Erissiyo Ashkkarati Geeshsha Ayyaanaa Ekkidosona

Yesuusi saluwaa boosappe tammu gallassay aadhi simmin, i erissiyo ashkkarati geeshsha ayyaanaa ekkidosona. Hegee PHenxxaqosxxe gallassi 33 M.Ln haniis; asay baalaa bonchanawu daro biittaappe Yerusalaame yiis. Yesuusi erissiyo ashkkarati 120 gidiyaageeti pooqiyan deꞌiya kifiliyan issippe shiiqidosona. Qoppennan, issi maalaalissiyaabay haniis. Erissiyo ashkkaratu ubbaa huuphiyaa bollan tama laco milatiyaabay beettiis; beettin eti ubbay dumma dumma qaalan haasayiyoogaa doommidosona. Wolqqaama carkkuwaagaa mala cenggurssay keettaa kumiis.

Hara biittaappe Yerusalaame yiidaageeti he cenggurssaa siyidi, aybi hanidaakko beꞌanawu he keettaakko eesuwan biidosona. Erissiyo ashkkarati dumma dumma qaalaa haasayiyoogaa siyidi eti maalaalettidosona. Eti, ‘Ha asati Galiilappe yiidosona. Eti nu qaalaa waati haasayana danddayiyoonaa?’ yaagidosona.

He wode PHeexiroosinne kiitettida harati asaa sinttan denddi eqqidosona. PHeexiroosi Yesuusi waani hayqqidaakko, qassi Yihoowi a hayquwaappe waati denttidaakko asaayyo yootiis. PHeexiroosi hagaadan giis: ‘Yesuusi haꞌꞌi saluwan Xoossaappe ushacha baggan deꞌees; qassi Xoossay immana giido geeshsha ayyaanaa i gussiis. Intte ha maalaalissiyaabaa beꞌidoynne siyidoy hegaassa.’

PHeexiroosi yootidobay asaa denttetin eti, “Nuuni ai oottanee?” yaagidi oychidosona. I etayyo hagaadan giis: ‘Intte nagaraappe simmidi, Yesuusa sunttan haattan muukettite. Inttekka geeshsha ayyaanaa imotaa ekkana.’ He gallassi, 3,000 gidiya asay haattan muukettiis. He wodeppe doommidi, erissiyo ashkkaratu qooday Yerusalaamen eesuwan gujjiyoogaa doommiis. Geeshsha ayyaanay maaddin, Yesuusi azazido ubbabaa erissiyo ashkkarata tamaarissana mala kiitettidaageeti daro galchchata essidosona.