Neeni Geeshsha Maxaafaa Akeekana Danddayiyo Ogiyaa
1. Maaduwaa Demmanau Xoossaa Oycha
Xaaliyaa biittan deꞌiya Ninfa hagaadan gaasu: “Issi wode, taani ichanaappe kase Geeshsha Maxaafaa nabbabays. Taani hegaadan oottidoy, i Xoossaa Qaala gidiyoogaa erido gishshataassa; qassi nabbabiyoogee tana ufayssennaba gidikkokka, Xoossay Geeshsha Maxaafan xaafissidobay aybakko eranau koyaas. Taani a wurssada nabbabanau halchaas. Koyro heeran tana metibeenna; shin eranau metiya qofay deꞌiyasaa gakkada nabbabiyoogaa agga bayaas.”
NENAKKA Ninfigaa mala hanotay gakkidee? Daro asaa hegaa malabay gakkana danddayees. SHin, hagaappe kasetiya huuphe yohuwan beꞌidoogaadan, Geeshsha Maxaafaa xaafissida, Xoossaa Yihooway neeni a Qaalaa akeekanaadan koyees. Gidikkokka, neeni hegaadan waatada akeekana danddayay? Koyro yohoy maaduwaa demmanau Xoossaa oychiyoogaa.
Yesuusi kiittidoogeeti haymaanoote timirtte keettan loohissuwaa demmibeenna gishshau, asay eta ‘tamaaribeenna coo asadan’ xeelliis. (Oosuwaa 4:13) Gidikkonne, eti Xoossaa Qaalaa akeekana danddayiyoogau Yesuusi ammanttiyaabaa yootiis. Waanidi ammanettana danddayiyoonaa? Yesuusi: “Geeshsha Ayyaanai, minttettiyaagee, Aawai ta sunttan kiittanaagee, inttena ubbabaa tamaarissana” yaagidi qonccissiis. (Yohaannisa 14:26) Xoossay ha geeshsha ayyaanaa, ba wolqqaa saꞌaanne saꞌan deꞌon deꞌiya ubbaabaa medhanau goꞌettiis. (Doomettaabaa 1:2) I 40 gidiya asati ba qofaa Geeshsha Maxaafan xaafanaadan kaalettanaukka geeshsha ayyaanaa goꞌettiis. (2 PHeexiroosa 1:20, 21) Geeshsha Maxaafaa akeekanau koyiyaageeta he ayyaanay maaddana danddayees.
Neeni Xoossaa geeshsha ayyaanaa waatada demmana danddayay? Neeni hegaa demmanau ammanuwan Xoossaa oychana koshshees. Neeni aggennan oychiyoogee koshshana danddayees. Yesuusi: “Woossite, intte ekkana; . . . Intte . . . intte naatussi lo77obaa immiyoogaa erikko, yaatin saluwan de7iya Aawai bana woossiyaageetussi Geeshsha Ayyaanaa waati darissidi immanddeeshsha?” yaagiis. (Luqaasa 11:9, 13) Geeshsha ayyaanaa yeemottidi koyiyaageetussi Yihooway immanau wozanappe koyees. SHaꞌan qoodettiya layttappe kase ayyaanaa kaaletuwan Geeshsha Maxaafan xaafettida qaalatu birshshettaa neeni akeekanaadan Xoossaa ayyaanay maaddana danddayees. Geeshsha Maxaafan deꞌiya goꞌꞌiya zoriyaa ne deꞌuwan waatada oosuwan peeshshana danddayiyaakko eranaadankka Xoossaa ayyaanay maaddana danddayees.—Ibraawe 4:12; Yaaqooba 1:5, 6.
Yaatiyo gishshau, Geeshsha Maxaafaa nabbabiyo wode ubban, neeni a Qaalaa akeekanaadan maaddiya geeshsha ayyaanaa immana mala Xoossaa woossa.