Xoossaa Kawotettay Aybee?

1. Xoossaa Kawotettay aybee?

Xoossaa Kawotettay saluwan deꞌiya ayso. He Kawotettay asaa kawotetta ubbaa xayssidi Xoossaa shenee saluwan hanidoogaadan saꞌan hananaadan oottana. Xoossay ba Kawotettan hegaadan oottiyoogee mishiraacho. Asaa naati koyiyo loꞌꞌo aysuwaa Xoossaa Kawotettay mata wode ehaana. He Kawotettay saꞌan deꞌiya asa ubbau issippetettay deꞌanaadan oottana.​—Daaneela 2:44; Maatiyoosa 6:​9, 10; 24:14 nabbaba.

Kawotettau kawoy deꞌana bessees. Yihooway ba Naꞌaa, Yesuus Kiristtoosa Ba Kawotettau Kawo oottidi sunttiis.​—Ajjuutaa 11:15 nabbaba.

Xoossaa Kawotettay Aybee? Giya Biiduwaa Xeella

2. Yesuusi dumma Kawo gididoy aybissee?

Xoossaa Naꞌay dumma Kawo; ayssi giikko, i kehanne loꞌꞌo gididabaa mintti kaallees. (Maatiyoosa 11:28-30) Qassi asaa maaddanau gidiya wolqqay au deꞌiyo gishshau, i saluwan uttidi saꞌaa haarana. I hayquwaappe denddi simmidi, saluwaa biidi Yihoowayyo ushacha baggaara uttidi naagiis. (Ibraawe 10:​12, 13) Wurssettan, i haariyoogaa doommanaadan Xoossay au maataa immiis.​—Daaneela 7:​13, 14 nabbaba.

3. Yesuusaara haaranaageeti oonee?

‘Geeshsha asata’ geetettidaageeti saluwan Yesuusaara haarana. (Daaneela 7:27) Koyro doorettida geeshsha asati Yesuusi kiittido ammanettida asata. Yihooway geeshsha asata geetettida ammanettida attuma asatanne macca asata hanno gakkanau dooriiddi deꞌees. Eti Yesuusaagaadan ayyaana mereta gididi hayquwaappe denddoosona.​—Yohaannisa 14:​1-3; 1 Qoronttoosa 15:​42-44 nabbaba.

Saluwaa biya asay aappunee? Yesuusi eta ‘amarida dorssa wodiyaa’ yaagidi xeegiis. (Luqaasa 12:32) Eta qooday muleera 144,000. Eti Yesuusaara saꞌaa haarana.​—Ajjuutaa 14:1 nabbaba.

4. Yesuusi haariyoogaa doommido wode hanettidabay aybee?

Xoossaa Kawotettay 1914n haariyoogaa doommiis.a Yesuusi Kawo gidi simmidi koyro Seexaanaanne daydanttata duge saꞌau oliis. Seexaanay keehippe hanqqettidi kumetta saꞌan wolqqaama metuwaa ehiyoogaa doommiis. (Ajjuutaa 12:​7-10, 12) He wodeppe doommidi, asaa naata ayyeꞌana giissiyaabay dariis. Olay, koshay, wurssiya harggeenne biittaa qaattay, Xoossaa Kawotettay mata wode kumetta saꞌaa haaranaagau ‘malaata’ gidiyaabatuppe amaridaageeta.​—Luqaasa 21:​7, 10, 11, 31 nabbaba.

5. Xoossaa Kawotettay poliyoobay aybee?

Alame yuushuwan sabbakiyo oosuwaa baggaara Xoossaa Kawotettay ubba biittan deꞌiya zawi baynna daro asay issippetettaa medhanaadan oottiiddi deꞌees. Miilooniyan qoodettiya ashkke asay Yesuusau haarettiiddi deꞌees. Xoossaa Kawotettay saꞌan deꞌiya iita siraataa xayssiyo wode eta ashshana. Hegaa gishshau, Xoossaa Kawotettaa haaruwan goꞌettanau koyiya ubbay Yesuusau haarettiyoogaa tamaarana koshshees.​—Ajjuutaa 7:​9, 14, 16, 17 nabbaba.

Xoossay asaa naatussi koyro halchidobaa, Xoossaa Kawotettay 1,000 laytta giddon polana. Kumetta saꞌay gannate gidana. Wurssettan, Yesuusi Kawotettaa ba Aawaayyo zaaridi immana. (1 Qoronttoosa 15:​24-26) Xoossaa Kawotettaabaa oossi yootana koyay?​—Mazamure 37:​10, 11, 29 nabbaba.