Phauloosa Maaddiyoogaa Doommida Ximootiyoosa

KIITETTIDA PHauloosaara eqqida, neeni beꞌiyo ha wodallay Ximootiyoosa. Ximootiyoosi bantta soo asaara Lisxxiran deꞌees. A aayee sunttay Euniiqo; qassi a aayee aayee sunttay Loydo.

PHauloosi Lisxxira yiishin hagee assi heezzantto. PHauloosinne Barnnaabaasi ha sohuwaa sabbakanau koyro yiidoy, issi laytta gidiya wodeppe kase. Haꞌꞌi qassi PHauloosi ba laggiyaa Sillaaseera simmidi yiis.

PHauloosi Ximootiyoosayyo woygiiddi deꞌiyaakko eray? I: ‘Tanaaranne Sillaaseera buutee? Haaho biittan deꞌiya asaassi nuuni sabbakiyo wode, neeni nuna maaddana’ yaagiis.

Ximootiyoosi: ‘Ee, taani baana’ yaagidi zaariis. Hegaa gishshau, hegaappe simmidi, Ximootiyoosi sohuwaara bantta soo asaa aggidi PHauloosaaranne Sillaaseera biis. SHin nuuni eta buussaabaa tamaaranaappe kase, PHauloosa bolli aybi gakkidaakko ane beꞌoos. I Damasqqo biishin ogiyan, Yesuusi assi qonccoosappe 17n laytta heera gidiis.

PHauloosi Damasqqo biidoy Yesuusi erissiyo ashkkarata qohanaassa gidiyoogaa hassaya; shin haꞌꞌi i ba huuphe Yesuusi erissiyo ashkkara! Takkidi amarida morkketi Yesuusabaa i tamaarissiyoogaa dosibeenna gishshau, PHauloosa woranau koyidosona. SHin erissiyo ashkkarati PHauloosi baqatanaadan maaddidosona. Eti a keeshiyan yeggidi katamaa dirssaa gimbbiyaa bollaara duge wottidosona.

Hegaappe guyyiyan, PHauloosi sabbakanau Anxxookiyaa biis. Yesuusa kaalliyaageeti Kiristtaane geetettidi koyro xeegettidoy he sohuwaana. Hegaappe, PHauloosinne Barnnaabaasi sabbakanau Anxxookiyaappe haahosan deꞌiya biittata kiitettidosona. Eti biido katamatuppe issoy, Ximootiyoosi deꞌiyo Lisxxira katamaa.

Haꞌꞌi issi laytta gidiyaagaappe guyyiyan, PHauloosi zaarettidi Lisxxira yiis. Ximootiyoosi PHauloosaaranne Sillaaseera biido wode, eti au biidaakko eray? Karttaa xeella; yaatin he sohotuppe amaridaageeta ane tamaarana.

Koyro eti biidoy, matasan deꞌiya Iqooniyoone; hegaappe Anxxookiyaa geetettiya katamaa biidosona. Hegaappe guyiyan, Xiroꞌaada gakkanau biidosona; hegaappe Piliphphisiyuusa, Tasalonqqenne Beeriyaa biidosona. Karttaa bolli Ateena beꞌay? PHauloosi yan sabbakiis. Hegaappe guyyiyan eti issi layttanne baggaa Qornttoosan sabbakidosona. Wurssettan, guutta wodiyau Efisoonan takkidosona. Hegaappe, markkabiyan Qiisaariyaa simmidosona, qassi PHauloosi takkidosaa, Anxxookiyaa gakkanau biidosona. Yaatiyo gishshau, Ximootiyoosi “mishiraachchuwaa” sabbakuwaaninne daro Kiristtaane gubaaꞌeta essiyoogan PHauloosa maaddiiddi, daro xeetan qoodettiya kilo meetiriyaa hemettiis. Neeni diccada Ximootiyoosaagaadan Xoossaayyo ammanettida ashkkara giduutii?