa woriyoogee Xoossaa xeelan shemppo woriyoogaa.—Kes. 20:13; 21:22, 23.

Yaatin, issi maccaasiyaa yeliyo wode, aayyiyaa woy naꞌay hayqqiyoogaappe issuwaa dooranaadan oottiya unꞌꞌissiyaabay azinaanne machiyo gakkikko shin? Hegaa mala hanotan ooni attikko loꞌꞌokko azinaynne machiyaa kuuyana koshshees.c

7 Machiyo yeddiyoogaa woy azinaappe anjjettiyoogaa Geeshsha Maxaafay paqqadii?

▪ Zaaruwaa: Machiyo yeddiyoogaa woy azinaappe anjjettiyoogaa Geeshsha Maxaafay paqqadees. SHin Yesuusi, “Ba machchiyo shaaramuxennan de7ishin yeddidi, haranno ekkiya ooninne shaaramuxees” yaagidi, machiyo yeddanau gaaso gidiyay issiba xalla gidiyoogaa qonccissiis.—Maa. 19:9.

Cimmidi woy kaddidi machiyo yeddiyoogaa Xoossay ixxees. Pattennaban ba machiyo yeddiya uri, ubba qassi hara machiyo ekkanaassi giidi hegaadan oottiya uri Xoossan oyshettees.—Mil. 2:13-16; Mar. 10:9.

8 Issi mala mattumay deꞌiyoogeeti asho gaytotettaa poliyoogaa Xoossay paqqadii?

▪ Zaaruwaa: SHaaramuxiyoogaa Geeshsha Maxaafay qoncciyan diggees; hegee issi mala mattumay deꞌiyoogeeti poliyo asho gaytotettaakka gujjees. (Roo. 1:26, 27; Gal. 5:19-21) Hegaa mala deꞌuwan Xoossay ufayttennaagaa Geeshsha Maxaafay qonccissi yootiyaaba gidikkokka, “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa [immidoogaa]” nuuni eroos.—Yoh. 3:16.

Tumu Kiristtaaneti issi mala mattumay deꞌiyoogeeti poliyo asho gaytotettaa xaasayi xeellennaba gidikkokka, ubba asau kehoosona. (Maa. 7:12) Nuuni “asa ubbaa” bonchanaadan Xoossay koyees. Yaatiyo gishshau, tumu Kiristtaaneti hegaa mala asata ixxokkona.—1 PHe. 2:17.

9 Silkkiyaa woy moobayliyaa woy intternneetiyaa asho gaytotettaabau goꞌettiyoogee balee?

▪ Zaaruwaa: Silkkiyaa borssobau goꞌettiyoogee, asho gaytotettaara gayttida pokkobaa silkkiyan haasayiyoogaa woy siyiyoogaa gujjees. Moobayliyaa borssobau goꞌettiyoogee pokko misiliyaanne kiitaa haraatuyyo kiittiyoogaara gayttidaba. Intternneetiyaa borssobau goꞌettiyoogee pokkobaa intternneetiyan tobbiyoogaa gujjees.

Ha wodiyan oottiyo hegaa malabaa Geeshsha Maxaafay shaakkidi yootenna. SHin hagaadan gees: “Geeshshatuyyo bessiyaagaadan, intte giddon shaaramuxiyoogeenne tunatetta ubbai, woi miishsha amottiyoogee mulekka siyettoppo. Yeellayiyaabainne eeyya haasayai woi pattenna qiree intteyyo bessennabaa gidiyo gishshau, intte matan mulekka de7oppo.” (Efi. 5:3, 4) Silkkiyaa woy moobayliyaa woy intternneetiyaa asho gaytotettaabau goꞌettiyoogaa malabay asho gaytotettau bala qofaa oyqqanaadan oottees; qassi asay aqo lagge gidenna uraara asho gaytotettaa poliyoogan ufayttanaadan minttettees. Hegaa malabay asay asho gaytotettaa koshshaa teqqiyoogaappe, ba koyidobaa oottanaadan denttettees.

10 Mastterbeeshiniyaa xeelliyaagan Geeshsha Maxaafay woygii?

▪ Zaaruwaa: Geeshsha Maxaafay mastterbeeshiniyaabaa, giishin issi uri ba attumatettaa woy maccatettaa bosherettiyoogan asho gaytotettaa qaaqqaa denttettidi, he qaaqqaa aliyoogaabaa shaakki yootenna. Gidikkokka, Xoossaa Qaalay, “Hegaa gishshau, inttenan de7iya ha sa7aa amota worite; hegeetikka shaaramuxiyoogaa, tunatettaa, shaaramuxanau koyiyoogaa” yaagidi Kiristtaaneta azazees.—Qol. 3:5.

Mastterbeeshinee, asay asho gaytotettaaban bala qofaa, qassi ba xallaa siiqiyoogaa bessiya qofaa oyqqanaadan oottees. Hegaa mala meeziyaa xoonanau wozanappe baaxetiyaageetuyyo Xoossay “ubbaappe aadhdhiya [wolqqaa]” immanaagaa Geeshsha Maxaafay yootees.—2 Qor. 4:7; Pili. 4:13.

[Tohossa qofata]