Yesuusi Xoossaa Kawotettaabaa Ay Tamaarissidee?

“Yesuusi Xoossaa kawotettaa mishiraachchuwaa yootiiddi, dumma dumma gita katamaanne guutta katamaa bees.”—LUQAASA 8:1.

NUUNI nashshiyoobaanne xoqqu oottidi xeelliyoobaa haasayanau koyoos. Yesuusi ba huuphe, “Doonai wozana giddon kumidabaa haasayees” yaagiis. (Maatiyoosa 12:34) Yesuusi saꞌan deꞌiyo wode tamaarissidobaa nuuni qoppiyo wode, Xoossaa Kawotettay i xoqqu oottidi xeelliyooba gidiyoogaa akeekana danddayoos.

Xoossaa Kawotettay aybee? Kawotettay issi kawoy ayssiyo ayso. Yaatiyo gishshau, Xoossaa Kawotettay Xoossay essido ayso. Yesuusi Xoossaa Kawotettaa ba tamaarissiyoobau waanna yoho oottidi aahuwan yootiis. Oyddu Wonggeletun 110⁠ppe dariya sohuwan he Kawotettaabaa yootiis. SHin Yesuusi tamaarissidoy yootiyoogaa xallaana gidenna. I oottidobaappekka, Xoossaa Kawotettaabaanne he Kawotettay oottanabaa xeelliyaagan darobaa tamaaroos.

Kawoy oonee? Xoossaa Kawotettaa Kawoy asan doorettidaagaa gidenna. He Kawuwaa dooriday Xoossaa. Kawo gidanaadan Xoossay dooridoy bana gidiyoogaa Yesuusi ba timirttiyan qonccissiis.

Geeshsha Maxaafaa hiraagan yaana geetettida Masee merinaa Kawotettan haaranaagaa Yesuusi erees. (2 Sameela 7:12-14; Daaneela 7:13, 14; Maatiyoosa 26:63, 64) Qaalaa gelido Masee bana gidiyoogaa Yesuusi qoncciyan yootidoogaa hassaya. Yaatiyoogan, i Xoossay sunttido Kawo gidiyoogaa Yesuusi qonccissiis. (Yohaannisa 4:25, 26) Yesuusi darotoo “ta kawotettai” giya qaalaa goꞌettidoogee hegaara moggiyaaba.—Yohaannisa 18:36.

He Kawotettan banaara haariya harati deꞌiyoogaakka Yesuusi tamaarissiis. (Luqaasa 22:28-30) Eta qooday guutta gidiyo gishshau, Yesuusi banaara haariyaageeta: ‘Amarida dorssa wudiyaa’ yaagiis. I eta xeelliyaagan, ‘eta Aaway ba kawotettaa etassi immanau ufayttiyoogaa’ yootiis. (Luqaasa 12:32) Kiristtoosaara haariyaageeti muleera 144,000 gidiyoogaa Geeshsha Maxaafan wurssetta maxaafay qonccissees.—Ajjuutaa 5:9, 10; 14:1.

Kawotettay deꞌiyoy awaanee? Roma asa gidida, biittaa haariya PHenxxeniyaa PHilaaxoosassi Yesuusi: “Ta kawotettai ha sa7aana gidenna” yaagiis. (Yohaannisa 18: 36) Kiristtoosi ayssiyo Xoossaa Kawotettaa kalꞌꞌatidi haariyay asa gidenna. Yesuusi darotoo Xoossaa Kawotettaa “saluwaa kawotettaa”a yaagiis. (Maatiyoosa 4:17; 5:3, 10, 19, 20) Yaatiyo gishshau, Xoossaa Kawotettay saluwaa ayso.

Yesuusi saꞌan deꞌiyo wodee wuri simmin saluwaa baanaagaa ammanettidi naagiis. I banaara issippe haariyaageeti baakko yaanaadan yan ‘sohuwaa giigissanaagaa’ yootiis.—Yohaannisa 14:2, 3.

Kawotettay ay oottanee? Yesuusi ba tamaarissiyoogeeti: “Ne kawotettai yo; ne shenee saluwan hanidoogaadan, sa7ankka hano” yaagidi Xoossaakko woossanaadan tamaarissiis. (Maatiyoosa 6:9, 10) Xoossaa shenee saluwan haniiddi deꞌees. Xoossay saꞌaassi halchidobay he Kawotettaa baggaara polettees. Hegaa polanau Kawotettay ha saꞌan keehi maalaaliyaaba oottana.

Kawotettay saꞌan ay oottanee? Xoossaa Kawotettay iitabaa oottanau murttidaageeta xayssiyoogan iitatettaa muleera xayssanaagaa Yesuusi tamaarissiis. (Maatiyoosa 25:31-34, 46) Hegee mooroynne iitatettay ubbay xayana yaagiyoogaa. “Ashkketi,” xilloti, maariyaageeti, “wozanaa geeshshati,” qassi sarotettaa medhiyaageeti ha saꞌan deꞌanaagaa Yesuusi tamaarissiis.—Maatiyoosa 5:5-9.

He ammanettida asati deꞌanay moorettida saꞌanee? CHii gidenna! Xoossaa Kawotettaa haaruwan ha saꞌay maalaaliya hanotan laamettanaagaa Yesuusi yootiis. Yesuusa miyyiyan kaqettida bitanee Yesuusa: “Neeni ne kawotettaa wolqqan yiyo wode, tana dogoppa” yaagiis. Yesuusi ayyo: “Hachi taani neessi tumaa odays; neeni tanaara Gannatiyan deꞌana” yaagiis. (Luqaasa 23:42, 43, NW) Ee, Xoossaa Kawotettay kumetta saꞌaa beni Edene ataakiltte sohuwaadan gannate oottana.

Kawotettay asaa naatussi harabaa ay oottanee? Yesuusi Xoossaa Kawotettay oottiyoobaa yootiyoogaappe aadhiyaabaa oottiis. I he Kawotettay oottanabaakka bessiis. Yesuusi maalaaliya hanotan daro asaa pattiis; yaatiyoogan sinttappe ba Kawotettan aahuwan polanabaa xeeraa bessiis. Ayyaanaa kaaletuwan xaafettida Wonggelee Yesuusabaa: “Aihuda woosa keettatun tamaarissiiddi, kawotettaa wonggeliyaa mishiraachchuwaa yootiiddinne, qassi hargge ubbaappenne saho ubbaappe asaa pattiiddi, Galiila biitta ubban yuuyiis” yaagees.—Maatiyoosa 4:23.

Yesuusi daro qommo harggiyaappe asaa pattiis. I “qooqe gididi yelettida asa aifiyaa” pattiis. (Yohaannisa 9:1-7, 32, 33) Yesuusi inchirichay oyqqido issi bitaniyau qaretti bochidi a pattiis. (Marqqoosa 1:40-42) Asay “tullenne duude gidida bitaniyaa” akko ehiido wode Yesuusi, ‘tulliyaakka sissana qassi duudiyaakka haasayissana’ danddayiyoogaa bessiis.—Marqqoosa 7:31-37.

Hayqqidaageetakka denttanau Xoossay sunttido Kawuwau wolqqay deꞌees. Yesuusi hayqqidaageeta denttidoogaa yootiya heezzu taarikee xaafettiis. Issi amꞌꞌe mishiree mexi issi naꞌaa, 12 laytta naꞌiyoonne ba siiqo dabbuwaa Alꞌꞌaazara hayquwaappe denttiis.—Luqaasa 7:11-15; 8:41-55; Yohaannisa 11:38-44.

Xoossaa Kawotettau haarettiyaageeti sinttappe demmana maalaaliyaaba Yesuusi kiitettida Yohaannisa baggaara: “Xoossaa keettai asaara de7⁠ees; Xoossai asaara issippe de7ana. Eti a asa gidana; Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7⁠enna. Aissi giikko, ceegabai xayiis” yaagidi kasetidi yootiis. (Ajjuutaa 1:1; 21:3, 4) Azzanidi afuxxiyoogee, sahoynne hayqoy baynna alamiyaa issi kutti qoppa! Xoossaa shenee saluwan haniiddi deꞌiyoogaadan saꞌan hananaadan woossiyo woosay kumetta hanotan he wode polettana.

Xoossaa Kawotettay awude yaanee? Yesuusi kawotettan haariyo wodeenne i ba ‘yuussaa’ yaagido dumma wodee doommiyoy issi wodiyaana gidiyoogaa yootiis. I kawo gididi yiyo wodee doommiyoogaa bessiya darobaa oyqqida hiraagaa yootiis. He wodee olaa, koshaa, biittaa qaattaa, wurssiya harggiyaanne makkalaa gujjin kumetta saꞌan gakkiya metuwan erettiya wode gidana. (Maatiyoosa 24:3, 7-12; Luqaasa 21:10, 11) Hegeetinne he wodiyaa xeelliyaagan Yesuusi yootido hara darobati, 1914n Koyro Alamiyaa Olay denddido wodiyaappe doommin keehippe qonccidosona. Yaatiyo gishshau, haꞌꞌi Yesuusi Kawo gididi haariiddi deꞌees. Kawotettay yiyoonne Xoossaa shenee saꞌan haniyo wodee matattiis.b

Xoossaa Kawotettay yiyoogee nena waatidi bochii? Hegee neeni Yesuusa timirttiyau immiyo zaaruwan baasettidaba.

[Tohossa qofata]