Yesuusi Simmidi Saluwaa Biis

AQI PEEꞌISHIN, Yesuusi bana kaalliyaageetussi darotoo qoncciis. Issitoo i erissiyo ashkkaratuppe 500 gidiyaageeti a beꞌidosona. Etayyo i qoncciyo wode, Yesuusi etau odidobi aybakko eray? Xoossaa kawotettaabaa yootiis. Yihooway Yesuusa saꞌau kiittidoy he Kawotettaabaa tamaarissanaasa. Ubba i hayquwaappe denddi simmidikka hegaadan oottiyoogaa aggibeenna.

Xoossaa kawotettay aybakko hassayay? Ee, he Kawotettay Xoossaappe gidida saluwan deꞌiya tumu ayso; qassi kawo gidanaadan Xoossay Dooridoogee Yesuusa. Nuuni tamaaridi aadhdhidoogaadan, Yesuusi namisettidaageeta mizidi, harggidaageeta pattidinne ubba hayqqidaageeta denttidi, i ayba loꞌꞌo kawo gidanaakko bessiis!

Hegaa gishshau, Yesuusi kawo gididi shaꞌau layttau saluwan haariyo wode, saꞌan aybi hananau deꞌii? Ee, kumetta saꞌay loꞌꞌiya gannate gidana. Hegaappe simmin ayba oli, makkali, harggee woy ubba hayqoykka deꞌenna. Xoossay saꞌaa asay ufayttidi deꞌiyo gannate gidanaadan medhdhido gishshau, hegee tuma gidiyoogaa eroos. I doomettan Edene atakkiltte sohuwaa giigissidoykka hegaassa. Yesuusikka, Xoossay hanana mala koyiyoobay wurssettan polettanaadan oottana.

Yesuusi simmidi saluwaa biyo wodee haꞌꞌi gakkiis. Yesuusi 40u gallassaassi ba erissiyo ashkkaratuyyo beettiiddi takkiis. Hegaa gishshau, eti i hayquwaappe denddidoogaa sirokkona. SHin i erissiyo ashkkarata aggidi baanaappe kase etayyo: ‘Intte geeshsha ayyaanaa ekkana gakkanaashin Yerusalaamen takkite’ yaagiis. Geeshsha ayyaanay Yesuusa kaalliyaageeti Xoossaa sheniyaa oottanaadan maaddiya, carkkiya carkko mala gidida, Xoossaa wolqqaa. Wurssettan Yesuusi: ‘Intte saꞌaa gaxaa gakkanaashin biidi tabaa sabbakana’ yaagiis.

Yesuusi hegaa gi simmin issi garamissiyaabi haniis. Neeni hagan beꞌiyoogaadan saluwaa pude denddiyoogaa doommiis. Hegaappe shaaray a genttin, erissiyo ashkkarati Yesuusa zaarettidi beꞌana danddayibookkona. Yesuusi saluwaa biidi, ba erissiyo ashkkarata yan uttidi haariyoogaa doommiis.