Kiristtaane Ammanoy Daro Biittaa Gakkiis

Yesuusi mishiraachuwaa kumetta saꞌaa gattanaadan azazidoogaa kiitettidaageeti azazettidosona. Anxxookiyan deꞌiya ishantti PHawuloosinne Barnnaabaasi sabbakanaadan 47 M.Ln kiittidosona. Mishetti sabbakiya he naaꞌꞌu asati Dabire, Lisxxiranne Iqooniyoone gujjin, Qeeri Isiyan ubbasaa biidosona.

Duriyawukka hiyyessawukka, yelagawukka cimawu PHawuloosinne Barnnaabaasi ubba asawu sabbakidosona. Kiristtoosabaa tumaa daro asay siyiis. PHawuloosinne Barnnaabaasi Sarggiyoosa PHawuloosa giyo Qophiroosa biittaa haariyaagawu sabbakiyo wode, issi shareechoy eta digganawu maliis. PHawuloosi shareechuwawu, ‘Yihoowi nena eqettees’ yaagiis. Sohuwaara, shareechoy qooqiis. Hegaa beꞌidi, deriyaa haariya PHawuloosi ammaniis.

PHawuloosinne Barnnaabaasi sooppe soo biidi, giyan, ogiyaaninne Ayhudatu woosa keettan sabbakidosona. Eti tohoy silido issi bitaniyaa Lisxxiran pattido wode, asay he maalaalissiyaabaa beꞌidi eti xoossata gi qoppidi etawu goynnanawu maliis. SHin PHawuloosinne Barnnaabaasi, ‘Xoossaa xalaalawu goynnite! Nuuni asa’ yaagidi eta diggidosona. Guyyeppe, amarida Ayhudati yiidi asay PHawuloosa bolli denddanaadan oottidosona. Asay a shuchan caddiis, a goochidi katamaappe gaxi kessiis, qassi hayqqiis giidi a hegan aggiigiis. SHin, PHawuloosi paxa deꞌees! Sohuwaara, ishantti a maaddanawunne katamaa guyye efaanawu yiidosona. Guyyeppe, PHawuloosi Anxxookiyaa simmiis.

PHawuloosi 49 M.Ln, haranttuwaa biyoogaa doommiis. I qeeri Isiyan deꞌiya ishantta beꞌi simmidi, Awurooppan darosan mishiraachuwaa yootiis. I Ateena, Efisoona, Piliphisiyuusa, Tasalonqqenne hara sohuwaa biis. Sillaasi, Luqaasinne Ximootiyoosa giyo yelagay PHawuloosaara issippe biidosona. Eti galchchata essanawunne galchchati minnanaadan maaddanawu issippe oottidosona. PHawuloosi Qoronttoosan deꞌiya ishantta minttettiiddi yan issi layttanne baggaa deꞌiis. I sabbakiis, tamaarissiis; qassi daro galchchatussi dabddaabbiyaa xaafiis. I dunkkaaniyaa sikkiyo oosuwaakka oottees. Guyyeppe, PHawuloosi Anxxookiyaa simmiis.

Takkidi, 52 M.Ln, Qeeri Isiyaa biyoogan PHawuloosi heezzantto hemetaa doommiis. I huuphessa baggan haahuwan deꞌiya Piliphisiyuusanne tohossa baggan deꞌiya Qoronttoosa biis. PHawuloosi tamaarissiiddi, asaa pattiiddinne galchchaa maaddiiddi Efisoonan amarida layttaa deꞌiis. I qassi timirtte keettaa addaraashan dere haasayaa ubba gallassi haasayiis. Daro asay i yootiyoobaa siyidi ba ogiyaa giigissiis. Wurssettan, mishiraachuwaa daro biittan sabbaki simmidi, PHawuloosi Yerusalaame biis.