Shiiqidaageetussi Giigida Qonccissuwa

MOKKIYAGEETA Mokkiyageetu oosoy inttena maaddiyogaa. Kaamiya essiyo sohuwa, cora asay hemettiyo sohuwa, uttiyo sohuwa asassi oyqqiyogaanne harabaa xeelliyagan eti yootiyobaa siyiyogan hayyanintta etaara hashetite.

HAATTAN MUUKETTIYOGAA Hara qonccissoy odettana xayikko, haattan muukettiyageetussi giigida sohoy madirakiyawu baazzan deꞌees. Haattan muukettanawu giigidaageeti Qeeraa galla maallado etawu giigida haasayay doomettanaappe kase he sohuwan uttana koshshees. Eti ubbay pooxaanne haattan muukettiyo wode maayiyo giiga maayuwa ehaana bessees.

MIISHSHAA IMMIYOGAA Shiiqoy ufayssiyagaanne Yihoowakko shiiqanawu maaddiyagaa gidanaadan, ubbawu gidiya oydee, cenggurssaanne biiduwa miishshati, qassi hara goꞌꞌiya darobati giigidosona; hegawu daro miishshay kiyiis. Intte intte dosan immiyo miishshaa he kessidobawunne kumetta saꞌan oosettiya oosuwa maaddanawu goꞌettoos. Miishshaa yeggiyo saaxineti shiiquwa sohuwan injjetiyasan deꞌoosona; qassi eta bolli qoncce malaatay deꞌees. Shin donate.jw.org saytiya xomoosiyogan hayyanintta, danddayikko intternneetiya baggaara immite. Intte miishshaa immiyo gishshawu keehi galatoos. Intte kehatettan immiyogan Kawotettaa oosuwawu koshshiyaban maaddiyo gishshawu, Oosuwa Kaalettiya Citay inttena galatees.

AKKAMUWAN KOYRO MAADUWA Hagee giigidoy qoppennan sahettidaageetu xallaassa gidiyogaa hayyanintta hassayite.

BAYI BEETTIDABATA WOTTIYOSAA Bayi beettida ubbabata he sohuwa efaana koshshees. Inttessi bayidabi deꞌikko, he sohuwa biidi inttebaa oychchidi ekkite. Bantta soo asaappe shaahettida naata he sohuwa efaana bessees. Shin hegaa gaasuwan harati unꞌꞌettennaadan, hayyanintta intte naata naagite, qassi eti ubbatoo intte matan deꞌiyakkonne xeellite.

UTTIYO OYDETA Hayyanintta haratussi qoppite. Uttiyosaa oyqqana bessiyoy, inttenaara issippe yiya, inttenaara issi keettan deꞌiyanne intte xannaꞌissiyo asatu xallaassa gidiyogaa hassayite. Intte matan deꞌiya mela oydiyan issi issibaa coo wottoppite.

DOSAN OOTTIYOBATA Killiliya shiiquwara gayttidaagan oosettiya dumma dummabata oottiyogan maaddanawu koyikko, hayyanintta ha kifiliyawu erissite.