Yerusalaamen Naagiyoogaa

HAGAN deꞌiya asati Yesuusa kaalliyaageeta. Eti ayyo azazettidi Yerusalaamen takkidosona. Eti ubbay issippe naagiiddi deꞌishin, wolqqaama cenggurssay keettaa kumi aggiis. I wolqqaama carkkodan guummiis. Hegaappe tama laco milatiya inxxarssati erissiyo ashkkaratu ubbaa huuphiyaa bolli beettidosona. Eta ubbaa bolli deꞌiya tamaa beꞌay? He ubbabau birshshettay aybee?

Hegee maalaalissiyaaba! Yesuusi ba Aawaakko saluwaa simmidi, Xoossaa geeshsha ayyaanaa ba erissiyo ashkkaratu huuphiyan gussiiddi deꞌees. He ayyaanay eta ay ootisidaakko eray? Eti ubbay dumma dumma qaalan haasayiyoogaa doommidosona.

Yerusalaamen deꞌiya daro asay he wolqqaama carkkuwaagaa mala cenggurssaa siyidi, aybi hanettiiddi deꞌiyaakko beꞌanau yiidosona. Asaappe amaridaageeti Israaꞌeeletu PHenxxaqosxxe baalaa bonchchanau hara biittappe yiidaageeta. Beꞌanau yiida he asati ayba garamissiyaabaa beꞌidonaa! Eti bantta qaalan, erissiyo ashkkarati Xoossay oottido garamissiyaabaa haasayishin siyidosona.

Beꞌanau yiida asati: ‘Ha asati ubbaykka Galiila asa. Yaatin, nu yiido biittaa dumma dumma qaalaa waanidi haasayana danddayiyoonaa?’ yaagidosona.

PHeexiroosi etayyo yootanau denddi eqqiis. I ba qaalaa xoqqu oottidi, Yesuusa asay waati woridaakkonne qassi Yihooway a hayquwaappe waati denttidaakko yootiis. PHeexiroosi: ‘Yesuusi haꞌꞌi saluwan Xoossaassi ushachcha baggan deꞌees. Qassi qaalaa gelido geeshsha ayyaanaa i gussiis. Intte ha maalaalissiyaabaa beꞌidoynne siyidoy hegaassa’ yaagiis.

PHeexiroosi hegaa yootin, Yesuusa bolli gakkidaban daro asay keehippe azzaniis. Eti: ‘Nuuni ay oottana bessii?’ yaagidi oychchidosona. PHeexiroosi etassi: ‘Intte, intte deꞌuwaa laammidi xammaqettana bessees’ yaagiis. Hegaa gishshau, he gallassi 3,000 gidiya asati xammaqettidi Yesuusa kaalliyaageeta gididosona.