Yesuusi Xoossay?

DARO asay Sillaasiyaa, “Kiristtaane ammanuwawu waanna timirtte” giidi qoppees. He timirttiyaa maaran, Aaway, Naꞌaynne xillo ayyaanay heezzaykka issi Xoossaa geetettoosona. Kardinal Jon Okonori Sillaasiyaabaa hagaadan giis: “Hegee hanno gakkanawu nuuni eriichchibeenna keehi geemmida xuura yoho.” Sillaasee akeekanawu keehi metiyaaba gidiyoy aybissee?

Zi Ilastireted Baybl Dikshineri giyo maxaafay hegawu issi gaasuwaa yootees. He maxaafay Sillaasiyaabaa hagaadan gees: “Geeshsha Maxaafan hegaa qonccissiya xiqisee baynna gishshawu, hegee Geeshsha Maxaafaa timirtte gidenna.” Sillaasee “Geeshsha Maxaafaa timirtte gidenna” gishshawu, Sillaasiyaa ammaniyaageeti he timirttiyaa kaafiyaabaa demmanawu xiqiseta koyoosona, ubba geellayoosona.

Ha Xiqisee Sillaasiyaabaa Tamaarissii?

Darotoo asay suure akeekenna xiqisetuppe issoy Yohaannisa 1:1. Wolayttatto Geeshsha Maxaafan he xiqisee hagaadan gees: “Qaalai koiro de7ees; qaalaikka Xoossaara [Giriikettuwan, ton teꞌon] issippe de7ees; qassi qaalai Xoossaa [teꞌos].” Ha xiqisiyan teꞌos (xoossaa) giya qaalay naaꞌꞌu ogetun qoncciis. Koyroogan Giriikettuwan erettidabaa qonccissiya ton giya qaalay kasetees; he sohuwan deꞌiya teꞌon giya qaalay Ubbaa Dandddayiya Xoossaa bessees. SHin naaꞌꞌanttoogan teꞌos giya qaalaa matan qonccissiya qaali baawa. Hegan qonccissiya qaalay baletti attidee?

Yohaannisa Wonggelee erettidabaa qonccissiya qaalaa goꞌetuwaa higgee deꞌiyo, daro asay haasayiyo Koyine giyo Giriikettuwan xaafettiis. Geeshsha Maxaafaa eranchchaa A. T. Robertseni issi qofa qashuwan yohuwaawaakka appe kaalliyaagaakka qonccissiya qaalati deꞌikko, “he naaꞌꞌatikka erettiyaaba qonccissiyaageeta, qassi issuwaa haran laammana danddayiyo issi mala qaaladan xeelettiyoogaa” yootiis. Robertseni hegaa leemisuwan qonccissanawu, “Goshshai [Giriikettuwan, ho agros] sa7aa [Giriikettuwan, ho kosmos]” yaagiya Maatiyoosa 13:38​n deꞌiya qofaa yootiis. Saꞌay goshshaa giikkokka qofay issi mala.

SHin Yohaannisa 1:1​n deꞌiyaagaadan, yohuwaawaa qonccissiya qaalay deꞌin, appe kaalliyaagawu baynnaba gidikko shin? Eranchchaa Jems Alen Hiweti ha xiqisiyaa leemisodan goꞌettidi hagaadan giis: “Hegaa mala qofa qashuwan yohuwaawaynne appe kaallidi deꞌiyaagee issi mala woy lagge gidokkona.”

Leemisuwan qonccissanawu, Hiweti “Xoossai poo7o” giya 1 Yohaannisa 1:5 goꞌettiis. Giriikettuwan “Xoossay” ho teꞌos geetettidi xaafettees; ho giyaagee erettiyaabaa qonccissiya qaala. SHin “pooꞌoy” qonccissiya qaalay baynnan fos geetetti xaafettiis. Hiweti, “Issi uri ubbatoo . . . Xoossaa pooꞌoy qonccissees gaana danddayees; shin pooꞌoy Xoossaa gaanawu ubbatoo danddayenna” yaagiis. “Xoossai ayyaana” yaagiya Yohaannisa 4:24​ynne “Xoossai siiqo” giya 1 Yohaannisa 4:16​ykka hegaa malabaa qonccissees. Ha naaꞌꞌu xiqisetunkka yohuwaaway erettidaba gidiyoogaa qonccissiya qaalati deꞌoosona; shin kaallidi deꞌiya “ayyaana” qassi “siiqo” giyaageetussi baawa. Yaatiyo gishshawu, yohuwaawaynne appe kaalliyaagee issoy haran laamettiyaaba gidokkona. Ha xiqiseti “ayyaanay Xoossaa” woy “siiqoy Xoossaa” geetettana danddayokkona.

Ha Xiqisee “Qaalay” Oonakko Qonccissiyaabee?

Giriiketto qaalaa eranchchatinne Geeshsha Maxaafaa birshshiya daroti Yohaannisa 1:1​y “Qaalaa” oonatettaa gidennan, A erissiya issibaa qonccissiyoogaa yootoosona. Geeshsha Maxaafaa birshshiya Wiliyam Barkileyi hagaadan giis: “[Kiitettida Yohaannisi] teꞌos giyaagaappe kase erettidabaa qonccissiya qaalaa goꞌettibeenna gishshawu, hegee issibaa qonccissees . . . Yohaannisi Qaalay Xoossaara issuwaa gibeenna. Hara guussan, Yesuusi Xoossaa gibeenna.” Eranchchaa Jesen David Bedun giyo asikka hegaara issi malabaa yootiis; hagaadan giis: ‘Giriikettuwan, Yohaannisa 1:1​c wurssettan deꞌiyaagaa mala qofa qashuwan theos giyaagaa qonccissiyaabi baynnan xaafiyo wode, ay xoossakka gidiyoogaa nabbabiyaageeti qoppoosona.’ Beduni gujjidikka hagaadan giis: “Yohaannisa 1:1​y Qaalay mexi issi Xoossaa gidennan, Xoossaadan ayyaana gidida xoossaa.” Woykko Amerikan Istandard Vershin Geeshsha Maxaafaa birshshida asatuppe issuwaa gidida Josef Heneri Tayeri giidoogaadan, “Logos [woy, Qaalay] ba huuphe Xoossaa gidennan, Xoossaa mala gidida xoossa.”

Xoossaa oonatettay eranawu metiya “gita xuura” yohoo? Yesuusi hegaadan xeellibeenna. Yesuusi, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagidi ba Aawaa woossiis. He woosan, I baappenne ba Aawaappe gidduwan qoncce dummatettay deꞌiyoogaa qonccissiis. (Yohaannisa 17:3) Nuuni Yesuusa ammaniyaabanne Geeshsha Maxaafay tamaarissiyo qonccebaa akeekiyaaba gidikko, Yesuusa Xoossaa mala gidida A Naꞌaa ootti xeelliyoogan A bonchchoos. Qassi Yihooway “issi Xoossaa” gidiyoogaadan awu goynnoos.