Geeshsha Maxaafay Tana Waati Maaddana Danddayii?

NEENI AY OOTTANEE?

Ha hanotaa qoppa: Daawiti qammi xuman issisaa biiddi deꞌees. Saꞌay keehi xumido gishshawu, ogiyan deꞌiya malaataa akeekibeenna. Hegaa gishshawu, i ogiyaa baliis. I baanawu koyidosaa aggidi harasaa biis.

Neeni Daawita gidiyaakko waatuutee?

TAKKI GA QOPPA!

Neeni doorana danddayiyoobaa:

1. Asa oychaasa.

2. Baatiriyaa goꞌettaasa.

3. Neeni biyoosaa gakkanaagaa hidootada coo baasa.

Neeni C doorennaagee erettidaagaa.

Dooro B koyro dooruwaappekka kehees. Neeni baatiriyaa goꞌettiyoogee pooꞌissaydda suure ogiyan baanaadan maaddana.

Geeshsha Maxaafaykka nena hegaadan maaddana danddayees!

Keehi daro asawu deꞌiya ha maxaafay

• neeni metuwaa xoonanaadan maaddiyaabaa yootees

• neeni nebaa eranaadaaninne kaseegaappe loꞌꞌo asa gidanaadan maaddees

• neeni kaseegaappe loꞌꞌo deꞌuwaa deꞌanaadan maaddiyaabaa yootees

NUUNI OYCHIYO GITA OYSHATA ZAARIYOOGAA

Nuuni doonaa pogosaara hagaadan oychoos:

• Saloy hagaadan loꞌꞌiyoy aybissee?

• Xoolintteti aybippe merettidonaa?

Takkidi qassi alamiyaa hanotaabaa hagaadan oychoos:

• Asaa bolli iitabay gakkiyoy aybissee?

• Asay hayqqiyoy aybissee?

Ha oyshatu ubbaa zaaroy Geeshsha Maxaafan deꞌiyaaba gidikko shin?

Daro asay Geeshsha Maxaafaa hayse maxaafadan, ha wodiyawu hanennabadan woy akeekanawu metiyaabadan xeellees. SHin metoy deꞌiyoy, Geeshsha Maxaafaaneeyye asay Geeshsha Maxaafaabaa erays giyoobaanee? Geella eti balabaa tamaaridonaashsha?

Leemisuwawu, Geeshsha Maxaafay, ha alamiyaa haariyay Xoossaa yaagees giidi asay qoppees. SHin waanidi hegaadan hanana danddayii? Ha alamee shoraa xayiis! Azzanttiyaabaynne tuggay, harggeenne hayqoy, koshaynne daafabay dariis. Siiqiya Xoossay hegaa mala iitabay gakkanaadan oottanee?

Ha oyshatu zaaruwaa eranawu koyay? Ha alamiyaa haariyay oonakko Geeshsha Maxaafay yootiyooban neeni garamettana!

Ha brooshuriyan deꞌiya zoree Geeshsha Maxaafaappe ekettidaba gidiyoogaa akeekennan aggakka. Yihoowa Markkati Geeshsha Maxaafan keehi ammanttiya zoree deꞌiyoogaa ammanoosona. Hegawu gaasoy, ha maxaafay ‘Xoossaa ayyaanan xaafettidoogaa, qassi tamaarissanawu, balaa seeranawunne mooruwaa suurissanawu maaddiyoogaa.’ (2 Ximootiyoosa 3:16, 17) Beni xaafettidaba gidikkokka, ha wodiyawu haniya ha maxaafaa neenikka xannaꞌana bessees.